اتىراۋلىق وتباسى شاتىرسىز, ەدەنسىز باسپانادا تۇرادى

اتىراۋ. اتىراۋ وبلىسىنىڭ شوقپارتوعاي اۋىلىندا ءبىر وتباسىنىڭ شاتىرسىز, ەدەنسىز ۇيدە تۇراتىنى انىقتالدى. بۇل تۋرالى azh.kz سايتىنا سىلتەمە جاساعان egemen.kz ءتىلشىسى حابارلادى. جىلىوي اۋدانىنداعى ەلدى مەكەننىڭ ءبىرى – شوقپارتوعايدىڭ تۇرعىنى گۇلجان قوجانوۆا ءىى توپتاعى مۇگەدەك قىزىمەن بىرگە اتاسىنان مۇراعا قالعان باسپانادا تۇرادى. الايدا, 1944 جىلى قابىرعاسى قالانعان ءۇيدىڭ نە شاتىرى, نە ەدەنى جوق. ءبىر سوزبەن ايتقاندا, لاشىق تارىزدەس باسپانانىڭ توبەسىنە سابان توسەلىپتى. ءۇي يەسىنىڭ ايتۋىنشا, بۇرىن كۇيەۋى بۇل ءۇيدى مايلاپ, توبەسىنەن سۋ وتكىزبەۋدىڭ امالىن جاساعان ەكەن. كۇيەۋى ومىردەن وتكەن ءتورت جىلدان بەرى جوندەۋ جۇمىستارى جۇرگىزىلمەگەن. گۇلجان قوجانوۆا اكىمدىككە بىرنەشە رەت شاعىم ايتىپ, ءبىر جىل بۇرىن قۇلسارى قالاسىنداعى كوپ قاباتتى ۇيدەن ۋاقىتشا ءبىر بولمەلى پاتەر العان. بىراق, ونىڭ كوممۋنالدىق تولەماقىلارىنا تولەنەتىن شىعىننىڭ كوپتىگىنەن بۇرىنعى باسپاناسىنا قايتا ورالعان. قىزىنىڭ مۇگەدەكتىگىنە اي سايىن 35 مىڭ تەڭگە الادى. جاڭا باسپانا ساتىپ الاتىنداي قارجىسى جوقتىعىنا ناليدى. وسى وتباسى مەكەن ەتكەن قاراارنا وكرۋگىنىڭ اكىمى ەربولات ەلەۋسىنوۆ تە شاتىرسىز, ەدەنسىز ءۇيدىڭ تۇرۋعا جارامسىز ەكەنىن راستاپتى. سول سەبەپتەن قۇلسارى قالاسىنان ءبىر بولمەلى پاتەر ۋاقىتشا بەرىلگەن. بىراق مۇگەدەك قىزى بار گۇلجان قوجانوۆا ءوز اۋىلىنان كەتكىسى كەلمەيدى. وكرۋگ اكىمى شاعىن بولسا دا ءۇي تۇرعىزىپ بەرۋ ءۇشىن كاسىپكەرلەردەن كومەك سۇرالعانىمەن, ەشقايسىسى كومەك قولىن سوزۋعا ىنتا تانىتا قويماعانىن ايتتى. جولداسبەك شوپەعۇل. دەرەك, سۋرەت: azh.kz.