بەلورۋسسيا پارلامەنتى ەلدىڭ پرەزيدەنت سايلاۋىن 19 جەلتوقساندا وتكىزۋ تۋرالى شەشىم قابىلدادى. پرەزيدەنت الەكساندر لۋكاشەنكونىڭ وكىلەتتىلىگى كەلەسى جىلدىڭ كوكتەمىندە بىتەدى. سايلانعان ادام قازىرگى پرەزيدەنتتىڭ مەرزىمى اياقتالۋىن ءبىراز كۇتە تۇراتىن بولادى. ال كۇرەسكە كىم قوسىلادى دەگەندە, وپپوزيتسيا اراسىنان لۋكاشەنكومەن تىرەسەتىندەي تۇلعا جوق كورىنەدى. بالاماسىز بولماسىن دەپ, قازىرگى پرەزيدەنتتىڭ ءبىر جاقتاسى ءوز كانديداتۋراسىن ۇسىنباق. جەمە-جەمگە كەلگەندە, باسقالار كۇرەستەن شىعىپ قالعانداي بولسا, سول جاقتاسى “قوسىمشا اۋەجاي” قىزمەتىن اتقارادى. ۇكىمەتتىڭ باسشىسى بار, ءوزى جوق جاپونياداعى بيلەۋشى دەموكراتيالىق پارتيانىڭ ىشكى سايلاۋىندا جەڭىپ شىعىپ, پرەمەر-مينيسترلىك قىزمەتتى ساقتاپ قالعان سوڭ, ناوتو كان جاڭا قۇرامدى ءوز قالاۋىنشا جاساقتاۋ ءۇشىن ۇكىمەتتى تاراتتى. سوعان وراي ۇكىمەتتە ءبىراز وزگەرىس بولاتىن ءتۇرى بار. ايتالىق, سىرتقى ىستەر ءمينيسترى كاتسۋيا وكابا ۇكىمەتتەن كەتىپ, پارتيالىق جۇمىسقا اۋىسپاق. ونىڭ ورنىن سەيدزي ماەحارا باسادى. ءبىر ەرەكشەلىك – ناوتو كان ءوزىنىڭ پارتيا ىشىندەگى قارسىلاستارىن دا ۇكىمەت قۇرامىنا تارتپاق كورىنەدى.
ساتىلاتىن داۋىستار
قىرعىز اعايىنداردىڭ سوزدەرى مەن ارەكەتتەرى كەيدە جۇرتتى تاڭداندىرادى. ۆيتسە-پرەمەر ازىمبەك بەكنازاروۆ “سايلاۋ ناۋقانىنا جانە داۋىستى ساتىپ الۋعا 150 ميلليون دوللار قارجى بولىنگەنىن” حابارلادى. جاي حابارلاپ قويماي, سايلاۋشىلارعا ۇمىتكەرلەردىڭ ۇسىنعان اقشاسىن الىڭدار دا, جۇرەكتەرىڭمەن, ارلارىڭمەن داۋىس بەرىڭدەر دەپ كەڭەس بەردى. ونىمەن دە قويماي, 20 جىلدان بەرى ارلارىڭدى ساتىپ جۇرسىڭدەر, دەپ جۇرتتى كىنالادى. قايراتكەر ايتاتىن ءسوز ەمەس-اق.
سوتتاسىپ جاتىر
گااگادا گرۋزيانىڭ تالابى بويىنشا بۇۇ-نىڭ حالىقارالىق سوتى ابحازيا مەن وڭتۇستىك وسەتيادا رەسەي تاراپىنان بولعان گرۋزين حالقىنا قارسى ەتنوستىق تازالاۋ ماسەلەسى بويىنشا ءىس قاراپ جاتىر. سوت ەكى جاقتى دا (ايىپتاۋشى گرۋزيا مەن اقتالۋشى رەسەي) تىڭداپ, سوڭعى شەشىمدى كەيىنىرەك ايتادى. رەسەي سوعىستى باستاعان گرۋزيندەر دەسە, گرۋزيانىڭ ادىلەت ۆيتسە-ءمينيسترى تينا بۋردجالياني جۇزدەگەن مىڭ گرۋزيننىڭ ءوز ۇيلەرىنەن قۋىلۋىن توقتاتپاق بولدىق دەيدى. قازىر گرۋزيا حالقىنىڭ 10 پايىزى بوسىپ كەلگەن گرۋزيندەر كورىنەدى.
