مۇناي ەكسپورتتاۋدان ەل بيۋدجەتىنە 130 ميلليارد تەڭگە كولەمدە كىرىس ءتۇستى

اتىراۋ وبلىسىنان شەتەل نارىعىنا شىعا­رىلاتىن ءونىم كولەمى از ەمەس. اسىرەسە, شيكىزاتتىق مۇنايعا سۇرانىس ارتا تۇسۋدە. ماسەلەن, بيىلعى 4 ايدا مۇنايدى سىرتقى نارىققا ەكسپورتتاۋدان ەل بيۋدجەتىنە 130 ملرد. تەڭگە كولەمىندە كىرىس ءتۇسىپتى. – اعىمداعى جىلدىڭ 4 ايىندا اتىراۋ وبلىسىنان شيكى مۇنايدى سىرتقا شىعارۋدان مەملەكەت بيۋدجەتىنە 130 ملرد. تەڭگە كولەمىندە كىرىس ءتۇستى. بۇل كورسەتكىش وتكەن جىلدىڭ ءدال وسىنداي كەزەڭىمەن سالىستىرعاندا 35 پايىزعا ارتىق. «قارا التىننىڭ» ۇلەسى ەكسپورتتىڭ 99,6 پايىزىنا دەيىن ۇلعايدى. اتىراۋ وڭىرىنەن وندىرىلەتىن شيكى مۇنايدى ءىرى كولەمدە ساتىپ الۋشىلار قاتارىندا يتاليا, نيدەرلاند, فرانتسيا جانە تۇركيا بار. مۇناي ەكسپورتى اتىراۋ وڭىرىنەن قۇبىر جانە تەمىرجول كولىگى ارقىلى نوۆوروسسيسك, تامان, ۋست-لۋگا جانە پريمور پورتتارىنا جەتكىزىلىپ, ءارى قاراي سۋ كولىگىمەن ساتىپ الۋشى ەلدەرگە تاسىمالدانادى, – دەيدى اتىراۋ وبلىستىق مەملەكەتتىك كىرىس دەپارتامەنتىنە قاراستى ەنەرگەتيكالىق كەدەن بەكەتىنىڭ باسشىسى ەرلان امەنوۆ. قازىرگى ۋاقىتتا اتالعان كەدەن بەكەتىندە مەملەكەتتىك بيۋدجەتكە اسا كوپ كولەمدە كىرىس تۇسىرەتىن «تەڭىزشەۆرويل», «اناكو», «ماتەن پەترولەۋم» سەرىكتەستىكتەرى مەن «كاسپينەفت» اكتسيونەرلىك قوعامى سەكىلدى 40-قا جۋىق كاسىپورىن رەسىمدەلگەن. جولداسبەك شوپەعۇل, «ەگەمەن قازاقستان». اتىراۋ.