شاراينا
رەسەي پرەزيدەنتى ۆلاديمير پۋتين, گفر كانتسلەرى انگەلا مەركەل, فرانتسيا پرەزيدەنتى فرانسۋا وللاند جانە ۋكراينا پرەزيدەنتى پەتر پوروشەنكو تەلەفون ارقىلى سيريا مەن ۋكراينانىڭ وڭتۇستىك-شىعىسىنداعى جاعدايلاردى رەتتeۋ ماسەلەلەرىن تالقىلادى.
تالقىلاۋ بارىسىندا تاراپتار ۋاقىتشا كەلىسىم رەجىمىن قاتاڭ ساقتاۋدىڭ ماڭىزدىلىعىن, جانجال ايماعىندا ەقىۇ ميسسياسى ارنايى مونيتورينگ قىزمەتىنىڭ تيىمدىلىگىن ارتتىرۋ, وعان قوسىمشا وكىلەتتىكتەر بەرۋ, سونداي-اق, باقىلاۋ جانە ۇيلەستىرۋ جونىندەگى بىرلەسكەن ورتالىقتى نىعايتۋ قاجەتتىگىن اتاپ ءوتتى. «نورماند تورتتىگىنىڭ» باسشىلارى, سونىمەن بىرگە, ۋكراينانىڭ وڭتۇستىك-شىعىسىنداعى الەۋمەتتىك-ەكونوميكالىق جانە گۋمانيتارلىق پروبلەمالاردى شەشۋ مۇمكىندىكتەرىنە قاتىستى پىكىر الماستى. بۇدان بولەك, ولار سيرياداعى بىرقاتار داعدارىستى اسپەكتىلەرگە دە نازار اۋداردى.
قايعى-قاسىرەت ارقالانعاندارمەن كەزدەسۋدى ءوتىندى
اقش-تىڭ 70-كە جۋىق كورنەكتى مادەنيەت جانە عىلىم قايراتكەرلەرى قۇراما شتاتتار پرەزيدەنتى باراك وبامانى حيروسيماعا ساپارى كەزىندە وسى قالاعا تاستالعان اتوم بومباسىنان امان قالعان جاپوندىقتارمەن كەزدەسۋگە شاقىرعان ۇندەۋ ارنادى.
«اتوم بومباسى قۇرباندارىنىڭ اراسىندا امان قالعان ادامدارمەن كەزدەسۋ ولاردىڭ تارتقان قايعى-قاسىرەتىن ءبىلدىرىپ قانا قويماي, سول ادامداردىڭ يىلمەي, يادرولىق قارۋدى جويۋعا دەگەن ۇمتىلىسىمەن تانىسۋعا دا مۇمكىندىك بەرەدى», – دەپ كورسەتىلگەن اق ءۇي باسشىسىنا جولدانعان ۇندەۋدە. كورنەكتى قايراتكەر تۇلعالار, سونداي-اق, ب.وبامادان ءوزىنىڭ حيروسيماعا تاستالعان اتوم بومباسى سوققىسى بويىنشا كەشىرىم سۇراۋدان باس تارتۋ شەشىمىن قايتا قاراۋدى جانە اقش-تىڭ يادرولىق قارۋدى جاڭعىرتۋ جوباسىن قارجىلاندىرۋدى توقتاتۋدى, سونىمەن قاتار, رەسەيمەن يادرولىق قارۋسىزدانۋ جونىندەگى كەلىسسوزدەردى جەدەلدەتۋدى وتىنگەن. اقش پرەزيدەنتى حيروسيمادا 27 مامىر كۇنى بولادى.
ساراپشىلار كەڭەسىن احماد دجانناتي باسقارادى
يراننىڭ ساراپشىلار كەڭەسى 90 جاستاعى كونسەرۆاتور اياتوللا احماد ءدجانناتيدى كەڭەس باسشىلىعىنا سايلادى. ساراپشىلار كەڭەسى يراننىڭ رۋحاني كوسەمىنىڭ قىزمەتىن باقىلاۋ, ونى قىزمەتكە تاعايىنداۋ, قىزمەتتەن بوساتۋ وكىلەتتىگىنە يە.
