الماتى وبلىسىندا سۋ جانجالى اسقىنىپ تۇر. سەبەبى, كوكسۋ اۋدانىندا سۋ دۇرىس بولىنبەگەندىكتەن القاپتارداعى جەكەلەگەن جەر تەلىمدەرىنە سۋ جەتپەي, اعىن سۋ بوسقا ءراسۋا بولۋدا. سونىمەن قاتار, اتالعان اۋداندا سۋ قۇنى تىم جوعارى – تەكشە مەترى 0,51 تەڭگە تۇرادى. ال كورشى اۋدانداردا بۇل باعا تومەن. سۋ جەتكىزۋ شىعىندارىندا ايىرما جوق. سوندىقتان, كوكسۋ اۋدانىنىڭ كاسىپكەرى نيكولاي برۋسەنسكي جانە «قايرات» شارۋا قوجالىعى باسشىسى ارعىنعازى سايەردەنوۆ, «ءۇمىت» ساتك ءتورايىمى سۆەتلانا لوموۆا «ءبىز جۇرگىزىلىپ جاتقان تاريف ساياساتىنىڭ سەبەبىن تۇسىنە الماي وتىرمىز.
ءبىزدىڭ اۋدان وزەن بويىندا ورنالاسقانىمەن سۋ اقىسىن نەگە قىمبات باعامەن تولەيمىز؟ سۋ بولەتىن كاسىپورىن ارنالاردى سۋمەن تولىق قامتاماسىز ەتۋ جونىندەگى كەلىسىمشارتتاعى مىندەتتەمەسىن نەگە ورىندامايدى؟ اۋىلشارۋاشىلىق داقىلدارىنا سۋ جۇمساۋ نورمالارىن قايتا قاراۋ قاجەت. ءبىزدىڭ جانايقايىمىزدى ەشكىم تىڭدامايدى, قۇلاق تۇرمەيدى», دەپ بىرقاتار شىندىقتىڭ بەتىن اشىپ, «قازاق سۋ شارۋاشىلىعى» مەملەكەتتىك كاسىپورنى جۇمىسىنا نارازىلىق تانىتۋدا.
بۇل ماسەلەنى «قازاق سۋ شارۋاشىلىعى» رمك ديرەكتورىنىڭ ورىنباسارى قالىبەك قۇدايبەرگەنوۆ سۋلاندىرۋ سالاسىندا بىلىكتى مامانداردىڭ جەتىسپەۋشىلىگىن, كوكسۋ اۋدانىنداعى مەكەمەلەر بالانسقا الىنباعاندىقتان وتكەن جىلى بولىنگەن 570 000 تەڭگە بارلىق سۋلاندىرۋ جۇيەلەرى مەن سۋ ارنالارىن قايتا قالپىنا كەلتىرۋگە جەتپەگەنىن ايتقانىمەن, جينالىسقا قاتىسۋشىلاردىڭ كوڭىلىن كونشىتپەدى.
«كاسىپكەرلەر قۇقىعىن قورعاۋ بويىنشا سالالىق تەكسەرۋ جۇرگىزەمىز. تابيعي مونوپوليالاردى رەتتەۋ جانە ءباسەكەلەستىكتى قورعاۋ دەپارتامەنتىنە كوكسۋ اۋدانىنداعى سۋ باعاسىنا قاتىستى تاريفتىك ساياساتتى ءتۇسىندىرۋدى تالاپ ەتەمىز», دەيدى وبلىستىق كاسىپكەرلەر پالاتاسىنىڭ باسشىسى ل.شىڭعىسباەۆا.
ال وزەن بويىندا سۋ تاپشىلىعىن تارتىپ وتىرعان جاندارعا بيلىك قانداي ءۋاج ايتار ەكەن؟
نۇربول الدىباەۆ,
«ەگەمەن قازاقستان»
الماتى وبلىسى,
كوكسۋ اۋدانى