الماتىداعى دوستىق ۇيىندە قازاقستان حالقى اسسامبلەياسى XXIV سەسسياسىندا ەلباسى نۇرسۇلتان نازارباەۆ مىندەتتەگەن تاپسىرمالار بويىنشا اسسامبلەيا مۇشەلەرىنىڭ كەڭەيتىلگەن وتىرىسى بولىپ ءوتتى.
القالى وتىرىستا اسسامبلەيا كەڭەسىنىڭ مۇشەلەرى, ەتنومادەني بىرلەستىكتەردىڭ باسشىلارى مەملەكەتتىك ماڭىزى زور «ماڭگىلىك ەل» پاتريوتتىق اكتىسى مەن جالپىحالىقتىق «قايىرىمدىلىق كەرۋەنى», «قامقور» پاتريوتتىق جوباسى سەكىلدى بىرقاتار باعدارلامالاردىڭ جۇرگىزىلۋ بارىسىن پىسىقتاۋمەن قاتار, قازاقستان حالقى اسسامبلەياسى جۇمىسىن ۇيىمداستىرۋ مەن الداعى ۋاقىتتا وزگە دە پايدالى جوبالاردى جۇزەگە اسىرۋ ماسەلەلەرىن قارادى.
كەڭەستە ءسوز العان قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى ەرالى توعجانوۆ مەملەكەت باسشىسىنىڭ تاپسىرۋىمەن اسسامبلەيا تاراپىنان اتقارىلىپ جاتقان يگى ىستەردىڭ ماڭىزدىلىعىنا توقتالىپ, ەل ىشىندە «قازاقستان» تەلەراديو كەشەنىمەن بىرلەسە ءجۇرگىزگەن جالپىحالىقتىق «قايىرىمدىلىق كەرۋەنى» اكتسياسى اياسىندا 1000-عا تارتا ادامنان ءوتىنىش تۇسكەنىن, ناتيجەسىندە 500-دەن اسا ازاماتتىڭ تۇيتكىلدى ماسەلەسى وڭ شەشىمىن تاپقانىن جەتكىزدى.
سونىمەن قاتار, ەرالى لۇقپان ۇلى «ماڭگىلىك ەل» پاتريوتتىق اكتىسى تاقىرىبىندا وتكىزىلگەن جالپىقازاقستاندىق اشىق ديكتانت جازۋ ۇدەرىسىن قورىتىندىلاي كەلە, بۇگىنگى قازاقستان قوعامىنىڭ جاڭا ساپاعا كوشكەندىگىنە, حالىقتىڭ ۇلتتىق يدەيالارعا بەلسەندى ارالاساتىندىعىنا ريزاشىلىعىن ءبىلدىردى. ۇلت بىرلىگى مەن مەملەكەت مارتەبەسىن پاش ەتكەن يگى شاراعا اتسالىسقان 140 مىڭ قاتىسۋشىنىڭ 45 مىڭى ۇسىنىلعان تاپسىرمانى «وتە جاقسى» ورىنداعاندىعىن ايتا كەلىپ, مەكتەپ قابىرعاسىندا شاكىرتتەردىڭ پاتريوتتىق ساناسىن قالىپتاستىرا ءتۇسۋ ماقساتىندا «قازاقستان – ءبىر ۇلت, ءبىر حالىق» تاقىرىبىندا ساباقتار كەستەسىن بەكىتۋدى ۇسىندى.
قازاقستان حالقى اسسامبلەياسىنىڭ باستاماسىمەن ەلىمىزدىڭ بارلىق وڭىرىندە سوعىس ارداگەرلەرى مەن تىل ەڭبەككەرلەرىن قولداۋ ماقساتىندا جۇرگىزىلىپ وتىرعان «قامقور» پاتريوتتىق جوباسى جونىندە اتقارىلعان جۇمىستاردىڭ ەسەبى تىڭدالىپ, وسى ۋاقىتقا دەيىن ىنتالى ازاماتتار تاراپىنان 29 ميلليون تەڭگە جينالعانى ءمالىم بولدى.
سونداي-اق, كەڭەيتىلگەن كەڭەس بارىسىندا ەلىمىزدە الداعى جىلى وتكىزىلەتىن ەكسپو-2017 حالىقارالىق مامانداندىرىلعان كورمەسىنە دايىندىق جۇمىستارى دا قوزعالدى. اسسامبلەيا تاراپىنان كورمە ءۇشىن ەتنواۋىلدار قۇرىلىسىن قامتاماسىز ەتۋ مەن كورمەدەن كەيىنگى ۋاقىتتا ول نىسانداردى حالىق يگىلىگىنە جاراتۋ جوسپارى پىسىقتالدى.
بۇدان وزگە, قازاقستان حالقى اسسامبلەياسى ەلىمىزدەگى بەلدى تەلەارنالاردىڭ بىرىمەن كەلىسە وتىرىپ, ەلىمىزدەگى ءتۇرلى ۇلت وكىلدەرى تۋرالى تانىمدىق فيلمدەر ءتۇسىرۋ جوباسىن دا تالقىلادى.
قانات ەسكەندىر,
«ەگەمەن قازاقستان»
الماتى