مەملەكەت باسشىسىنىڭ «بىزگە دوللار ەمەس, تەڭگە ماڭىزدى» دەگەنى كوپ جايدى اڭعارتادى. مەنىڭ عانا ەمەس, ءاربىر قازاقستاندىقتىڭ كوڭىلىن ءدوپ باسىپ, رۋحتاندىرعان قاناتتى ءسوزى بىرتىندەپ ۇلتتىق ۆاليۋتامىزدىڭ قۇندىلىعىن كوتەرۋگە ىقپال ەتەر دەپ تە ويلايمىن. وتاندىق ونىمدەردىڭ, ونىڭ ىشىندە قۇرىلىس جۇمىستارىن جۇرگىزۋگە وتە قاجەتتى ماتەريالدار باعاسىنىڭ كوپ قىمباتتاماۋى, ازىق-ت ۇلىك قۇنىنىڭ اسا شارىقتاماي, بىردەي دەرلىك دەڭگەيدە ساقتالۋى دا ەرتەڭگى كۇنگە دەگەن سەنىمىمىزدى نىعايتا ءتۇستى. بۇگىندە مەملەكەت باسشىسى ەلىمىزدى الەمدىك داعدارىستان كوپ قيىندىقسىز الىپ شىعۋدىڭ بار مۇمكىن جولىن قاراستىرۋ ۇستىندە. وسىنىڭ ءبارى, تۇپتەپ كەلگەندە, ەلدىڭ ەلباسىنا دەگەن قۇرمەتىن ارتتىرىپ, سەنىمىنە سەنىم قوسۋدا. وسىنىڭ ءبارىن قورىتا وتىرىپ تۇيگەن ويىم, مەملەكەتتىك ساياساتقا ساي ءتول مىندەتىمىزدى ادال اتقارىپ, ەلىمىزدىڭ داعدارىستان امان وتۋىنە وزىندىك ۇلەسىمىزدى قوسۋ پەرزەنتتىك پارىزىمىز دەپ سانايمىن.
ەلباسى «ۇلت جوسپارى – قازاقستاندىق ارمانعا باستايتىن جول» اتتى باعدارلامالىق ماقالاسىندا دا ەگجەي-تەگجەيلى بايانداپ بەرگەنىندەي, ءار سالانىڭ قىزمەتكەرى وزىنە تيەسىلى بولىممەن مۇقيات تانىسسا, الداعى جۇمىسىن ناقتى انىقتاي الادى. قازىرگى تاڭدا دۇنيەجۇزىندەگى مەملەكەتتەر وتە اۋىر كەزەڭدى باسىنان وتكەرۋدە. مۇنايدىڭ باعاسى ەڭسە تىكتەي الار ەمەس. جۇمىسسىزدىق الەم ەلدەرىن تىقسىرا تۇسۋدە. ونىڭ ۇستىنە, تاياۋ شىعىس ەلدەرىندەگى قاقتىعىستار ۋشىعىپ, سونىڭ سالدارىنان ەۋروپادا بوسقىندار قاپتاپ كەتتى. بۇل كارى قۇرلىقتاعى جاعدايدى تىعىرىققا تىرەپ وتىر.
ال ەلباسى «ۇلت جوسپارىنا» بايلانىستى باعدارلامالىق ماقالاسىندا جاھاندىق داعدارىستان ەشبىر مەملەكەتتىڭ قۇتىلا المايتىنىن ايتا كەلىپ, ءاربىر قازاقستان ازاماتىنىڭ ەلدەگى قيىندىقتاردى ەڭسەرۋ باعىتىنداعى جۇمىستارعا جۇمىلا اتسالىسۋى كەرەكتىگىن اتاپ كورسەتكەن بولاتىن. جاھاندىق داعدارىسقا توتەپ بەرۋدىڭ بىردەن-ءبىر جولى – بەس ينستيتۋتتىق رەفورمانى جۇزەگە اسىرۋ باعىتىندا قابىلدانعان زاڭداردى قولدانىسقا ەنگىزىپ, ونىڭ ءمىنسىز ورىندالۋىن قامتاماسىز ەتۋ. سونىڭ ءبىرى – ەڭبەك كودەكسى جاڭا جىلدان باستاپ كۇشىنە ەنىپ وتىر. قىزۋ تالقىلاۋدان وتكەن جاڭا زاڭنامادا كوپتەگەن وزگەرىستەر مەن تولىقتىرۋلار بار. ەلباسىنىڭ بەس ينستيتۋتتىق رەفورماسىن جۇزەگە اسىرۋ جونىندەگى «100 ناقتى قادام» ۇلت جوسپارى تاپسىرماسى, قازاقستاننىڭ دۇنيەجۇزىلىك ساۋدا ۇيىمىنا كىرىپ, ەۋرازيالىق ەكونوميكالىق وداق تۋرالى كەلىسىمشارتقا سايكەس مىندەتتەمەلەر قابىلداعانى وسى جاڭا ەڭبەك كودەكسىنىڭ كۇشىنە ەنۋىنە نەگىزگى العىشارتتار جاساعانى بەلگىلى. بۇل مىندەتتەمەلەر ىشكى زاڭنامامىزدى ءتيىستى حالىقارالىق ۇيىمداردا قولدانىلاتىن نورمالارمەن جانە ستاندارتتارمەن ۇيلەستىرۋدى تالاپ ەتكەن ەدى.
سوندىقتان دا, ەڭبەك كودەكسىنە الەمدىك ءىس-تاجىريبەدە كەڭىنەن قولدانىلاتىن قۇقىقتىق ينستيتۋتتار ەنگىزىلگەنىن بىلگەن ارتىق بولمايدى. ەڭبەك قاتىناستارىن قۇقىقتىق جاعىنان رەتتەۋ ءىسى زور يكەمدىلىكتى, ۇيلەسىمدىلىكتى تالاپ ەتەدى. جالپى, ۇجىمدىق كەلىسىمشارتتىق قاتىناستارعا ۇلكەن ءمان بەرىلىپ, قىزمەتكەردىڭ ەڭبەكتەگى جانە الەۋمەتتىك مۇددەلەرىن قورعاۋ جونىندە جۇمىس بەرۋشىلەرمەن ءوزارا بولاتىن كەلىسسوزدەردە كاسىپوداقتاردىڭ ءرولى زاڭناما شەڭبەرىندە كورسەتىلەدى. ەڭبەك كەلىسىمشارتى قاشاندا ەڭبەك قۇقىنىڭ نەگىزگى ينستيتۋتى بولىپ سانالعان. بۇل كودەكستە ەڭبەك كەلىسىمشارتىنىڭ مەرزىمى تۇبەگەيلى قايتا قارالعان, اتاپ ايتقاندا, كەلىسىمشارت مەرزىمى اياقتالعاندا تاراپتار ونى ناقتى مەرزىمگە نەمەسە بەلگىلەنبەگەن ۋاقىتقا ۇزارتۋعا قۇقىلى. ەڭبەك كەلىسىمشارتىنىڭ مازمۇنىنان وتەماقىلىق جانە كەپىلدى تولەمدەر, قامسىزداندىرۋ تۋرالى شارتتار جايلى مىندەتتى تۇردەگى تارماقتار الىنىپ تاستالدى. كودەكستىڭ جاڭاشىلدىعى – ۋاقىت تالابى.
تۇراتبەك شاراپيەۆ,
الماتى وبلىستىق دەنە شىنىقتىرۋ جانە سپورت باسقارماسىنىڭ باسشىسى.
تالدىقورعان.
