ەڭبەك ەتەمىن دەگەن ادامعا جاڭاشا مۇمكىندىك بەرەدى

سوڭعى كەزدەرى قو­عام­نىڭ كەيبىر توپتارىن جەر ماسەلەسى ورىنسىز الاڭداتىپ وتىر. بۇل جاعدايعا كوڭىل اۋدارىپ, الاڭداۋشىلىق ءبىلدىرىپ جاتقانداردى تۇسىنۋگە دە بولادى. ەل مەن جەردىڭ تاعدىرىنا بەي-جاي قاراماي, ەركىن ەلدىڭ ۇلاندارى ءوز ويلارىن, پىكىرلەرىن اشىق ءبىلدىرىپ جاتقانى دا ءجون شىعار. ويتكەنى, جەر دەگەنىمىز قازاقتىڭ جانى. ۇلتىمىزدىڭ باستى بايلىعى سانالاتىن وسىناۋ ۇلان-بايتاق جەرىمىزدى حالقىمىز تۋعان اناسىنان كەم كورمەيدى. ايتسە دە, بۇل ماسەلەدەگى تۇسىنبەستىك, جاعدايدى تەرەڭىرەك بىلمەۋشىلىك ءالى دە ءبىزدىڭ كەيبىر ازاماتتارىمىزدى شاتاس­تىرىپ جاتقان سياقتى. كەشە عانا استانا تورىندە وتكەن قازاقستان حالقى اسسامبلەياسىنىڭ ءححىV سەسسياسىندا ەلباسىمىز نۇرسۇلتان نازارباەۆ سوڭعى كەزدەرى قازاقستاننىڭ جەرىن شەتەلدىكتەرگە ساتۋ تۋرالى جالعان اقپاراتتىڭ ۇدايى تاراتىلۋى سالدارىنان جەر ماسەلەسىنە قاتىستى الاڭداۋشىلىق كوبەيگەنىن قاداپ ايتتى. «مۇنىڭ شىندىققا جاناسپايتىنى بىرنەشە رەت ءتۇسىندىرىلدى. تاعى دا ايتقىم كەلەدى – اۋىل شارۋاشىلىعى جەرلەرىن شەتەل ازاماتتارىنا جانە كومپانيالارىنا ساتۋ تۋرالى ماسەلە جوق, تالقىلانبايدى دا. بۇل تاقىرىپتىڭ توڭىرەگىندەگى الىپ-قاشپا اڭگىمەنىڭ ءبارى نەگىزسىز. ءبىزدىڭ ماقسات – اۋىل شارۋاشىلىعىمەن اينالىساتىندارعا جەكەمەنشىگىنە جەر الۋ مۇمكىندىگىن بەرۋ. ەگەر ولار جەرگە يەلىك ەتەتىن بول­سا, ونى كۇتىپ-باپتاپ, قادىر­لەيتىن بولادى. جەر – اتا-بابامىزدان مۇراعا قالعان ءبىزدىڭ باس­تى باي­لىعىمىز», – دەدى قا­زاق­ستان پرەزيدەنتى. مىنە, ەلباسىنىڭ وسى ءسوزى بۇل ماسەلەنىڭ ءتۇيىنىن تارقاتىپ بەرگەندەي. ەلباسى ايتقانداي, جەر جالعا بەرىلۋىن قولدايمىن. شىنىندا جەر بوس جاتپاۋى ءتيىس. ول تابىس اكەلۋى قاجەت. سوندىقتان بۇل قادام جەرگە, ەلگە دەگەن جاناشىرلىقتان تۋىنداپ وتىرعانى انىق. بۇل قادام ەڭبەك ەتەمىن, جەردەن نەسىبە تابامىن دەگەن جاندارعا جاڭاشا مۇمكىندىك بەرەدى. ايتسە دە, ءار نارسەگە بايىپپەن قاراۋ قاجەت. جەر – ەشقاشاندا سىبايلاس جەمقورلاردىڭ ساۋداسىنا اينالماۋى ءتيىس. ەلىمىزدە تاۋەلسىزدىك تۋىنىڭ جەلبىرەگەنىنە 25 جىلعا اياق باستى. وسىناۋ 25 جىلدىڭ باستى جاڭالىعى – جاڭا سانا قالىپتاستى. جان-جاقتى ويلايتىن جاستارىمىز ءوسىپ كەلەدى. مىنە, سول جاستاردىڭ جەرگە دەگەن, جەر وڭدەۋگە دەگەن قىزىعۋشىلىعىن ارتتىرۋىمىز كەرەك. قاشانعى ەلدىڭ ءبارى زاڭگەر, قارجىگەر, بيزنەسمەن بولا بەرسىن؟! جاستاردىڭ ەڭبەك ەتۋگە دەگەن ىقىلاسىن وياتۋ قاجەت. وسى جاعىنان كەلگەندە ەلىمىزدە قولعا الىنعالى وتىرعان بۇل باستامانى قولداۋعا ابدەن بولادى. ارعىنباي بەكبوسىن, جازۋشى, قازاقستاننىڭ ەڭبەك سىڭىرگەن قايراتكەرى تاراز