الماتى
قازاقستان ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ءىس باسىنداعى توراعاسى رەتىندە قىرعىزستانداعى جاعدايدى تەز ارادا قالپىنا كەلتىرۋ ءۇشىن قاجەتتى شارالاردى قولعا الىپ, كومەك قولىن سوزۋدا. سونىمەن قاتار كورشىلەس تۋىس مەملەكەت رەتىندە ونىڭ ەكونوميكاسىن بارىنشا قىسقا مەرزىمدە قالپىنا كەلتىرۋ ماقساتىندا بىرقاتار جۇمىستار اتقارىلۋدا. وعان مەملەكەت باسشىسى نۇرسۇلتان نازارباەۆتىڭ قيىن دا كۇردەلى جاعدايعا تاپ بولعان قىرعىز رەسپۋبليكاسىن وسىنداي كەزەڭدە قولداۋ ءۇشىن ارناۋلى گۋمانيتارلىق قور قۇرۋ تۋرالى ۇسىنىسى ايقىن دالەل بولا الادى.
ەلباسى بۇگىنگى كۇن تارتىبىندە تۇرعان مۇنداي ماڭىزدى ماسەلە جونىندە جاقىندا الماتىدا وتكەن ەقىۇ سىرتقى ىستەر مينيسترلەرىنىڭ بەيرەسمي كەزدەسۋىندە اتاپ ايتقان بولاتىن. سوعان وراي قازاقستان ۇكىمەتى كورشىلەس قىرعىز رەسپۋبليكاسىنا گۋمانيتارلىق كومەك كورسەتۋ تۋرالى شەشىم قابىلداپ, 11 ميلليون اقش دوللارىنا جۋىق قاراجات ءبولدى.
قر توتەنشە جاعدايلار مينيسترى ۆ.بوجكونىڭ ايتۋىنشا, ۇكىمەتتىڭ وسى قاۋلىسى اياسىندا قىرعىز اعايىندارعا كوپ ءمولشەردەگى ءتۇرلى تاۋارلار جىبەرۋ جوسپارلانىپ وتىر. تۇرمىسقا اسا قاجەت بۇل تاۋارلاردىڭ اراسىندا جىلۋ ەلەكتر ستانساسىن شيكىزاتپەن قامتاماسىز ەتۋ ءۇشىن كومىر, قۇرىلىس ماتەريالدارى – اعاش, مەتالل پروكاتى, شاتىرعا ارنالعان ماتەريالدار جانە ارينە وتە مول كولەمدەگى ازىق-ت ۇلىك تە بار. توتەنشە جاعدايلار مينيسترلىگىنىڭ وسىنداي ۇيعارىمىن ورىنداۋ ماقساتىندا مەملەكەتتىك ماتەريالدىق رەزەرۆ بويىنشا كوميتەت رەسپۋبليكالىق مەملەكەتتىك “رەزەرۆ” كاسىپورنىنا جوعارىدا كورسەتىلگەن بۇل تاۋارلاردى مەملەكەتتىك ماتەريالدىق رەزەرۆ قورىنان شىعارۋدى بۇيىرعان بولاتىن.
“بۇگىندە “رەزەرۆ” رەسپۋبليكالىق مەملەكەتتىك كاسىپورنىنىڭ الماتى فيليالى قىرعىزستانعا اۋقىمدى كولەمدەگى كۇرىشتى ارناۋلى جۇك ماشينەلەرىنە تيەپ ءجىبەرۋدە”, دەيدى فيليال ديرەكتورى بەيبىت يبراش ۇلى ءوز ويىن ورتاعا سالىپ. انىعىراق ايتقاندا, كەلەشەكتە 47 ۆاگوننان تۇراتىن تەمىرجول قۇرامىن جىبەرۋ جوسپارلانۋدا. ال مۇنىڭ, ياعني جۇكتىڭ اۋقىمى وتە ۇلكەن بولعاندىقتان ونى جونەلتۋ توتەنشە جاعدايلار مينيسترى ۆ.بوجكونىڭ باقىلاۋىندا بولماق.
سونداي-اق, ءمينيستردىڭ تىكەلەي تاپسىرماسى بويىنشا توتەنشە جاعدايلاردىڭ الماتى گارنيزونىنىڭ قوسىمشا قۇرامى دا ىسكە قوسىلادى. جۇك تيەۋگە ارنالعان ۆاگونداردى “قازاقستان تەمىر جولى” ۇك-نىڭ الماتى تەمىر جول باسقارماسى شۇعىل تۇردە ۇسىنباق. سونىمەن, قىرعىزستانعا قازاقستان حالقىنىڭ كومەگى ۋاقىتىندا جەتكىزىلەتىندىگىنە سەنىم مول.
باقىت بالعارينا.
* * *
سەمەي بىرىنە-ءبىرى جالعاسقان ساياسي دۇربەلەڭ مەن اعايىنارالىق جانجالداردىڭ سالدارىنان بۇگىندە ەكونوميكالىق جانە الەۋمەتتىك جاعدايى تىعىرىققا تىرەلىپ وتىرعان قىرعىز رەسپۋبليكاسىنا ءبىزدىڭ مەملەكەتىمىز تاراپىنان ماتەريالدىق تۇرعىدا ون ميلليوننان اسا اقش دوللارى كولەمىندە كومەك كورسەتىلەتىنى بەلگىلى. سوعان وراي جۋىردا قىرعىز ەلىنە اتتاندىرۋعا سەمەيدەن 4 ۆاگون قۇرىلىس جانە شارۋاشىلىق تاۋارلارى تيەلدى. مۇنىڭ باسىم بولىگى وسىندا وندىرىلگەن قۇرىلىس ماتەريالدارى. سونىڭ ىشىندە سەمەي شيفەرىنىڭ ورنى بولەك. مۇنىڭ سىرتىندا اعايىندارعا ارنالعان سالەمدەمە قۇرامىندا ءتۇرلى ازىق-ت ۇلىك بار. – مۇنداي سالەمدەمەلەر رەسپۋبليكا بويىنشا ءبىر جەرگە جيناقتالىپ, سونسوڭ ءتيىستى جەرگە ءجونەلتىلەتىن بولادى. بىراق بۇل يگىلىكتى ىستە ەش كىدىرىس بولمايتىندىعىنا سەنىمدىمىز, – دەيدى “بالقاش” رەسپۋبليكالىق مەكەمەسىنىڭ وسىنداعى فيليالىنىڭ باسشىسى نۇربەك ساعاديەۆ. ءسوز سوڭىندا مۇنداي كومەك ەلىمىزدىڭ مەملەكەتتىك ماتەريالدىق رەزەرۆىنەن جاسالىپ وتىرعانىن ايتا كەتكەنىمىز ءجون بولار. ءتوسكەيدە مالى, توسەكتە باسى قوسىلىپ جاتقان قىرعىز اعايىندارعا كومەك وسىلايشا ءوز جالعاسىن تابۋدا. داۋلەت سەيسەن ۇلى.
