اق ءۇيدىڭ الدىندا – وتىز جىل

ءومىرىن پيكەتتە وتكىزگەن ايەل دۇنيەدەن وزدى اقش-تىڭ ۆاشينگتونداعى اق ءۇيدىڭ الدىندا 30 جىلدان استام ۋاقىتىن پيكەتتە تۇرۋمەن وتكىزگەن ايەل قايتىس بولدى. ول وسى جىلداردىڭ بارىندە بيلىكتەن بەيبىتشىلىك ءۇشىن كۇرەس پەن يادرولىق قارۋسىزدانۋدى تالاپ ەتىپ كەلىپتى. Washington Post گازەتىنىڭ مالىمەتىنشە, كونچيتا پيچچوتتو ەسىمدى بۇل ايەل دۇيسەنبى كۇنى باقيلىققا اتتانعان. بىراق ونىڭ ناقتى جاسىن ەشكىم بىلمەيدى, تەك 80-ءنىڭ ماڭايىندا ەكەنى عانا ايتىلىپ وتىر. بەيبىتشىلىك جولىنداعى كۇ­رەسكەر ايەل جونىندە بۇدان باس­قا دا دەرەك از. ول 1960 جىلى يس­پانيادان اقش-قا قونىس اۋدارىپ كەلگەن. سودان كەيىن يتاليالىق جىگىتكە تۇرمىسقا شىعىپ, ءبىر قىز­دى اسىراپ الادى. الايدا, كەيىن پيچچوتتو كۇيەۋىنىڭ بالا اسىراپ الۋدا الاياقتىققا بارعانىن ءبىلىپ قويىپ, ودان اجىراسادى. ال قىز بۇرىنعى كۇيەۋىندە قالادى. سودان كەيىن ولاردىڭ جولدارى قايتىپ ەشقاشان توعىسپايدى. كونچيتا پيچچوتتو 1981 جىلى بەيبىتشىلىك جولىندا كۇرەسۋشىلەر قوزعالىسىنا قوسىلادى. ول ءوزىنىڭ ەكى سەرىكتەسىمەن بىرگە اقش پرەزيدەنتى رەزيدەنتسياسىنىڭ سولتۇستىك جاقتاعى ەسىگىنە قارسى بەتتە بەكەت قۇرادى. دەگەنمەن, ولاردىڭ قارۋسىزدانۋعا شاقىرعان كوپتەگەن پەتيتسيالارىنىڭ بىردە-ءبىرى كونگرەستە قارالا قويمايدى. سونىمەن بىرگە, اق ءۇيدىڭ پوليتسياسى مەن كۇزەتى بۇلاردىڭ بەيبىت تۇردە قارسىلىق نيەتىن ءبىلدىرىپ جاتقانىنا كەدەرگى دە كەلتىرمەيدى. الايدا, زاڭ بويىنشا, پيكەت جاساۋشى ادامنىڭ ءبىر ءوزىن قالدىرۋعا بولمايتىن ەدى. سوندىقتان سوڭعى جىلدارى پىكىرلەستەرىنەن ايرىلعان ايەلدىڭ جانىنا جاس بەلسەندىلەر كەلە باس­تادى. ولار ۇدايى ءبىر-ءبىرىن الماستىراتىن ەدى, تەك كونچيتا سول قالپى تۇرا بەردى. مۇرات ايتقوجا.