جاسىن وتى جايپاپ كەتتى

نايزاعايدان شوپان وتارىنان 300-گە جۋىق قوي وپات بولدى قىرعىزستانداعى Turmush.kg باسى­لىمىنىڭ حابارلاۋىنشا, دجالال-اباد وبلىسى, اقسىي اۋدانىندا نايزاعاي سوعۋدىڭ سالدارىنان 300-گە جۋىق قوي قىرىلىپ قالعان. اتالعان باسىلىمنىڭ اقپارا­تىنا سۇيەنسەك, شوپان 600 باس ۋاق مالدى كاشكا سۋ جايىلىمىنا جەتكىزۋى كەرەك بولىپتى. الايدا, ول دىتتەگەن جەرىنە جەتە الماي, قويلاردى سۋك-دوبو اسۋىنا اكەپ يىرگەن. مىنە, سول-اق ەكەن, اۋا رايى تەز بۇزىلىپ, دۇلەي داۋىل تۇرىپ كەتكەن. سونىڭ سالدارىنان شەلەكتەپ جاڭبىر قۇيىپ, نايزاعاي ويناعان. – كاشكا سۋ جايىلىمىنا جەتۋ ءۇشىن كەمى ەكى كۇن جۇرەسىڭ. جولاي ۇلكەن اسۋدان ءوتۋ كەرەك. ال وسى بەلەسكە تاياعاندا اۋا رايى قۇبىلدى. مەن ەكى كومەكشىمە شاتىر قۇرۋدى تاپسىردىم. قوي­لاردى ءبىر جەرگە جينادىق. سول كەزدە نايزاعاي مالدارعا ءتۇستى. سالدارىنان 120 باس قوي قىرىلدى, – دەيدى شوپان. ال كۋاگەرلەردىڭ ايتۋىنشا, مۇنان بولەك, 145 باس مال اسپاننىڭ كۇركىرەۋى مەن نايزاعايدىڭ ويناۋىنان قورقىپ, اسۋدان سەكىرىپ كەتكەن. كەيىن مالشى 115 قويدىڭ ءولى دەنەسىن تاۋىپ العان. ايتا كەتەيىك, مال تاش-كۋمىر قالاسى مەن اقسىي اۋدانىنىڭ فەرمەر­لەرىنىكى ەكەن. وسى ورايدا مال يەلەرى شوپانعا ەشبىر كىنا ارتپايتىنىن, قۇنىن تولەت­پەيتىنىن جەتكىزىپتى. تالعات رايىمبەك, «ەگەمەن قازاقستان»