ىنتىماقتاستىقتىڭ جاڭا كوكجيەكتەرى

جاقىندا ۆارشاۆادا قازاقستان-پولشا ەكونوميكالىق ىنتىماقتاستىق جونىندەگى ۇكىمەتارالىق كوميسسياسىنىڭ 7-ءشى وتىرىسى ءوتتى. قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى رومان ۆاسيلەنكو باسقارىپ بارعان قازاقستاندىق دەلەگاتسيانىڭ قۇرامىنا «Kaznex Invest» ەكسپورت جانە ينۆەستيتسيالار جونىندەگى ۇلتتىق اگەنتتىگى» اق, «استانا» حالىقارالىق قارجى ورتالىعى, «قازاتو» حالىقارالىق اۆتوكولىكپەن تاسىمالداۋشىلار وداعى جانە باسقا مۇددەلى ۇيىمداردىڭ باسشىلارى كىردى. قازاقستان-پولشا اراسىنداعى ەكونوميكالىق, يندۋستريالىق-يننوۆاتسيالىق جانە اگرارلىق ىنتىماقتاستىقتى دامىتۋدىڭ كەلەشەگى, كولىك جانە لوگيستيكا, تۋريزم, ەكولوگيا, تۇرعىن ءۇي جانە ءوندىرىس سالالارىنداعى جاڭا ماقسات-مۇراتتار, پولياك بيز­نەسىنىڭ قازاقستانداعى جەكەشەلەندىرۋدىڭ ەكىنشى كەزەگىنە قاتىسۋعا قىزىعۋشىلىعى كوميسسيا وتى­رىسىنىڭ نەگىزىن قالاپ, ونىڭ كۇن ءتارتىبىن ايقىندادى. تاراپتار ساۋدا سەرىكتەستىگى جانە جاڭا بىرلەسكەن ينۆەستيتسيالىق جوبالاردى جۇزەگە اسىرۋ بويىنشا جوسپارلارىن بەكىتتى. وتىرىس شەڭبەرىندە پولياك كومپانيالارى مەن ۇيىمدارىنىڭ قاتىسۋىمەن بيزنەس-سەمينار ءوتىپ, ونىڭ بارىسىندا قازاقستاننىڭ ەكونوميكالىق ساياساتىنىڭ قۇرالدارى, ونىڭ ىشىندە مەملەكەت-جەكەمەنشىك سەرىكتەستىگى, ەكسپو-2017 حالىقارالىق مامانداندىرىلعان كورمەسى مەن «استانا» حالىقارالىق قارجى ورتالىعى بويىنشا تانىستىرىلىمدار وتكىزىلدى. ر.ۆاسيلەنكو قازاقستان-پولشا ىسكەرلىك ىنتىماق­تاستىعىن ورىستەتۋدىڭ قۇقىقتىق جانە پراكتيكالىق نەگىزدەرىنە توقتالىپ, الداعى 1 مامىردان ۋاقىتشا كۇشىنە ەنەتىن قازاقستان مەن ەو اراسىنداعى كەڭەي­تىلگەن سەرىكتەستىك پەن ىنتىماقتاستىق تۋرالى كەلىسىمنىڭ ارتىقشىلىقتارى مەن مۇمكىندىكتەرى تۋرالى, سونداي-اق, «100 ناقتى قادام» ۇلت جوسپارى شەڭبەرىندەگى ۇكىمەتتىڭ مىندەتتەرى مەن باسىمدىقتارى بويىنشا اقپاراتتارمەن ءبولىستى. كوميسسيانىڭ تەڭ-توراعالارى ر.ۆاسيلەنكو مەن پولشانىڭ دامۋ ۆيتسە-ءمينيسترى ر.دوماگالسكي-لابەندزكي 2016-2017 جىلدار قازاقستاننىڭ دسۇ-عا مۇشە بولۋىنا بايلانىستى بىرقاتار باسىمدى ەكىجاقتى جوبالاردى دامىتۋ مەن ىسكە اسىرۋدا, قازاق­ستاننىڭ ەىدۇ-عا مۇشە بولۋى مەن الەمنىڭ ەڭ دامىعان 30 مەملەكەتى قاتارىنا كىرۋى بويىنشا بەلگىلەن­گەن ماقساتتار مەن مىندەتتەر, پولشانىڭ ەكسپو-2017 كورمەسىنە قاتىسۋى جانە باسقا بىرلەس­كەن جوبالار ءۇشىن ەرەكشە مانگە يە بولاتىنىن اتاپ ءوتتى. پولياك تارابى قازاقستاننىڭ تۇراقتى ەكونوميكالىق دامۋدى قامتاماسىز ەتۋىن, جۇيەلى رەفورمالاردى ىسكە اسىرۋ مەن ەۋروپالىق جانە حالىقارالىق قارجى-ەكونو­ميكالىق قۇرىلىمدارمەن ىقپالداستىعىن جوعارى باعالاپ, استانا ەكونوميكالىق فورۋمىنا جوعارى دەڭگەيلى ۇكىمەتتىك دەلەگاتسياسى قاتىساتىنىن ايتتى. پولشا – قازاقستاننىڭ 1,35 ملرد. اقش دوللارى كولەمىندە تاۋار اينالىمى بار ورتالىق ەۋروپاداعى نەگىزگى ساۋدا-ەكونوميكالىق سەرىكتەسى. پولشانىڭ ورتالىق ازيامەن سىرتقى ساۋداسىنىڭ 70 پايىزدان استامى ءبىزدىڭ ەلىمىزدىڭ ۇلەسىندە (سوڭعى 15 جىل ىشىندە ەكىجاقتى ساۋدا كولەمى 10 ەسە ارتتى). پر پولشانىڭ ۇكىمەتتىك باعدارلاماسىندا ەۋرازيالىق كەڭىستىك مەملەكەتتەرى اراسىنان جانە برازيليا, كانادا, ءتۇر­كيا مەن الجير ءتارىزدى ەكونوميكالىق ىقپالداستىق تۇرعىسىنان ماڭىزدى ەلدەر قاتارىندا قازاقستان باسىمدى ەكونوميكالىق نارىق رەتىندە بەكىتىلگەن. قازاقستاندىق دەلەگاتسيانىڭ ۆارشاۆاعا ساپارى شەڭبەرىندە ر. ۆاسيلەنكونىڭ پولشانىڭ سىرتقى ساياسات ۆەدومستۆوسى باسشىسىنىڭ ورىنباسارى مارەك جيۋلكوۆسكيمەن كەزدەسۋى ءوتىپ, ونىڭ بارىسىندا وزەكتى ەكىجاقتى جانە حالىقارالىق ماسەلەلەر بويىنشا ەگجەي-تەگجەيلى پىكىر الماسۋ بولدى. ساۋلەبەك ءبىرجان