گولۋبەۆ گامبۋرگتە توپ جاردى

قازاقستاندىق تەننيسشى اندرەي گولۋبەۆ گامبۋرگتە وتكەن كاسىپقوي تەننيسشىلەر اسسوتسيا­تسياسىنىڭ (اتر) “500” كاتە­گو­رياسىنداعى ءىرى تۋرنيرىندە باس بايگەنى جەڭىپ الدى. ول فينالدا اۆستريالىق يۋرگەن مەلتسەردى 6:3, 7:5 ەسەبىمەن تىزە بۇكتىردى. اندرەيدىڭ بۇل تابىسى – اتر تۋرنيرلەرىندە قازاقستاندىقتار قول جەتكىزگەن ەڭ ءبىرىنشى جەڭىس. وسى ۇلكەن جەتىستىگى ارقاسىندا ول كا­سىپقوي تەننيسشىلەر اسسوتسياتسياسى رەيتينگىسىندە 45 قاتار جوعارى جىلجىپ, 37-ءشى ورىننان ءبىر-اق شىقتى. بىراق تەننيسشىنىڭ تۋرنير­دەگى جولى ونشا جەڭىل بولا قويعان جوق. ول الدىمەن گەرمانيا ءۇشىن ونەر كورسەتىپ جۇرگەن الماتىلىق مي­حايل زۆەرەۆپەن (اتر رەيتين­گى­سىندە 157-ءشى) بەتپە-بەت كەلىپ, ونى 7:5, 6:1 ەسەبىمەن ۇتتى. كەلەسى اي­نالىمدا قاتتى شيەلەنىسكەن ءبا­سەكەدە يسپان مارسەل گرانولەرستى (رەيتينگىدە 86-شى) جارىس جو­لىنان شىعارىپ تاستادى. ماتچ ناتيجەسى – 6:4, 7:5. شيرەك فينال­عا شىعۋ جولىنداعى جەكپە-جەكتە اندرەي وسى ءتۋرنيردىڭ وتكەن جىل­عى جەڭىمپازى جانە الەمنىڭ ال­تىنشى راكەتكاسى رەسەيلىك نيكو­لاي داۆىدەنكومەن ۇشىراستى. بۇل جان الىسىپ, جان بەرى­سە­تىندەي شايقاستا تاعى دا ءبىزدىڭ جىگىتتىڭ مەرەيى ۇستەم شىقتى. ول ەكى سەتتە دە اتاعىنان ات ۇركەتىن ايبارلى قارسىلاسىنان 6:4 دەگەن ەسەپپەن باسىم ءتۇستى. بۇدان سوڭعى جارتىلاي فينالعا جولداما اپەرەتىن ماتچ تا اسا تارتىسپەن ءوتتى. وندا ءوزىن بارىنشا جي­ناقى ۇستاۋعا ۇمتىلعان ان­درەي وزبەكستاندىق دە­نيس ءيستوميندى (رەيتينگىدە 53-ءشى) 6:4 جانە 6:1 دەگەن ەسەپتەرمەن شاڭ قاپتىرىپ, العا قويعان ماقساتىنا قاراي جىلجي ءتۇستى. ال جارتىلاي فينالدا وعان كورت يەسى فلوريان مايەر (رەيتينگىدە 40-شى) قارسى تۇردى. الما-كەزەك تابىسپەن اۋما­لى-توكپەلى وتكەن بۇل كەزدەسۋدىڭ اقىرىندا دا ءبىزدىڭ جىگىتتىڭ ايبىنى اسىپ سالا بەردى. ول ويىندى 7:6, 6:4 دەگەن ەسەپتەرمەن ءوز پايداسىنا اياقتاي ءبىلدى. بۇل اتاق – اندرەي گولۋبەۆتىڭ سپورتتىق ءومىر جولىنداعى ءبىرىنشى ۇلكەن جەڭىس. بۇعان دەيىن ول 2008 جىلى سانكت-پەتەربۋرگتە وتكەن اتر ءتۋرنيرىنىڭ فينالىنا شىعىپ, بريتاندىق ەندي ماررەيگە (رەي­تينگىدە 4-ءشى) جول بەرىپ العان ەدى. ال گامبۋرگتەگى ءتۋرنيردىڭ سىياقى قورى جارتى ميلليون ەۆرودان جو­عارىلاۋ بولدى. وسىنداعى تابىس گو­لۋبەۆكە بۇدان باسقا قوسىمشا 500 ۇپاي مەن سوعان سايكەس اتر رەي­­تينگىسىندە 37-ءشى پوزيتسيانى اپەر­دى. بۇكىل تۋرنير بويىنا ول قار­سى­لاس­تارىنا بىردە-ءبىر سەتتى بەرگەن جوق. ونىڭ مۇنداعى جەڭىسى جەكە وزىنە عانا ەمەس, قازاقستان قۇراماسى ءۇشىن دە اسا ماڭىزدى بولىپ تابىلادى. وسىنىڭ الدىندا عانا جاسى 23-كە تولعان بۇل سايىپقىران – رەسەيدىڭ ۆولگوگراد وبلىسىنداعى ۆولجسكي قالاسىنىڭ تۋماسى. تەننيسپەن شۇعىلدانۋدى سوندا باستاعان. كەزىندە ءوز ەلىنىڭ 14 جانە 16 جاسقا دەيىنگى دارەجەلەردەگى قۇرامالارىندا ويناعان. جاسى كامەلەتكە تولار-تولماستا ارنايى جاتتىعۋ ءۇشىن شەتەلگە كەتەدى. سو­نىڭ ىشىندە يتاليادا كوپ بولادى. سوندىعىنان شىعار, اندرەي قازىر يتاليان ءتىلىن ورىس تىلىنەن كەم ءبىل­مەيدى. اعىلشىن تىلىندە دە جاقسى سويلەيدى. سول پيرەنەي تۇبەگىندە جۇرگەنىندە ونى قازاقستاندىق باپكەرلەر تاپتى. ءسويتىپ, ءبىزدىڭ ەلدىڭ اتىنان ونەر كورسەتە باستادى. ءبىزدىڭ ەلگە تەز باۋىر باسا باستاعان ول قازىردىڭ وزىندە قازاقتىڭ ەتىن, قازىسى مەن تۇشپاراسىن قاتتى ۇناتىپ قالعانىن ايتادى. ءسوز سوڭىندا اندرەي گولۋبەۆتىڭ الداعى 17-19 قىركۇيەك كۇندەرى استانادا دەۆيس كۋبوگى ءۇشىن ماتچ­تا شۆەيتسارياعا قارسى وينايتىن قازاقستان قۇراماسىنىڭ ساپىندا ونەر كورسەتكەلى تۇرعانىن ايتا كەتەيىك. سەرىك ءپىرنازار. استانا.