بيزنەستى ترانسفورماتسيالاۋعا جوعارى باعا

جاقىندا «قازاقستان تەمىر جولى» ۇك» اق ديرەكتورلار كەڭەسى مۇشەلەرىنىڭ قاتىسۋىمەن كومپانيانىڭ بيزنەستى ترانسفورماتسيالاۋ باعدارلاماسىن جۇزەگە اسىرۋدىڭ قورىتىندىلارىنا ارنالعان ءماجىلىس بولىپ ءوتتى. ءماجىلىس بارىسىندا «قازاقستان تەمىر جولى» ۇك» اق-تىڭ اتالعان باعدارلاماسىنىڭ مەنەدجەرى تالعات يمانوۆ جوبالاۋ كومانداسى اتقارعان جۇمىس تۋرالى قىسقاشا ايتىپ بەردى. «ءبىرىنشى كەزەڭ اياسىندا بارلىق بيزنەس-ۇدەرىستەردىڭ, 1 جانە 2-دەڭگەيدەگى ديزاين-ۇدەرىستەردىڭ دياگنوس­تيكاسى قاراستىرىلىپ, بيزنەس-ارحيتەكتۋراسىنىڭ تۇجىرىمداماسى قالىپتاستىرىلدى. ەكىنشى كەزەڭ شەڭبەرىندە بيزنەس-باستامالارعا تالداۋ جاسالىپ, جوبالاردىڭ پورتفەلى جاساقتالدى, سونداي-اق, قاجەتتى رەسۋرستارعا, ينۆەستيتسيالار مەن كۇتىلەتىن تيىمدىلىككە باعالاۋ جۇرگىزىلدى», دەپ حابارلادى  ت.يمانوۆ. «قازاقستان تەمىر جولى» ۇك» اق ديرەكتورلار كەڭەسىنىڭ توراعاسى اداماس يلكياۆيچيۋس اتاپ كورسەتكەندەي, ۇلكەن جۇمىستار جۇرگىزىلگەن. كومپانيا كوممەرتسيالىق ارناعا كوشۋدىڭ جاڭا باعىتىمەن سەنىمدى ءجۇرىپ كەلەدى. كورپوراتيۆتى دامۋ جونىندەگى باسقارۋشى ديرەكتور – ترانسفورماتسيالار باعدارلامالارىنىڭ دەمەۋشىسى ەركىن جۋسانباەۆ كومپانيانىڭ وسى باعىتقا 2000 جىلدان – تەمىرجول كولىگىن رەفورمالاۋ مەملەكەتتىك باعدارلاماسى مەن «تەمىرجول كولىگى تۋرا­لى» قازاقستان رەسپۋبليكاسىنىڭ زاڭى قابىلدانعان كەزدەن باستاپ تۇسكەنىن اتاپ ءوتتى. «قتج-نىڭ» 2016-2018 جىلدارعا ارنالعان ترانسفورماتسيالاۋ جونىندەگى جول كارتاسىنا 27 جوبا ەنەدى. ديرەكتورلار كەڭەسىنىڭ مۇشەلەرىنە لوگيستيكا مەن جۇك تاسىمالداۋداعى, ساۋدا-ساتتىق پەن وپەرا­تسيالىق قىزمەتتەگى, اكتيۆتەر مەن ساتىپ الۋلار باسقار­ماسىنداعى باستى وزگەرىستەر كولدەنەڭ تارتىلدى. كەزدەسۋ كونسترۋكتيۆتى ۇنقاتىسۋ پىشىمىندە ءوتىپ, تالقىلانعان ماسەلەلەر بويىنشا وتە تىعىز پىكىر الماسۋلارعا جالعاستى. «قازاقستان تەمىر جولى» ۇك» اق ديرەكتورلار كەڭەسىنىڭ مۇشەلەرى كومپانيا قىزمەتىندەگى كەڭ اۋقىمدى وزگەرىستەردى جۇزەگە اسىرۋ بويىنشا اتقارىلىپ جاتقان شارالار كەشەنىنە تولىق قولداۋ ءبىلدىرىپ, جاسالعان جۇمىسقا جوعارى باعا بەردى.   «ەگەمەن-اقپارات»