جاڭاجىلدىق تارتۋ – باسپانا

شىعىس وڭىرىندە قولعا الىنعان «مەيىرىم» اكتسياسىنىڭ مەيىرىمىن سەزىنگەندەر قاتارى جىل ساناپ ارتىپ كەلەدى. شىعىس قازاقستان وبلىستىق ارنايى جاسوسپىرىمدەر ءۇيىنىڭ تاربيەلەنۋشىسى ازامات وسكەنباەۆ اتالعان اكتسيا اياسىندا وسكەمەننىڭ جاڭا شاعىن­اۋدانىنان ءبىر بولمەلى پاتەرگە قول جەتكىزدى. ول وسكەمەن سەرۆيس جانە كاسىبي دايىندىق كوللەدجىنىڭ باعدارلاماشى-وپەراتور مامان­دىعىندا وقيدى. 2011 جىلى جەتىم جانە اتا-انا قامقورلىعىنسىز قالعان بالالاردى قولداۋ جونىندەگى كەشەندى باعدارلاماعا سايكەس شىعىس قا­زاقستان وبلىسىندا «مەيىرىم» اكتسياسى باستالعان بولاتىن. بۇل اكتسيانىڭ ماقساتى – اتا-اناسىز قالعان بالالاردىڭ ءومىر ءسۇرۋ ساپاسىن جاقسارتۋ. – «مەيىرىم» اكتسياسى اياسىندا اتقارىلعان جۇمىستاردى بۇگىنگى باسپانا تويىمەن قورىتىندىلاپ وتىر­مىز. 2011 جىلى قابىلدانعان باع­دارلامانى جۇزەگە اسىرۋ 2015 جىل­عا دەيىن جوسپارلانعان بولاتىن. الايدا, وبلىس اكىمدىگىنىڭ باس­­تاماسىمەن بۇل باعدارلاما ءارى قاراي جالعاسىن تابادى. وسى جىلدار ءىشىن­دە جەتىم قالعان بالالاردىڭ ماڭ­دايى­نان سيپاپ, جان جىلۋىن اياما­عان پاترو­ناتتىق ۇيىمدارعا شەكسىز ريزا­شىلىعىمدى ءبىلدى­رە­­مىن, – دەيدى وبلىستىق ءبىلىم باسقار­­­­ما­سىنىڭ باسشىسى ايجان سا­دىقوۆا. باسقارما باسشىسىنىڭ ايتۋىنشا, قازىرگى كەزدە شىعىس وڭىرىندە 3 مىڭنان استام جەتىم جانە اتا-انانىڭ قامقورلىعىنسىز قالعان بالالار بار. ولاردىڭ ىشىندە 1900 بالا پاتروناتتىق مەكەمەلەرگە تىركەلىپ, قامقورلىققا الىندى. پاتروناتتىق تاربيە مەن قولداۋ شەڭبەرىندە جەكەلەگەن تۇلعالار مەن كاسىپورىندار بالالاردىڭ «تۇرعىنۇيقۇرىلىسجيناقبانكى» اق-تا اشىلعان جەكە ەسەپشوتتارىنا قارجى قۇيىپ كەلەدى. ناتيجەسىندە, 2011 جىلدان بەرى 478 بالا جەكە باسپاناعا يە بولدى. كامەلەت جاسقا تولعان سايىن اتالعان ساناتتاعى بالالاردىڭ باس­پانالى بولۋ كورسەتكىشى دە ارتا تۇسەدى, دەيدى باسقارما باسشىسى. – «مەيىرىم» اكتسياسى اياسىندا جەتىم جانە اتا-انا قامقور­لىعىنسىز قالعان بالالار مەن «تۇرعىنۇي­قۇرىلىس­جيناق­بانكى» اق جانە كاسىپورىندارمەن ارا­سىندا كەلىسىمدەر بەكىتىلدى. بۇل اكتسيا تەك باسپانامەن قامتىپ قانا قويماي, وقۋعا دا, جۇمىس بەرۋگە دە كومەكتەسەدى, – دەيدى «تۇرعىنۇيقۇرىلىسجيناقبانكى» اق وبلىستىق فيليالىنىڭ ديرەكتورى نۇرلان كۇزەمباەۆ. ونىڭ ايتۋىنشا, «وڭىرلەردى دامىتۋ-2020» باعدارلاماسى بويىنشا بەرىلگەن پاتەردىڭ شارشى مەترى 77 مىڭ تەڭگە كولەمىندە باعالاندى. مۇنداي تومەن باعا ەش جەردە كەزدەسپەيدى. 19 جاستاعى ازامات 2009 جىلدان باستاپ بانكتەگى ەسەپشوتىنا باسپانا قۇنىنىڭ 2 پايىزىن جيناپتى. جاسوسپىرىمدەر ءۇيى تاربيەلەنۋشىسىنىڭ باسپانالى بولۋىن جىلدامداتقان پاتروناتتىق ۇيىمدار قاتارىندا مەملەكەتتىك مەكەمەلەرمەن بىرگە «قازتسينك» جشس, «يمپەراتور» ساۋدا ورتا­لىعى سىندى كاسىپورىندار بار. دۋمان اناش, «ەگەمەن قازاقستان». وسكەمەن.