زيالى قاۋىممەن اسەرلى اڭگىمە

كەشە استانادا «اۋىل» حالىقتىق-دەمو­كرا­تيالىق پاتريوتتىق پارتياسىنىڭ ورتالىق كەڭ­سەسىندە «قازاقتىڭ ءتول مادەنيەتىنىڭ جالپى ادام­زات يگىلىگىنە ۇلەسى» اتتى دوڭگەلەك ۇستەل ءوتتى. ساي­لاۋ ناۋقانىنىڭ ۇگىت-ناسيحات جۇمىستارى اياسىندا ۇيىمداستىرىلعان باسقوسۋدا حالقىمىزدىڭ مادەني تامىرلارى, ۇلتتىق سالت-ءداستۇرىمىزدىڭ جاھاندانۋ كەزەڭىندەگى ماڭىزى تۇرعىسىندا ءسوز بولدى. پارتيانىڭ رەسپۋبليكالىق قوعامدىق شتابى وتكىزگەن شاراعا تانىمال عا­لىم­دار سەيىت قاسقاباسوۆ, عاريفوللا ەسىم, تۇرسىن جۇرتباي, جازۋشىلار ءالى­بەك اسقاروۆ, اسقار التاي, مارات ءما­جي­توۆ, قۋانىش جيەنباەۆ, اقىندار جانات اسكەربەكقىزى, داۋلەتكەرەي كاپ­ ۇلى, مارجان ەرشۋ جانە باسقا دا قالام­گەرلەر, سونداي-اق, جاستار قاتىستى. ءبىرىنشى كەزەكتە ءسوز العان «اۋىل» پار­تياسىنىڭ توراعاسى ءالي بەكتاەۆ ۇيىم­نىڭ قازىرگى تاڭدا اتقارىپ جاتقان جۇ­مى­سىنا توقتالا كەلىپ, «حالىقتىڭ تاري­حى مەن مادەنيەتىن ەسەپكە الماي, ەتنوس­تىق دامۋدىڭ ءتۇپ-تامىرىن, قازاقى مادە­نيەتتىڭ رۋحاني, ادامگەرشىلىك باسىم قۇندىلىقتارىن تۇسىنبەي بۇگىنگى قازاق­ستاننىڭ وركەندەۋى مۇمكىن ەمەس», – دەدى. ودان كەيىن ءسوز كەزەگى تيگەن «اۋىل» پارتياسىنىڭ مۇشەسى, پارلامەنت ءماجى­لىسىنىڭ دەپۋتاتتىعىنان ۇمىتكەر, جازۋشى, مەملەكەتتىك سىيلىقتىڭ لاۋرەاتى الىبەك اسقاروۆ قازاقستاننىڭ ءور­كەنيەتتى ەلدەرمەن تەرەزەسى تەڭ, الەمدىك مادەنيەت ساحناسىندا وزىندىك ورنى بار مەملەكەتكە اينالعانىن, رەسپۋبلي­كامىزدا ۇلتتىق قۇندىلىقتاردى جاڭ­عىر­تۋعا باسا نازار اۋدارىلىپ كەلە جات­قانىن ءسوز ەتە وتىرىپ: «ەگەر ءبىزدىڭ بويىمىزدا ادامگەرشىلىك پەن يمان­دى­لىقتىڭ ءبىر بەلگىسى بولسا, ول – قارا­پايىم قازاق اۋىلىنىڭ ونەگەسى, بەرگەن تاربيەسى. قىسقاسى, اۋىل بىزگە قارىز ەمەس. ەندىگى جەردە اۋىلعا ءبىز قارىزبىز. كوپ­شىلىگىمىز اتا ساقالىمىز اۋزىمىزعا ءتۇس­كەنشە سول قارىزدى ۇمىتىپ كەتكەن سياق­تىمىز. ەندەشە, بەل شەشىپ, بىلەك سىبا­نىپ اۋىلعا كومەك قولىن سوزاتىن كەز كەلدى. قارىزىمىزدى قايتاراتىن, پارى­زىمىزدى وتەيتىن ۋاقىت تۋدى دەپ بىلەمىن», – دەدى. باسقوسۋدا سەيىت قاسقاباسوۆ, عاري­فول­لا ەسىم جانە باسقالار ءسوز سويلەپ, ۇل­تى­م­ىزدىڭ بولمىسىنا, قازاق اۋىل­دارىنىڭ بۇگىنى مەن كەلەشەگى جونىندە اسەرلى اڭگىمە ءوربىتتى. ولاردىڭ ايتۋىن­شا, قازاق مادەنيەتى الەمدىك مادەنيەتكە وشپەستەي ءىز قالدىرعان, سونداي-اق, قايتالان­باس بىرەگەي قوعامىمىزدى ۇيىستى­رۋشى ينستيتۋت بولعان. بۇدان بولەك, جيىنعا قاتىسۋشىلار الەم­دەگى مەملەكەتتىك سيمۆولدار مەن بەلگى­لەر, سايا­سي تەرميندەر ۇلى دا­لادا قالىپ­تاس­قا­نىن, بۇل ءوز كەزەگىندە دالا پەرزەنت­تەرىن­دە دامىعان مەملەكەتتىك قۇرى­لىم­­نىڭ بولعاندىعىن ايعاقتايتىنىن اتاپ ءوتتى. ايتا كەتەيىك, جيىن بارىسىندا «اۋىل» پارتياسىنا جاڭا مۇشەلەر قا­بىل­داۋ ءراسىمى بولدى. ناقتىلاي ايتقان­دا, داۋلەتكەرەي كاپ ۇلى باستا­عان بىرقاتار جاس اقىندار «اۋىل» پارتياسىنا قابىلداندى. جولدىباي بازار, «ەگەمەن قازاقستان». استانا.