قانىشەردىڭ كۋالىگى
جاقىندا اتىشۋلى قانىشەر سەرب گەنەرالى راتكو ءملاديچتىڭ بالاسىنىڭ ءۇيىن تىنتكەندە سەرب فاشيستەرىنىڭ ز ۇلىمدىعىن اشكەرەلەيتىن قۇندى دەرەكتى ماتەريال – قازىر قاشىپ جۇرگەن گەنەرالدىڭ كۇندەلىگى تابىلىپتى. ول 18 داپتەر, 3500 بەتتەن تۇرادى ەكەن. وندا مۇسىلماندارعا قارسى گەنوتسيدتىك ساياسات ايۋاندىق جاساعان ۇلتشىلداردىڭ ماقسات-مۇددەسى, ءىس-ارەكەتتەرى ايقىن كورىنەدى. “مۇسىلماندار – ءبىزدىڭ دە, حورۆاتتاردىڭ دا ورتاق جاۋى, ءبىز ولار قايتىپ شىعا المايتىنداي تۇيىققا قاماۋىمىز كەرەك”, دەپتى گەنەرال. قانىشەردىڭ ءوز قولىمەن جازعان دەرەگى ونىڭ ءوزىن عانا ەمەس, ونىڭ باسشىلارى: سەرب-بوسنيالىقتار كوسەمى رادوۆان كارادجيچ پەن سەربيا پرەزيدەنتى سلوبودان ميلوشەۆيچتىڭ دە جاۋىزدىقتارىن تولىق اشكەرەلەيدى.
قاي بەتىمەن بارماق
بۇۇ باس حاتشىسى پان گي مۋننىڭ پىكىرىنشە, نيۋ-يوركتە وتەتىن يادرولىق قارۋسىزدانۋ ماسەلەسىنە ارنالعان كەزدەسۋگە يران پرەزيدەنتى ماحمۇد احمادينەجاد بارمايتىن كورىنەدى. بۇل كەزدەسۋ بۇۇ اياسىندا وتەتىندىكتەن, ونىڭ باس حاتشىسى بۇل ماسەلەگە كوبىرەك قاتىسى بار ەلدەر باسشىلارىنىڭ كەلۋ-كەلمەۋىن زەرتتەسە كەرەك. ءسىرا, يران پرەزيدەنتى وزىنە ايتىلار سىندى, قويىلار تالاپتى اڭعارعان شىعار.
پاپا ساپارى قىمبات
ريم كاتوليك شىركەۋىنىڭ باسشىسى ريم پاپاسى بەنەديكت ءحVى وتكەن بەيسەنبىدەن ۇلىبريتانياعا ساپارىن باستاعان بولاتىن. حالقىنىڭ نەگىزى حريستياندار بولعانمەن (87 پايىز), كاتوليتسيزمدى ۇستاناتىندار بۇل ەلدە 10 پايىدى قۇرايدى. سوندىقتان ريم پاپاسىنىڭ ساپارىن اعىلشىندار ءارتۇرلى كوڭىل-كۇيمەن قارسى الدى. كاتوليكتەر باسشىسى بۇل ەلدە ءبىر-اق رەت – 1982 جىلى عانا بولعان ەكەن. قوناققا شاقىرىپ نە كەرەگى بار ەدى دەيتىندەر بارشىلىق. پونتيفيكتىڭ ساپارىنا ەل قازىناسىنان 10-12 ميلليون فۋنت ستەرلينگ جۇمسالاتىن كورىنەدى.
زاكاەۆ ۇستالدى
پولشادا وتپەك چەشەن كونگرەسىنە قاتىسپاق ويمەن كەلگەن يچكەريا چەشەن رەسپۋبليكاسىنىڭ باسشىسى سانالاتىن احمەت زاكاەۆ تۇتقىنعا الىندى. حالىقارالىق ىزدەۋگە سالىپ وتىرعان – رەسەي. بۇعان دەيىن ول لوندوندا تۇرعان, وعان وندا ساياسي باسپانا بەرىلگەن ەدى. اعىلشىندار زاكاەۆتى رەسەيگە قايتارىپ بەرۋگە وعان تاعىلعان ايىپ جەتكىلىكسىز دەپ كەلگەن. پولشانىڭ ونى رەسەيگە قايتارىپ بەرۋى دە شەشىلگەن ماسەلە ەمەس. پولشا ءوزىنىڭ حالىقارالىق بەدەلىن ساقتاپ قالۋ ءۇشىن وعان بارماۋى دا مۇمكىن. راس, پولشا بۇعان دەيىن زاكاەۆ كەلسە, ونىڭ ۇستالاتىنىن ەسكەرتكەن بولاتىن.
ازىرلەگەن ماماديار جاقىپ.