ساراپشىلار كەڭەسىنىڭ 88 مۇشەسى احماد ءدجانناتيدى 24 مامىردا سايلاعان. كەڭەس مۇشەلەرى نەگىزىنەن ءدىني دارەجەسى بار, جاسى ۇلعايعان ءدىني قايراتكەر-عۇلامالاردان تۇرادى. ال ا.دجانناتي يران پرەزيدەنتى حاسان رۋحاني مەن ونىڭ باتىس ەلدەرىمەن قاتىناستى جاقسارتۋ ارقىلى يراندى الەمدىك وقشاۋلانۋدان بوساتۋ ساياساتىن قولدامايتىن تۇلعالاردىڭ ءبىرى سانالادى. سونىمەن بىرگە, ول پارلامەنت سايلاۋىندا جۇزدەن استام رەفورماشىل كانديداتتى تىركەۋدەن الىپ تاستاعان يران كونستيتۋتسيالىق قاداعالاۋ كەڭەسىنە دە باسشىلىق جاسايدى. انىق ەمەس دەرەكتەرگە قاراعاندا, ساراپشىلار كەڭەسى وسى ەلدىڭ رۋحاني كوسەمى اياتوللا حامەنەيدىڭ مۇراگەرىن تاڭدايتىن دا سياقتى.
قىسقا قايىرىپ ايتقاندا:
كابۋلدە تەررورشىلاردىڭ شابۋىلىنان وننان استام ادام قازا تاپتى. ەلدىڭ ءىىم ءباسپاسوز حاتشىسىنىڭ مالىمدەۋىنشە, تەررورشىلار شابۋىلىنا شاعىن اۆتوبۋسپەن كەلە جاتقان اپەللياتسيالىق سوتتىڭ قىزمەتكەرلەرى ۇشىراعان.
«AL Arabiya» تەلەارناسى اقش-تىڭ 250-گە جۋىق تەڭىز جاياۋ اسكەرلەرى سيريانىڭ حاسەكە قالاسىنىڭ ماڭىنا تۇسىرىلگەنىن حابارلادى. ونىڭ قۇرامىندا اۋىر تەحنيكالار دا بار. ولار راككي قالاسىن سودىرلاردان بوساتۋ وپەراتسياسىنا قاتىساتىن بولۋى كەرەك.
يتاليانىڭ فلورەنتسيا جاعالاۋىندا اۆتوتۇراققا قويىلعان 20-عا جۋىق اۆتوموبيل جەردىڭ وپىرىلۋىنان پايدا بولعان شۇڭقىرعا قۇلادى. شۇڭقىردىڭ ۇزىندىعى – 20, ال ەنى – 7 مەتر. زارداپ شەككەندەر جوق.
تاجىكستاندا مەكتەپ تۇلەكتەرىنە ارنالعان مەرەكە – سوڭعى قوڭىراۋدى وتكىزۋگە تىيىم سالىندى. ءبىلىم جانە عىلىم ءمينيسترىنىڭ بۇيرىعىندا «بارلىق ءبىلىم بەرۋ مەكتەپتەرىندە 9 جانە 11 سىنىپ تۇلەكتەرىنە ارنالعان «سوڭعى قوڭىراۋ» جيىنىن وتكىزۋگە تىيىم سالىنسىن», – دەپ كورسەتىلگەن.
قىتاي سۋداندا اتوم رەاكتورىن سالماق
قىتايدىڭ مەملەكەتتىك يادرولىق بىرلەستىگى سۋدان رەسپۋبليكاسىنىڭ سۋ رەسۋرستارى جانە ەلەكترلەندىرۋ مينيسترلىگىمەن قۋاتى 600 مەگاۆاتت بولاتىن اتوم رەاكتورىنىڭ قۇرىلىسى تۋرالى ەكى كەلىسىمگە قول قويدى.
قىتايلىق «China Daily» باسىلىمىنىڭ جازۋى بويىنشا, تاراپتار جاسالعان كەلىسىمدەردىڭ قۇنىنىڭ قانشا ەكەندىگى جانە سالىناتىن رەاكتوردىڭ ۇلگىسى, سونداي-اق, ونى تاپسىرۋدىڭ مەرزىمى جونىندە ناقتى اقپارات جوق. ساراپشىلار بۇل قىتاي ەلىندە ازىرلەنگەن ءۇشىنشى بۋىن Hualong One رەاكتورى بولادى دەگەن بولجام جاساپ وتىر. CNNC باسشىسى سۋن تسين وسىدان ءبىراز ۋاقىت بۇرىن اتالعان بىرلەستىك 2030 جىلعا قاراي الەمنىڭ بىرقاتار ەلدەرىندە «جىبەك جولىنىڭ ەكونوميكالىق بەلدەۋى» ستراتەگياسىنىڭ اياسىندا 30 اتوم ەنەرگيالىق بلوگىن سالۋدى جوسپارلاپ وتىرعانىن ايتقان ەدى.
