اسحات داۋىلباەۆ جاڭا قىزمەتكە تاعايىندالدى

استانا. 27 ءساۋىر. اسحات داۋىلباەۆ قازاقستان رەسپۋبليكاسى كونستيتۋتسيالىق كەڭەس مۇشەسى قىزمەتىنە تاعايىندالدى. بۇل تۋرالى inform.kz-كە سىلتەمە جاساعان egemen.kz ءتىلشىسى حابارلادى. بۇگىن پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى اسحات داۋىلباەۆتى كونستيتۋتسيالىق كەڭەس مۇشەسى قىزمەتىنە تاعايىنداۋ تۋرالى قاۋلى قابىلدادى. ەسكە سالا كەتەيىك, جاقىندا پرەزيدەنت نۇرسۇلتان نازارباەۆتىڭ جارلىعىمەن اسحات قايزوللا ۇلى داۋىلباەۆ باسقا جۇمىسقا اۋىسۋىنا بايلانىستى باس پروكۋرور قىزمەتىنەن بوساتىلعان بولاتىن. كونستيتۋتسياعا سايكەس, پارلامەنتتىڭ ءار پالاتاسى كونستيتۋتسيالىق كەڭەس مۇشەسىن قىزمەتكە تاعايىندايدى. سونىمەن قاتار, اتالعان لاۋازىمدى پالاتا توراعاسى ۇسىنادى. وسىعان بايلانىستى ءماجىلىس توراعاسى باقتىقوجا ىزمۇحامبەتوۆ اسحات داۋىلباەۆتىڭ كانديداتۋراسىن ۇسىنعان بولاتىن. ول قۇقىق قورعاۋ سالاسىندا, ونىڭ ىشىندە پروكۋراتۋرا ورگانىندا كوپ جىلدار بويى ەڭبەك ەتكەن بىلىكتى ءارى تاجىريبەلى تۇلعا. اسحات داۋىلباەۆ 1987 جىلى سۆەردلوۆسك زاڭ ينستيتۋتىن ۇزدىك بىتىرگەننەن سوڭ ەڭبەك جولىن الماتى قالاسىنىڭ وكتيابر اۋدانى پروكۋراتۋراسىندا تاعىلىمدامادان ءوتۋشى, تەرگەۋشى, پروكۋروردىڭ كومەكشىسى قىزمەتىنەن باستاعان. 1990-1994 جىلدارى الماتى قالاسىنىڭ بىرقاتار اۋداندارىندا پروكۋروردىڭ ورىنباسارى, الماتى قالاسى تورەلىك سوت توراعاسىنىڭ ورىنباسارى سەكىلدى قىزمەتتەردى اتقاردى. 1997 جىل ادىلەت ۆيتسە-ءمينيسترى بولدى. 2001 جىلى باس پروكۋروردىڭ ورىنباسارى بولىپ تاعايىندالىپ, ول لاۋازىمدا 2011 جىلدىڭ ساۋىرىنە دەيىن قىزمەت جاسادى. 2011-2016 جىلدارى باس پروكۋرور بولدى. تالعات رايىمبەك. دەرەك, فوتو: inform.kz.