اقتوبە. 28 ءساۋىر. اقتوبە قالاسىنداعى «يۋرتا» مەيرامحاناسىندا «ايەلدەردىڭ قۇقىقتارى مەن مۇمكىندىكتەرىن كەڭەيتۋ» اتتى بۇۇ-نىڭ قازاقستانداعى دامۋ باعدارلاماسى جانە قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق- دەموگرافيالىق ساياسات جونىندەگى ۇلتتىق كوميسسيا جوباسىنىڭ اياسىندا «نەو فولكلور» كيىم ديزاينەرلەرى مەن «ۇمىتىلىپ بارا جاتقان جانە جاڭعىرتىلعان ۇلتتىق تاعامدار» قالالىق بايقاۋلارى ءوتتى. بۇل تۋرالى egemen.kz ءتىلشىسى حابارلادى.
بايقاۋلاردى قالالىق اكىمدىك جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا مەن قالالىق مادەنيەت جانە تىلدەردى دامىتۋ, كاسىپكەرلىك بولىمدەرى ۇيىمداستىردى. شارانىڭ ماقساتى — قازاقتىڭ ۇلتتىق ءداستۇرىن ناسيحاتتاۋ, «استانا —ەكسپو-17» حالىقارالىق كورمەسىنە ايەلدەر قاۋىمىنىڭ قاتىسۋىنا ىقپال ەتۋ بولىپ تابىلادى. «ۇمىتىلىپ بارا جاتقان جانە جاڭعىرتىلعان قازاق ۇلتتىق تاعامدارى» بايقاۋىنىڭ ماقساتى قازاق ۇلتتىق تاعامدارىن ساقتاپ قالۋ جانە كوپعاسىرلىق داستۇرلەرىن ناسيحاتتاۋ, ۇمىتىلا باستاعان تاعامداردى قايتا جاڭعىرتا وتىرىپ, جاڭا زاماناۋي تاعامداردى ازىرلەۋ بولىپ تابىلادى.
«نەو-فولكلور» كيىمدەر ديزاينەرلەرى بايقاۋىنىڭ ماقساتى قازاقتىڭ ۇلتتىق كيىمدەرىنىڭ بىرەگەي قۇندىلىقتارىنا, ونىڭ قازىرگى ءسان ۇلگىسىنىڭ ۇردىستەر ۇيلەسىمدىلىگىنە سايكەس ەتنيكالىق-تۇرمىستىق قۇندىلىعى مەن الۋاندىلىعىنا نازار اۋدارۋ. اتالعان بايقاۋلارعا وقۋ ورىندارىنىڭ وكىلدەرى, جەكە كاسىپكەرلەر, قالانىڭ تىگىن شەبەرحانالارى مەن مەيرامحانالارى قاتىستى.
اسپازدىق بايقاۋ قاتىسۋشىلارى قازىلار القاسى مەن بايقاۋ قوناقتارىنا ۇلتتىق تاعامدار مەن بۇيىمداردىڭ كونە رەتسەپتۋرالارىن, سونداي-اق ولاردى دايىنداۋدىڭ ءداستۇرلى تەحنولوگياسىن كورسەتتى.
ديزاينەرلەر ۇلتتىق كولوريتتى ساقتاۋ جانە ۇسىنۋ ارقىلى مودەلدەۋ, كيىم ستيلدەرى بويىنشا جوعارى كاسىبي دەڭگەيلەرىن, باسەكەگە قابىلەتتىلىگىن راستاۋ مۇمكىندىگىنە يە بولى.
«ۇمىتىلىپ بارا جاتقان جانە جاڭعىرتىلعان قازاق ۇلتتىق تاعامدارى» بايقاۋى بويىنشا ءبىرىنشى ورىندى «يۋرتا» مەيرامحاناسى, ەكىنشى ورىندى اقتوبە تەحنيكالىق كوللەدجىنىڭ ارنايى پاندەر وقىتۋشىسى جانسايا قاراتاەۆا مەن اقتوبە سەرۆيس كوللەدجىنىڭ وڭدىرىستىك وقىتۋ شەبەرى تويدىق تۇگەلوۆا, ءۇشىنشى ورىندى «جاس وتاۋ» كافەسى جەڭىپ الدى. «نەو-فولكلور» كيىمدەر ديزاينەرلەرى بايقاۋىندا ءبىرىنشى ورىندى س.بايىشەۆ اتىنداعى اقتوبە ۋنيۆەرسيتەتىنىڭ كوللەدجىنىڭ وقىتۋشىسى گۋلناز جۇلكەروۆا, ەكىنشى ورىندى جەكە كاسىپكەر م.دۇيسەنباەۆا, ءۇشىنشى ورنىدى اقتوبە سەرۆيس كوللەدجىنىڭ ستۋدەنتى ۆياچەسلاۆ كوجەۆنيكوۆ يەلەندى.
بايقاۋلار جەڭىمپازدارىنا قارجىلاي سىيلىقتار, قالا اكىمىنىڭ اتىنان ديپلومدار تابىستالىپ, قالالىق كەزەڭنىڭ جەڭىمپازدارى وبلىستىق كەزەڭگە بجولداما الدى.
ساتىبالدى ءساۋىرباي.
دەرەك, فوتو: egemen.kz