ساتقىندىق جاساعانى ءۇشىن تۇتقىندالدى
يتاليانىڭ استاناسى – ريمدە رەسەي جاعىنا تىڭشىلىق ارەكەتتەر جاسادى دەگەن كۇدىكپەن پورتۋگاليا بارلاۋ قىزمەتىنىڭ وفيتسەرى مەن رەسەيلىك ازامات تۇتقىندالدى. اقپارات اگەنتتىكتەرىنىڭ حابارلاۋىنشا, رەسەيلىك پورتۋگاليالىقتان ناتو مەن ەۋرووداق تۋرالى قۇپيا اقپاراتتاردى ساتىپ الماق بولعان.
RTP مالىمەتتەرىنە قاراعاندا, وپەراتسيا يتاليالىق جانە پورتۋگاليالىق كۇشتەردىڭ, سونداي-اق, ەۋرويۋست قىزمەتكەرلەرىنىڭ قاتىسۋىمەن جۇزەگە اسىرىلعان. كۇدىكتىلەر جاقىن كۇندەرى ليسسابونعا بەرىلەدى. پورتۋگاليالىق ازامات ەندى مەملەكەتتىك قۇپيانى جاريا ەتكەنى ءۇشىن قىلمىستىق جاۋاپكەرشىلىككە تارتىلادى. دەرەك كوزدەرى بويىنشا, ەكى ازامات تا ناقتى ءىس ۇستىندە, ياعني پورتۋگاليا بارلاۋشىسى رەسەيلىككە قۇپيا مالىمەتتەردى بەرىپ جاتقان كەزدە قولعا تۇسكەن. تۇتقىندالعان پورتۋگاليالىقتىڭ اتى-ءجونى – فرەدەريكو كارۆاليۋ. ول ەلدىڭ مەملەكەتتىك قاۋىپسىزدىگى مەن سىرتقى بارلاۋعا جاۋاپتى قۇرىلىم – اقپارات جانە قاۋىپسىزدىك قىزمەتى جەتەكشىلەرىنىڭ ءبىرى سياقتى.
ءبىر ايەلدى ەكى ەر ادامعا ايىرباستادى
رەسەي تۇرمەسىندە جازاسىن وتەپ جاتقان ۋكراينالىق اسكەري قىزمەتشى نادەجدا ساۆچەنكونىڭ ادۆوكاتى يليا نوۆيكوۆ جاقىن ۋاقىتتا ساۆچەنكونىڭ تاعدىرى تۋرالى ماڭىزدى اقپارات ايتىلاتىنىن مالىمدەگەن ەدى.
«مەن قازىر دونداعى روستوۆتامىن. ەندى ەكى-ءۇش ساعاتتان كەيىن نادەجدا ساۆچەنكو جونىندە ماڭىزدى جاڭالىق ايتىلادى», – دەپ اتاپ وتكەن-ءدى ي.نوۆيكوۆ. بۇدان بۇرىن بىرقاتار اگەنتتىكتەر ۋكراينا پرەزيدەنتى پەتر پوروشەنكونىڭ ۇشاعى سارسەنبىگە قاراعان ءتۇنى دونداعى روستوۆقا كەلگەنىن حابارلاعان ەدى. بۇل اقپارات راس بولىپ شىقتى. سونداي-اق, «ينتەرفاكس» اگەنتتىگى ۋكراينادا سوتتالعان رەسەيلىكتەر – ە.ەروفسەۆ پەن ا.الەكساندروۆ بار پرەزيدەنتتىك بورت كيەۆتەن ۇشىپ شىققانى جونىندە اقپارات تاراتتى. سەنىمدى دەرەك كوزدەرىنە قاراعاندا, ەكى ەلدىڭ اسكەريلەرىن ايىرباستاۋ ءراسىمى دونداعى روستوۆ قالاسىنىڭ اۋەجايىندا وتكەن.
ينتەرنەت ماتەريالدارى نەگىزىندە ازىرلەندى