باتىس قازاقستاندا اۋىل جولدارى رەسپۋبليكالىق مارتەبە الماق

ورال. 21 مامىر. باتىس قازاقستاندا وبلىس ورتالىعىنان ەڭ الىس جاتقان بوكەي وردا مەن جانىبەك اۋداندارىنا جەتكىزەتىن تاس جولدار رەسپۋبليكالىق ماڭىزعا يە بولماق. ناقتى ايتساق, اۋدان ورتالىقتارى سايحىن مەن جانىبەككە جەتكىزەتىن اۆتوجولدار رەسپۋبليكالىق بيۋدجەتتىڭ بالانسىنا كوشىرىلەدى. بۇل تۋرالى egemen.kz حابارلادى. باتىس قازاقستان وبلىستىق اۆتوموبيل جولدارى باسقارماسى باسشىسىنىڭ ورىنباسارى اسكەربەك جاقسىعۇلوۆتىڭ ايتۋىنشا, بۇل شالعاي وڭىردە ورنالاسقان تاس جولداردى جوندەۋ ءىسىن قارجىلاندىرۋدى جەڭىلدەتۋ ماقساتىنان تۋىنداپ وتىر. «بيىلعى جىلى وبلىس ورتالىعىنان جاڭاقالا اۋدانىنىڭ ورتالىعىنا دەيىنگى اۆتوجولعا جەرگىلىكتى بيۋدجەت قاراجاتى ەسەبىنەن كۇردەلى جوندەۋ جۇرگىزىلدى. ءارى قاراي جاڭاقالا مەن سايحىننىڭ ارالىعىندا 250 شاقىرىمعا سوزىلىپ جاتقان جايداق جول بار. ونى جوندەۋ ءۇشىن مول قاراجات كەرەك. ونداي قارجىنىڭ جەرگىلىكتى بيۋدجەتتەن تابىلا قويۋى ەكىتالاي. سوندىقتان وسى جولدى ورتالىققا بەرۋ جۇمىستارى جۇرگىزىلۋدە. ەگەر بۇل ارالىق رەسپۋبليكالىق ماڭىزعا يە بولسا, ونى ورتالىقتان قارجىلاندىرۋعا زاڭدى نەگىز قالانباق», – دەيدى باسقارما باسشىسىنىڭ ورىنباسارى. تەمىر قۇسايىن. دەرەك: egemen.kz. سۋرەت: mgorod.kz.