قاراعاندىدا دەپارتامەنت باسشىسى تاعايىندالدى

قاراعاندى. 29 ناۋرىز. قاراعاندى وبلىستىق توتەنشە جاعدايلار جونىندەگى دەپارتامەنتتىڭ باسشىسى بولىپ يبراگيم كۇلشىمباەۆ تاعايىندالدى. بۇل تۋرالى ۆەدومستۆونىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. جاڭا باسشىنى قاراعاندى وبلىستىق توتەنشە جاعدايلار دەپارتامەنتىنىڭ جەكە قۇرامىنا ىشكى ىستەر مينيسترلىگىنىڭ توتەنشە جاعدايلار كوميتەتىنىڭ توراعاسى ۆلاديمير بەككەر تانىستىردى. يبراگيم داۋكەس ۇلى كۇلشىمباەۆ قاراعاندى وبلىسىنىڭ نۇرا اۋدانىنداعى امانتاۋ اۋىلىندا دۇنيەگە كەلگەن. 1994 جىلى قاراعاندى پوليتەحنيكالىق ينستيتۋتىن «اۆتوكولىك جانە اۆتوكولىك شارۋاشىلىعى» ماماندىعى, ينجەنەر-مەحانيك بىلىكتىلىگى بويىنشا تامامداعان. 2004 جىلى رەسەي توتەنشە جاعدايلار كوميتەتىنىڭ ازاماتتىق قورعانىس اكادەمياسىن ءبىتىرىپ, «ازاماتتىق قورعاۋ جەدەل-تاكتيكالىق كوماندالىق-شتابتىق» ماماندىعىن الىپ شىقتى. جاڭا باسشى ازاماتتىق قورعاۋ سالاسىندا مول تاجىريبە جيناقتاعان. 1995 جىلى ينستيتۋتتى تامامداعان سوڭ, سەمەي وبلىسىنداعى اسكەري ءبولىمنىڭ تانك ۆزۆودىندا قىزمەت ەتكەن. 2009-2013 جىلدار ارالىعىندا قازاقستان رەسپۋبليكاسىنىڭ توتەنشە جاعدايلار مينيسترلىگىنە قاراستى № 52859 اسكەري ءبولىمدى باسقاردى. يبراگيم كۇلشىمباەۆ ورمان ورتتەرىن سوندىرۋگە, وڭتۇستىك قازاقستاندا سىرداريا ارناسىنداعى كوكساراي بوگەتىنىڭ قۇرىلىسىن سالۋعا, قاراعاندىداعى «بەسوبا» تۇرعىن ءۇي كەشەنىندە قۇلاعان ۇيلەردىڭ قيراندىسىن تازالاۋعا,  شىعىس قازاقستانداعى تارباعاتاي اۋدانىندا بولعان تاسقىن سۋدىڭ زاردابىن جويۋ جۇمىستارىنا كومەگىن تيگىزگەن. «قازاقستان رەسپۋبليكاسىنىڭ قارۋلى كۇشتەرىنە 10 جىل», ءىىى دارەجەلى «ءمىنسىز قىزمەتى ءۇشىن», «توتەنشە جاعدايلاردىڭ الدىن الۋدا جانە جويۋدا ۇزدىك شىققانى ءۇشىن», «قازاقستان رەسپۋبليكاسىنىڭ تاۋەلسىزدىگىنە 20 جىل», «قازاقستان رەسپۋبليكاسىنىڭ قارۋلى كۇشتەرىنە 20 جىل», سونداي-اق, «قۇتقارۋ وپەراتسيالارىنا بەلسەندى قاتىسقانى ءۇشىن», «توتەنشە جاعدايلار ورگاندارىنىڭ قۇرمەتتى قىزمەتكەرى»  مەدالدارىمەن ماراپاتتالعان. جاڭا تاعايىنداۋعا دەيىن پولكوۆنيك يبراگيم كۇلشىمباەۆ استانا قالالىق توتەنشە جاعدايلار دەپارتامەنتىنىڭ باسشىسى بولعان. قايرات ءابىلدينوۆ. دەرەك, فوتو: قاراعاندى وبلىستىق توتەنشە جاعدايلار جونىندەگى دەپارتامەنتتىڭ ءباسپاسوز قىزمەتى.