جەڭگەندەر – ءبىزدىڭ مەرگەندەر

قاراعاندىدا قۇرالايدى كوزگە اتقان اسكەري مەرگەن­دەر اراسىندا وتكەن حالىق­ارالىق «التىن ۇكى-2016» جارىسى مارەگە جەتتى. بۇل سىندا تاماشا ونەر كور­سەتكەن قازاقستاندىق مەرگەندەر جالپىكوماندالىق ەسەپتە جانە جەكەلەي سىندا الدارىنا جان سالماي, ءابسوليۋتتى جەڭىمپاز اتاندى. وسىمەن ءتورتىنشى رەت ءوتىپ وتىرعان سايىسقا قىتاي, اقش, رەسەي, ۇلىبريتانيا, پاكىستان, بەلارۋس جانە قازاقستان ەلدەرىنەن 21 كوماندا كەلدى. قورىتىندىدا توپتى قازاقستان قارۋلى كۇشتەرىنە قاراستى 20030 اسكەري ءبولىمىنىڭ مەر­گەن­دەرى باستادى. كەلەسى ورىن قا­زاقستاندىقتارعا – 22750 اسكەري ءبولىمىنىڭ قىز­مەت­كەرلەرىنە بۇيىردى. ودان كەيىنگى ورىندارعا, تيىسىنشە 35950, 32356 اسكەري ءبو­لىمدەرى مەن مەملەكەتتىك كۇ­زەت قىزمەتىنىڭ ساربازدارى تۇراقتادى. 8-ورىنعا بەلارۋس وكىلدەرى يە بولسا, 9-10-ورىنداردى قىتاي اسكەريلەرى مىسە تۇتتى. بەس كەزەڭنەن تۇراتىن جارىستا مەرگەندەر 14 ءتۇرلى جاتتىعۋدان قۇرالعان سىناق بويىنشا ونەر كورسەتتى. جارىسقا باقىلاۋشى رەتىندە تۇركيا مەن ءۇندىستاننىڭ اسكەري وكىلدەرى دە قاتىستى. ايتا كەتەيىك, وسى جىل­دىڭ ءساۋىر ايىندا اقش اسكەرلەرى ارنايى وپەراتسيا كۇشتەرىنىڭ جابىق تۇردە وتكەن جارىسىندا ق­ازاق­ستاندىق مەرگەندەر گەر­مانيا مەن اقش اتقىش­تارىن العا جىبەرىپ, ءۇشىنشى ورىنعا قول جەتكىزگەن بولاتىن. قايرات ءابىلدينوۆ, «ەگەمەن قازاقستان» قاراعاندى