قاراعاندى. 28 ءساۋىر. قاراعاندىلىق بالۋان بەكزات احمەتبەكوۆ وڭتۇستىك قازاقستان وبلىسىندا قازاق كۇرەسىنەن وتكەن جارىستا اۆتوكولىك ۇتىپ الدى. بۇل تۋرالى وبلىستىق دەنە شىنىقتىرۋ جانە سپورت باسقارماسىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
جەتىساي اۋىلىندا قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى باقىت جامبىرباەۆتىڭ جۇلدەسى ءۇشىن قازاق كۇرەسىنەن وتكەن رەسپۋبليكالىق تۋرنيردە قاراعاندىلىق بالۋان بەكزات احمەتبەكوۆ اسا اۋىر سالماقتا باس جۇلدەگە تىگىلگەن Mersedes اۆتوكولىگىن جەڭىپ الدى.
سونداي-اق, قاراعاندىلىق بالۋاندار ناريمان تۇتقىشەۆ (55 كيلو), ايدوس عالىموۆ (74 كيلو) جانە ەرسىن مۇحامەدجانوۆ تا (100 كيلو) ءوز سالماق دارەجەلەرىندە چەمپيون اتاندى.
ايتا كەتەيىك, اتالعان دوداعا وزبەكستان, قىرعىزستان, تاجىكستان جانە قازاقستاننان 240 بالۋان قاتىسىپ, كۇش سىناسقان بولاتىن.
قايرات ءابىلدينوۆ.
دەرەك, فوتو: قاراعاندى وبلىستىق دەنە شىنىقتىرۋ جانە سپورت باسقارماسىنىڭ ءباسپاسوز قىزمەتى.
