كەشە, استاناداعى «Marriott» قوناقۇيىندە ءىى حالىقارالىق جاۋىنگەرلىك ونەر فەستيۆالىنە قاتىسۋشىلاردىڭ ءباسپاسوز ءماسليحاتى بولىپ ءوتتى. حالىقارالىق جاۋىنگەرلىك ونەر فەستيۆالى ەلوردادا وسىمەن ەكىنشى رەت وتكىزىلمەك. قالا كۇنى مەرەكەسىنە وراي ۇيىمداستىرىلعالى وتىرعان بۇل ايتۋلى شاراعا يتاليا, قازاقستان, قىتاي, رەسەي, فيليپپين جانە جاپونيا شەبەرلەرى كورەرمەندەر نازارىنا دجيۋ-دجيتسۋ, كيوكۋشينكاي-كان كاراتە, قويان-قولتىق ۇرىس, سۋمو, تاەكۆاندو, مۋاي-تاي, ۆين-چۋن, قازاق كۇرەسى, برازيليالىق دجيۋ-دجيتسۋ, شاولين-تسيۋان جانە پەكيتي-تيرسيا كالي سياقتى جاۋىنگەرلىك جەكپە-جەكتەر بويىنشا ونەر كورسەتەدى.
بيىل حالىقارالىق ونەر فەستيۆالىنە ۆين-چۋن حالىقارالىق فەدەراتسياسىنىڭ (IWCO) قۇرمەتتى پرەزيدەنتى سيفۋ دونالد ماك, Ultimate Fighting Championship قامقورلىعىمەن ونەر كورسەتەتىن, ارالاس ستيلدەگى كاسىپقوي سپورتشى حابيب نۋرماگومەدوۆ, كاسىپقوي رەسەيلىك تايبوكسشى جانە كيكبوكسشى, تاي بوكسىنان جانە كيكبوكسينگتەن كاسىپقويلار مەن اۋەسقويلار اراسىنداعى جارىستاردىڭ بىرنەشە دۇركىن جەڭىمپازى, تاي بوكسىنان رەسەيدىڭ ەڭبەك سىڭىرگەن سپورت شەبەرى ارتەم لەۆين سىندى ايگىلى تۇلعالار قاتىسادى. اكتەر, كاسىپقوي سپورتشى, جاۋىنگەرلىك جەكپە-جەك بويىنشا اسكەري نۇسقاۋشى سەرگەيا باديۋك سپورتسۇيەر قاۋىم ءۇشىن توسىن سىي بولماق.
ءباسپاسوز ءماسليحاتىندا اتاپ كورسەتىلگەندەي, ماڭىزدى سپورتتىق شارادان قازاقستاندىق سپورتشىلار دا تىس قالمايدى. ەلىمىزدىڭ تانىمال بوكسشىسى, 2005 جىلعى جانە 2007 جىلعى الەم چەمپيونى, 2012 جىلعى وليمپيادا چەمپيونى, «استانا ارلانس» كاسىپقوي بوكس كلۋبىنىڭ باس ديرەكتورى سەرىك ساپيەۆ, تاي بوكسى مەن ك-1 كاسىپقوي سپورتشى, اۋەسقويلار اراسىنداعى الەم چەمپيونى, كاسىپقويلار اراسىنداعى تايلاند كورولى كۋبوگىنىڭ يەگەرى داۋلەت وتارباەۆ, كاراتە مەن مما-دان الەمنىڭ ءۇش دۇركىن چەمپيونى, دجيۋ-دجيتسۋدەن ەۋروپانىڭ ءۇش دۇركىن چەمپيونى ايدار ماحمەتوۆ, سونداي-اق, قازاقستاننىڭ دجيۋ-دجيتسۋ مەن مما فەدەراتسياسىنىڭ پرەزيدەنتى اناتولي كيم سياقتى كەش قوناقتارى ءوز شەبەرلىكتەرىن ورتاعا سالادى.
ەسكە سالا كەتەتىن بولساق, وتكەن جىلعى ءبىرىنشى جاۋىنگەرلىك ونەر فەستيۆالىنە دۇنيە-جۇزىنەن 150-گە جۋىق شەبەر قاتىسىپ, شارا بارىسىندا ستيۆەن سيگال, سەرگەي باديۋك پەن باتۋ حاسيكوۆ كوپشىلىككە ءتۇرلى جەكپە-جەكتەردەن ايلا-تاسىلدەر كورسەتىپ, كورەرمەندەردى ۇمىتىلماس اسەرگە بولەگەن. سونىمەن بىرگە, ەلوردالىق كورەرمەندەر العاش رەت شاولين موناحتارىنىڭ ونەرىن تاماشالاعان بولاتىن. ءباسپاسوز ءماسليحاتىندا ايتىلعانداي, بيىلعى جاۋىنگەرلىك ونەر فەستيۆالى دە اسەرلى ءارى تارتىمدى بولاتىن ءتۇرى بار.
ءىى حالىقارالىق جاۋىنگەرلىك ونەر فەستيۆالىنىڭ شىمىلدىعى كەشە, 28 ماۋسىمدا «داۋلەت» ۇلتتىق تەننيس ورتالىعىندا اشىلدى. ال بۇگىن ءىى حالىقارالىق جاۋىنگەرلىك ونەر فەستيۆالىنە قاتىسۋشىلار استانا قالاسىنداعى سپورت مەكتەپتەرىنىڭ شاكىرتتەرىنە ارنالعان شەبەرلىك دارىستەرىن وتكىزەدى.
نازەركە مۇحامەديا,
№4 مەكتەپ-گيمنازيانىڭ تۇلەگى