[caption id="attachment_52918" align="aligncenter" width="560"] فوتو: life.ru[/caption]
مەكسيكانىڭ گەررەرا شتاتىنداعى سيۋداد-التاميرانو قالاسىنىڭ مەرى امبروزيو سوتو ەسىرتكى ساتۋشىلاردىڭ قولىنان قازا تاپتى.
قارۋلانعاندار جولدى تولىعىمەن قورشاپ الىپ, بىرنەشە كولىككە وق جاۋدىرعان. سالدارىنان قالا باسشىسى وقيعا ورنىندا ءتىل تارتپاي كەتسە, ەكى پوليتسەي اۋىر جارالاندى. rt.com اقپارىنا سايكەس, قالا تۇرعىندارى مەن كاسىپكەرلەرى اتىشۋلى ەسىرتكى تاسىمالدايتىن توپتارعا اقشا بەرۋگە ءماجبۇر ەكەندەرىن ايتقان. بۇل ىستى امبروزيو سوتو ورىنداماعاندىقتان, ولار قاندى ارەكەتتەرىن جۇزەگە اسىرىپتى.
وسىمەن سوڭعى ەكى كۇن ىشىندە ەكى بىردەي قالا مەرى قازا بولىپ وتىر. بىرەر كۇن بۇرىن چياپاس شتاتىنداعى سان-حۋان-چامۋلا قالاسىندا قاقتىعىس ورىن الىپ, اكىم دومينگو لوپەس گونسالەس وپات بولدى.
lenta.ru مالىمەتى بويىنشا, نارازىلىق بىلدىرگەندەر باسشىدان قوعامدىق جۇمىستارعا جانە جەرگىلىكتى قولونەرشىلەردى قولداۋعا قارجى ءبولۋدى تالاپ ەتكەن. الايدا, دومينگو لوپەس كۇزەتشىلەرىنىڭ كومەگىمەن ولاردى قۋىپ شىقپاق بولىپتى. بۇل ىسكە اشۋلانعان توپ وعان وق جاۋدىرعان. وقىس وقيعادان تاعى دا بەس ادام قازا تاۋىپ, 12-ءى جارالاندى.
مەكسيكادا سوڭعى ون جىل ىشىندە 75 قالا مەرى وقىس وقيعالاردان وپات بولعان ەكەن.
ايان ءابدۋالي