ءبىزدىڭ قىزمەتىمىزدىڭ باستى ماقساتى وبلىستاعى قارجى ءتارتىبىن نىعايتۋ جانە ەكونوميكالىق تۇراقتىلىقتى قامتاماسىز ەتۋ ماقساتىندا جەرگىلىكتى بيۋدجەت قاراجاتىن جانە مەملەكەت اكتيۆتەرىن پايدالانۋدىڭ تيىمدىلىگىن ارتتىرۋ بولىپ تابىلادى.
وتكەن جىلى 35 باقىلاۋ ءىس-شاراسى جۇرگىزىلىپ, 172 مەملەكەتتىك مەكەمە مەن كاسىپورىن قامتىلدى. وسى تەكسەرۋلەرمەن 110,8 ملرد. تەڭگە بيۋدجەت قاراجاتتارى قامتىلىپ, جالپى سوماسى 1,9 ملرد.تەڭگەگە بۇزۋشىلىقتار انىقتالدى. تەكسەرۋ ناتيجەلەرى بويىنشا بيۋدجەتكە قايتارىلۋعا جانە قالپىنا كەلتىرىلۋگە جاتاتىن 481,5 ملن. تەڭگە انىقتالىپ, ونىڭ 359,4 ملن.تەڭگەسى بيۋدجەتكە قايتارىلدى جانە قالپىنا كەلتىرىلدى. نەگىزگى بۇزۋشىلىقتار بيۋدجەتتىك جانە سالىقتىق, مەملەكەتتىك ساتىپ الۋ جانە بۋحگالتەرلىك ەسەپ پەن قارجىلىق ەسەپتىلىك تۋرالى زاڭنامالارىنىڭ تالاپتارىن بۇزۋدان تۋىندايدى. بۇدان باسقا مەملەكەتتىك مەكەمەلەر مەن كاسىپورىنداردىڭ لاۋازىمدى تۇلعالارى بيۋدجەت قاراجاتتارىنىڭ نەگىزسىز پايدالانىلۋىنا جول بەرگەن.
وسىعان وراي, 2015 جىلى ەڭبەقاقىنى, ءىسساپار شىعىندارىن ارتىق تولەگەنى ءۇشىن, سۋبسيديالاۋ مەن تاماقتاندىرۋ بويىنشا نەگىزسىز شىعىندارعا جول بەرۋ, اياقتالماعان جۇمىستاردىڭ تولەنۋى, مەملەكەتتىك ساتىپ الۋ بويىنشا بۇزۋشىلىقتار جانە تاماقتاندىرۋعا ارنالعان اتا-انالار جارناسىنىڭ جەتىسپەۋى سياقتى دەرەكتەر بويىنشا 30 ماتەريال قۇقىق قورعاۋ ورگاندارىنا جولداندى. قازىرگى تاڭدا 15 ماتەريال تەرگەۋالدى تەكسەرۋدەن وتۋدە, 7 ماتەريال بويىنشا كەلتىرىلگەن شىعىنداردىڭ وتەلۋىنە بايلانىستى قىلمىستىق ءىس قوزعاۋدان باس تارتىلدى. ال, قالعان 8 ماتەريال بويىنشا قىلمىستىق ءىس قوزعالدى, ونىڭ ۇشەۋى بويىنشا شەشىم قابىلدانىپ, 3 لاۋازىمدى تۇلعا قىلمىستىق جاۋاپكەرشىلىككە تارتىلدى.
مىسالى, وبلىستىق جولاۋشىلار كولىگى جانە اۆتوموبيل جولدارى باسقارماسىندا الەۋمەتتىك ماڭىزى بار اۋدانارالىق قاتىناستار بويىنشا جولاۋشىلار تاسىمالىن سۋبسيديالاۋدى تەكسەرۋ كەزىندە قاراستىرىلعان سۋبسيديالار شەگىنەن تىس قوسىمشا 10,0 ملن. تەڭگە بيۋدجەت قاراجاتى نەگىزسىز جۇمسالعانى انىقتالدى. سوتتىڭ شەشىمىمەن ارتىق جۇمسالعان قاراجات تولىق كولەمىندە وبلىستىق بيۋدجەتكە قايتارىلدى. وبلىستىق ساۋلەت جانە قالا قۇرىلىسى باسقارماسى قالا قۇرىلىسىن دامىتۋدىڭ كەشەندى سحەمالارىن جانە ەلدى مەكەندەردىڭ باس جوسپارلارىن ازىرلەۋ جۇمىسى اياقتالماستان 6,7 ملن.تەڭگەنى تۇگەلدەي اۋدارىپ جىبەرگەن. بۇل قاراجات تولىعىمەن وبلىستىق بيۋدجەتكە قايتارىلدى.
