ءتيىمدى سەرىكتەستىك كەلىسىم

قازىر سىبايلاس جەمقورلىققا قارسى ءىس-قيمىل امالدارى كۇننەن-كۇنگە جاندانىپ كەلەدى. سونىڭ ءبىرى رەتىندە كەشە «استانا ەكسپو-2017» ۇلتتىق كومپانياسى مەن سىبايلاس جەمقورلىققا قارسى ءىس-قيمىل ۇلتتىق بيۋروسى اراسىندا سەرىكتەستىك كەلىسىمىنە قول قويىلدى. وسىعان وراي ەندى «استانا ەكسپو-2017» ۇك» اق قىز­مەتىنىڭ اشىقتىعىن قامتاماسىز ەتۋ, سونداي-اق, سىبايلاس جەمقورلىق مادەنيەتىن قالىپتاستىرۋ بويىنشا ءارى جەمقورلىقتى جويۋعا ىقپال ەتۋ مەن الەۋمەتتىك جاۋاپكەر­شىلىكتى ارتتىرۋ ءۇشىن ەكى جاق تىعىز قارىم-قاتىناستا جۇمىس ىستەيتىن بولادى. بۇل جونىندەگى قۇجاتقا ۇلتتىق كومپا­نيا باسقارما توراعاسى احمەتجان ەسىموۆ پەن سىبايلاس جەمقورلىققا قارسى ءىس-قي­مىل ۇلتتىق بيۋروسىنىڭ توراعاسى قايرات قوجامجاروۆ قول قويدى. «ءبىز ءۇشىن جەمقورلىقتىڭ قانداي دا ءبىر بەلگىلەرى تۋراسىندا ءوزارا اقپارات الماسۋ ماسەلەسى ماڭىزدى. سونىمەن قاتار, بىرلەسكەن جۇمى­سىمىز قوعام قىزمەتكەرلەرى تاراپىنان جەمقورلىق قۇقىق بۇزۋشىلىقتىڭ الدىن-الۋعا, سونداي-اق جوسىقسىز كومپانيالارمەن كەلىسىمشارتتار جاساسۋعا جول بەرمەۋ­گە باعىتتالعان. مۇنىڭ بارلىعى ۇلتتىق بيۋرو مەن ۇلتتىق كومپانيانىڭ كوزدەگەن ماقساتتارىنا سايكەس كەلەدى», – دەدى قايرات قوجامجاروۆ. وسى رەتتە, قايرات قوجامجاروۆ كەلىسىمگە قول قويۋ باستاماسى ءۇشىن احمەتجان ەسىموۆكە ريزاشىلىعىن ءبىلدىردى. ال احمەتجان ەسىموۆ, ەكسپو – ەلباسى باستاماسىمەن قولعا الىنعان تاۋەلسىز قازاقستان تاريحىنداعى ەڭ اۋقىمدى ءارى وراسان جوبا دەي كەلە: – «بۇگىن ءبىز وسىندا جوباعا قاتىسۋشى بارلىق كومپانيالار­دى, باس مەردىگەرلەرىمىزدى شاقىردىق. بۇل بىرەۋلەردى قورقىتۋ ءۇشىن ەمەس, قۇقىق بۇزۋشىلىققا جول بەرمەۋ ءۇشىن جاسالىپ وتىر. ءبىزدىڭ سىبايلاس جەمقورلىققا قارسى وكىلدىك جۇمىسى ناعىز وسى قۇقىق بۇزۋشىلىقتىڭ الدىن الىپ, وعان جول بەرمەۋگە باعىتتالعان. ەڭ باستىسى, بيزنەس نە قالايتىنىن, مەملەكەتتىڭ نە قالايتىنىن ءتۇسىنۋىمىز قاجەت. البەتتە, بيزنەس بارىنشا كوپ پايدا تابۋعا, ال مەملەكەت قازىرگى جاعدايدى ەسكەرسەك, شىعىنداردى ازايتۋدى قالايدى», – دەپ اتاپ ءوتتى. «استانا ەكسپو-2017» ۇلتتىق كومپا­نياسىنىڭ باسشىسى احمەتجان ەسىموۆ قول قويىلعان مەموراندۋمنىڭ تەك رەسمي سيپاتتا عانا بولمايتىندىعىن دا ەسكە سالدى. قۇجات اشىقتىق پەن جاريالىلىق قاعيداتتارى بويىنشا جاسالعان بىرلەسكەن ءارى كەلىسىلگەن ءىس-قيمىل نەگىزىندە سەرىكتەستىكتىڭ تيىمدىلىگىنە ىقپال ەتەتىن بولادى. الەكساندر تاسبولاتوۆ, «ەگەمەن قازاقستان»