كەشە ءماجىلىس سپيكەرى باقتىقوجا ىزمۇحامبەتوۆتىڭ توراعالىعىمەن ءماجىلىس بيۋروسى ءوتتى, دەپ حابارلادى وسى پالاتانىڭ ءباسپاسوز قىزمەتى.
وندا الداعى جالپى وتىرىستىڭ كۇن ءتارتىبى قارالىپ, حالىق قالاۋلىلارى تالقىسىنا «تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ اۋماقتارىندا بىرلەسكەن جەدەل-تەرگەۋ توپتارىن قۇرۋ ءتارتىبى جانە ولاردىڭ قىزمەتى تۋرالى كەلىسىمدى راتيفيكاتسيالاۋ تۋرالى» زاڭ جوباسىن ۇسىنۋ جوسپارلانىپ وتىر.
بۇل كەلىسىم 2015 جىلعى 16 قازاندا بۋراباي كەنتىندە جاسالعان. وندا تاراپتاردىڭ قۇزىرەتتى ورگاندارىنىڭ ءىس ءجۇرگىزۋىندەگى ەكى جانە ودان كوپ تاراپتىڭ اۋماعىندا دالەلدەمەلەردى ۇسىنۋ نە پروتسەستىك ارەكەتتەردى جانە جەدەل-ىزدەستىرۋ ءىس شارالارىن جۇرگىزۋ قاجەت بولاتىن قىلمىستىق ءىستەر بويىنشا ءوزارا بايلانىستى قىلمىستاردى اشۋ جانە تەرگەپ تەكسەرۋ ءۇشىن تاراپتاردىڭ اۋماقتارىندا بىرلەسكەن جەدەل-تەرگەۋ توپتارىن قۇرۋ, ولاردىڭ قىزمەتى ءجانە قىزمەتىن توقتاتۋ ماسەلەلەرىن رەتتەۋ كوزدەلەدى.
كەلىسىم راتيفيكاتسيالانعان جاعدايدا ونى ىسكە اسىرۋ تەرىس الەۋمەتتىك-ەكونوميكالىق ءجانە قۇقىقتىق سالدارعا اكەلىپ سوقتىرمايدى, سونداي-اق, رەسپۋبليكالىق بيۋدجەتتەن قوسىمشا شىعىنداردى تالاپ ەتپەيدى.