بيۋدجەت قاراجاتتارىنىڭ نەگىزسىز پايدالانىلۋ دەرەكتەرىنىڭ باسىم بولىگى ءبىلىم بەرۋ ۇيىمدارىندا ورىن الىپ وتىر. №39 ورتا مەكتەبىندە بيۋدجەتكە وتەلۋگە جاتاتىن 78,3 ملن. تەڭگە سوماسىندا 7 جۇمىس ىستەمەيتىن تۇلعالارعا جانە ناقتى جۇمىس ىستەمەگەن كۇندەرى ءۇشىن 11 قىزمەتكەرگە ارتىق ەڭبەكاقىنىڭ, ساۋىقتىرۋ جاردەماقىسىنىڭ, دەمالىس اقىسىنىڭ, ءىسساپار شىعىندارىنىڭ تولەنگەندىگى انىقتالدى. بۇل مەتەريال بويىنشا قىلمىستىق ءىس قوزعالىپ, سوتتا قاراستىرىلۋدا. №5 حرومتاۋ گيمنازياسىندا جۇرگىزىلگەن باقىلاۋمەن جالپى سوماسى 4,3 ملن. تەڭگەگە ەڭبەكاقىنىڭ ارتىق تولەنۋى بويىنشا جانە مەكەمە قىزمەتكەرلەرىنە ۇستەمەاقىلاردىڭ, ءىسساپار شىعىندارىنىڭ نەگىزسىز تولەنۋى جانە تاعى باسقا بۇزۋشىلىقتاردىڭ جىبەرىلگەندىگى انىقتالدى. اقتوبە وبلىستىق پروكۋراتۋراسى بۇل دەرەكتى قاراپ, جاۋاپتى لاۋازىمدى تۇلعالارعا قاتىستى تارتىپتىك شارا قابىلداۋ تۋرالى وبلىستىق ءبىلىم باسقارماسىنا ۇسىنىم جولدادى.
ۆ.پاتساەۆ اتىنداعى №2 العا ورتا مەكتەبىندە تولىق اياقتالماعان جۇمىستار ءۇشىن مەردىگەرگە 1,2 ملن. تەڭگە كولەمىندە قاراجات تولەنگەندىگى انىقتالىپ, بيۋدجەتكە ءوندىرىلدى. العا, تەمىر جانە ويىل اۋداندارىنىڭ 10 بالاباقشاسىنا تەكسەرۋ جۇرگىزۋ بارىسىندا 6,9 ملن. تەڭگەگە بيۋدجەت قاراجاتتارىن جانە اتا-انالار جارناسىن ءوز مۇددەلەرىنە زاڭسىز پايدالانۋ دەرەكتەرى انىقتالىپ, بۇل قاراجاتتار تولىق كولەمىندە بيۋدجەتكە قايتارىلدى. تەمىر اۋداندىق وقۋشىلار ءۇيىنىڭ ەسەپشىسى 669,5 مىڭ تەڭگە كولەمىندە قاراجاتتى ءوز مۇددەسىنە قولدانعاندىعى انىقتالدى. بۇل قاراجات تەكسەرۋ جۇرگىزۋ بارىسىندا بيۋدجەتكە قايتارىلدى.
قارعالى اۋداننىڭ ءبىلىم ءبولىمىنىڭ باسشىسىنا مەملەكەتتىك ساتىپ الۋ زاڭناماسىن بۇزعانى ءۇشىن جانە كەمپىرساي سەلولىق وكرۋگىنىڭ اكىمى ءىسساپار شىعىندارىن ارتىق تولەگەنى ءۇشىن وبلىستىق ءتارتىپتىڭ كەڭەستىڭ شەشىمى بويىنشا قاتاڭ سوگىس بەرىلدى.
بۇدان باسقا, تەكسەرۋ كوميسسياسى اكىمشىلىك جاۋاپكەرشىلىككە تارتىلۋ قاراستىرىلعان زاڭناما بۇزۋشىلىقتارىن دا انىقتاپ وتىر. 2015 جىلعى تەكسەرۋ ناتيجەلەرى بويىنشا بيۋدجەت زاڭناماسىنىنىڭ, مەملەكەتتىك ساتىپ الۋ جانە بۋحگالتەرلىك ەسەپ پەن قارجىلىق ەسەپتىلىك زاڭدارىن بۇزعاندارى ءۇشىن 65 لاۋازىمدى تۇلعالارعا جالپى سوماسى 18,2 ملن.تەڭگەگە 131 اكىمشىلىك ايىپپۇل سالىندى.
بيۋدجەت زاڭناماسى بويىنشا ەكى لاۋازىمدى تۇلعاعا بيۋدجەتتىك ەسەپ جۇرگىزۋ ەرەجەلەرىن بۇزعانى ءۇشىن 4 اكىمشىلىك ايىپپۇل سالىندى. سونىمەن قاتار, تەكسەرۋ كوميسسياسىنىڭ زاڭدى تالاپتارىن جانە قاۋلىسىن ورىنداماعاندارى ءۇشىن 3 لاۋازىمدى تۇلعاعا اكىمشىلىك ايىپپۇل سالىندى. 2015 جىلى بيۋدجەتتىك, سالىق, مەملەكەتتىك ساتىپ الۋ جانە بۋحگالتەرلىك ەسەپ پەن قارجىلىق ەسەپتىلىك تۋرالى زاڭنامالارىنىڭ تالاپتارىن بۇزعانى ءۇشىن تەكسەرۋ كوميسسياسىنىڭ ۇسىنىمى بويىنشا 85 لاۋازىمدى تۇلعا تارتىپتىك جاۋاپكەرشىلىككە تارتىلدى.
ساعات ەڭسەگەن ۇلى,
اقتوبە وبلىستىق تەكسەرۋ كوميسسياسىنىڭ توراعاسى
اقتوبە وبلىسى