زيكا بەزگەگى ەۋروپا ەلدەرىنە جەتتى

استانا. 28 قاڭتار. زيكا بەزگەگىن جۇقتىرعان ناۋقاس دانيادا تىركەلدى. بۇل تۋرالى Euronews تەلەارناسىنا سىلتەمە جاساعان egemen.kz ءتىلشىسى حابارلادى. ىندەتتى ورتالىق جانە وڭتۇستىك امەريكاعا بارعان ەر ادام جۇقتىرعان. قازىرگى تاڭدا بۇل ايماقتىڭ كوپتەگەن ەلدەرىندە زيكا ەپيدەمياسى ءورشىپ تۇر. بۇدان بۇرىن بەزگەكتى جۇقتىرۋدىڭ ەكى دەرەگى – شۆەيتساريادا, ءتورت جاعداي – يتاليادا, تاعى ەكى وقيعا اقش-تىڭ ۆيردجينيا جانە اركانزاس شتاتتارىندا تىركەلگەن بولاتىن. ىندەتتى جۇقتىرۋ وقيعالارىنىڭ بارلىعىندا دەرلىك اۋىرعان ادامدار ۆيرۋس شالعان ەلدەرگە بارعان. ال, بۇل ىندەت ادامعا ماسا ارقىلى جۇعادى. زيكا بەزگەگى اسىرەسە جۇكتى ايەلدەر ءۇشىن وتە قاۋىپتى بولىپ سانالادى. سەبەبى, اۋرۋ ىشتەگى بالانىڭ بويىندا اۋىتقۋشىلىقتار تۋدىرۋى مۇمكىن. كەيبىر عالىمدار ىندەت پەن برازيليادا مي دەرتىمەن دۇنيەگە كەلگەن سابيلەر سانىنىڭ ءوسۋىنىڭ اراسىنداعى بايلانىستى جوققا شىعارمايدى. سول سەبەپتى ماماندار اياعى اۋىر ايەلدەردى بۇل ايماققا بارۋدان باس تارتۋلارىن سۇراپ وتىر. زيكا ىندەتى بۇگىنگە دەيىن 20-دان استام ەلدە تىركەلگەن. ال, برازيليا الەم بويىنشا ەڭ ءىرى ەپيدەميانى باسىنان وتكەرىپ وتىر. وسىعان وراي حالىقارالىق وليمپيادا كوميتەتى ءوز الاڭداۋشىلىعىن ءبىلدىردى. سەبەبى, بيىلعى وليمپيادا وسى ەلدىڭ ريو-دە-جانەيرو قالاسىندا وتەتىنى بەلگىلى. ەلامان قوڭىر. دەرەك: Euronews. سۋرەت: ilpost.it.