«ماڭگىلىك ەل» پويىزى – اقسۋدا

استانادان 15 اقپاندا ەل تاۋەلسىزدىگىنىڭ 25 جىلدىعىنا وراي ساپارعا شىققان «ماڭگىلىك ەل» الەۋمەتتىك پويىزى وسكەمەن مەن سەمەيدى ارالاپ, كەرەكۋ وڭىرىنە اتباسىن تىرەگەن ەدى. ساپارلاتىپ كەلە جاتقان الەۋمەتتىك پويىزدى اۋەلى اقسۋ قالاسىنىڭ اكىمدىگى, قازاقستان حالقى اسسامبلەياسى مەن قوعامدىق ۇيىمداردىڭ وكىلدەرى, جەرگىلىكتى جاستار باستاپ, قالا تۇرعىندارى قارسى الدى. وبلىستاعى ءوندىرىستى اقسۋ قالاسىنىڭ ونەركاسىپ سەكتورىن «ەۋرازيالىق ەنەرگەتيكالىق كورپوراتسيا» اق, «فەرروقورىتپا زاۋى­تى» اق قۇرايدى. قالادا 70 مىڭ حالىق تۇرادى. قالالىق اكىمدىكتە الەۋمەتتىك پويىز قوناقتارىنىڭ قاتىسۋىمەن دوڭگەلەك ۇستەل باسىندا ۇلتارالىق كەلىسىم, ەلدەگى تۇراقتىلىق, ءور­كەن­دەۋ, تاۋەلسىزدىك تالاپتارى اياسىن­دا اڭگىمەلەسۋ ءوتتى. دوڭگەلەك ۇستەل باسىندا ەلىمىزدەگى نەمىس قاۋىم­داستىعىنىڭ توراعاسى الەك­ساندر دەدەرەر, «ماڭگىلىك ەل» ما­مانداندىرىلعان الەۋ­مەت­تىك پويىزىنىڭ جەتەكشىسى رۋس­لان بارباسوۆ ءسوز سويلەپ, بۇل سا­پار­دىڭ ءمان-ماقساتىنا توقتالدى.  پويىز قۇرامى ءبىر كۇن بويى اقسۋلىقتارعا قىزمەت كورسەتىپ, سۇراق­تارىنا جاۋاپ بەردى. قارالعان ماسەلەلەردىڭ ىشىندە 5 سۇراققا ەرەكشە نا­زار اۋدارىلىپ, باقىلاۋعا الىن­دى. الەۋمەتتىك, حالىققا قىز­مەت كورسەتۋ ماسەلەلەرى, اۋىل شارۋا­شىلىعى جانە بيزنەسكە قاتىستى سۇ­راق­تار بويىنشا تۇرعىنداردى قابىل­داۋ جۇرگىزىلدى. اقسۋلىقتار دارىگەر­لەردىڭ قابىلداۋىندا بولدى. ال ۇيىم­داستىرۋشىلاردىڭ ايتۋىنشا, قۇرامىندا 100-گە جۋىق مۇشەسى بار, 9 ۆاگوننان تۇراتىن پويىز­دا كاسىپ­كەرلەر پالاتاسىنىڭ مامان­دارى, الەۋ­مەتتىك قورعاۋ جانە دەنساۋ­لىق ساق­تاۋ سالاسىنىڭ وكىلدەرى, سپورت­شىلار, ونەر ادامدارى بىرگە كەلەدى. – جالپى, پويىز ساپارى بارىسىندا ءبىزدىڭ ماماندار قۇرامى اۋى­سىپ, جاڭارىپ وتىرادى. ماقسات – اۋىلدىقتاردىڭ, سوعىس ارداگەرلەرى مەن مۇمكىندىگى شەكتەۋلى ادامداردىڭ ءوتىنىش-تىلەكتەرىنە قۇلاق اسىپ, قۇقىق­تىق جانە مەديتسينالىق تۇرعىدا كەڭەس بەرۋ. جەكە كاسىبىن اشىپ, بيزنەسىن باستاعىسى كەلەتىن ادامدارعا دا كومەك كورسەتىلەدى. مادەني-سپورت­تىق شارالار, كونتسەرتتىك باعدار­لامالار ۇسىنىلادى, – دەدى «ماڭگىلىك ەل» الەۋ­مەتتىك پويىزىنىڭ جەتەكشىسى ر.بارباسوۆ. – ءبىزدىڭ قالامىزدا قوعامدىق كەلى­سىم, ادىلەت جانە مەملەكەتتىك قىز­مەت كورسەتۋ, بيزنەس جانە كاسىپكەرلىك, اۋىل شارۋاشىلىعى, مەديتسينالىق ماسەلەلەر بويىنشا كەڭەستەر الۋ, ءبىلىم بەرۋ, ەڭبەك شارتتارى مەن ەڭبەك­تى قورعاۋ ماسەلەلەرى جونىنەن تۇرعىن­دارعا ارنالىپ اشىلعان ارنايى كەڭەس الاڭدارىندا جالپى 325 سۇراق قويى­لىپ, 300-دەن استام تۇرعىن ءدارى­گەرلەردىڭ قابىلداۋىنان ءوتتى, – دەدى قالالىق ىشكى ساياسات ءبولىمىنىڭ مامانى ءاليا وماروۆا. تۇستەن كەيىن پويىزدىڭ كەلۋ قۇرمەتىنە وراي اقسۋدىڭ ءسابيت دونەنتاەۆ اتىنداعى مادەنيەت سارايىندا كونتسەرتتىك باعدارلاما كورسەتىلدى. پويىز ساپارى ءارى قاراي وبلىس ورتالىعى – پاۆلوداردا, ەكىباستۇز قالاسىندا جالعاسادى. فاريدا بىقاي, «ەگەمەن قازاقستان». پاۆلودار وبلىسى.