ۇشاقتا قىزاناق شىرىنى نەگە كوپ ىشىلەدى؟

كۇندەلىكتى ومىردە قانداي سۋسىن ىشەسىز؟ مىسالى, كافە-مەي­رام­حانالارعا بارعاندا نەمەسە قوناقتا بولعاندا. بايقاساڭىز, ادامدار كوبىنە الما مەن اپەلسين, مۋلتيۆيتامين سەكىلدى شىرىندى ىشەدى. بۇل جەردە قاراپايىم اۋىز سۋدان باسقا گازدالعان جانە ءتۇرلى قوسپاسى بار سۋسىنداردى ەسەپكە الىپ وتىرعانىمىز جوق. تويدا نە دوسىڭىزدىڭ ۇيىندە «ماعان قىزاناق شىرىنىن قۇيشى» دەگەن ادامدى سيرەك كەزدەستىرەتىنىڭىز انىق. بىراق وسى قىزاناق شىرىنى كوپ ىشىلەتىن جەر بار. قايدا؟ اسپاندا. ۇشاققا مىنگەن سايىن ءوز-ءوزى­مىزگە تاڭ قالامىز. سامساپ كەلگەن سۋسىننىڭ ىشىنەن بورتسەرىك قىزعا قىزاناق شىرىنىن بەرۋدى وتىنەمىز. ادەتتە, سۋسىننىڭ بۇل ءتۇرىن ىشپەيتىنىمىز بەلگىلى. ال كوكتە ءبىر ەمەس, بىرنەشەۋىن ىشەتىن كەزىمىز بولادى. سوسىن قىزاناق شىرىنىن سۇرايتىن جالعىز ءبىز ەمەس سەكىلدى. ۇشاققا ءار مىنگەن سايىن اينالامىزعا ءجىتى كوز تاس­تاپ وتىرامىز. جۇرتتىڭ باسىم بولىگى اتالعان سۋسىندى الدىرتىپ جاتادى. كەي كەزدەرى تاۋسىلىپ تا قالادى. نەگە دەيمىز عوي. بىلايعى كەزدە كەرەك ەتپەيتىن سۋسىنعا كوكتە كەلە جاتقاندا تابەتىمىزدىڭ تارتاتىنى نەسى؟ وسى سۇراقتىڭ جاۋابىن جاقىندا تاپتىق. Lufthansa اۋە كومپانياسى وسى ماسەلەنى ارنايى زەرتتەپتى. ءناتي­جەسىندە جولاۋشىنىڭ ءار ءتورتىنشىسى ءدال قىزاناق شىرىنىن ۇناتادى ەكەن. بۇل شامامەن كومپانيانىڭ قىزمەتىن پايدالاناتىن حالىقتىڭ 27 پايىزى. «نەگە؟» دەگەن سۇراققا ولار بىلاي دەپ جاۋاپ بەرگەن. سۇ­راۋ سالىنعانداردىڭ جارتىسى ۇنەمى قىزاناق شىرىنىن ءىشىپ جۇرگەندەرىن جەتكىزگەن. ءتورت­تەن ءبىرى ۇشاقتىڭ ىشىندە قىزا­ناق شىرىنى تاتتىرەك بولادى دەپ ەسكەرەتىندەرىن ايتقان. ال قالعان­دارى ەشبىر سەبەپتى ايتپاي, بولماسا جاي عانا باسقالارعا ۇقساپ, قايتالاپ تاپسىرىس بەرگەنىن جەت­كىزگەن. قاراپ وتىرساڭىز, جاۋاپ بىركەلكى ەمەس. ءارتۇرلى. دەگەنمەن, قىزاناق شىرىنىنىڭ اۋەدە ءجيى ىشىلەتىنى بەلگىلى بولىپ وتىر. قىزاناق شىرىنىنىڭ كوپشىلىك اراسىندا سونشالىقتى ۇنامدى بولۋىن وتە وڭاي تۇسىندىرۋگە بولادى. بيىكتىكتە قىسىمنىڭ ايىرماسىنا بايلانىستى استىڭ ءدامى تومەندەيدى دە, سوندىقتان تۇز بەن قانت ءوز كۇش­تەرىن 30 پايىزعا جوعالتادى. سونىڭ سالدارىنان قىزاناق شىرىنى جەردەن گورى, اۋەدە اناعۇرلىم تاتتىرەك بولادى ەكەن. ەرجان بايتىلەس, «ەگەمەن قازاقستان». قىزىلوردا.