مەملەكەت باسشىسى پاكستان پرەمەر-مينيسترىمەن كەزدەستى

استانا. 26 تامىز. ەلباسى قازاقستانعا رەسمي ساپارمەن كەلگەن پاكستان يسلام رەسپۋبليكاسىنىڭ پرەمەر-ءمينيسترى ناۆاز شاريفپەن كەزدەستى. بۇل تۋرالى akorda.kz حابارلادى. كەزدەسۋدە ساۋدا-ەكونوميكالىق, كولىك-ترانزيتتىك, عىلىمي-تەحنيكالىق جانە مادەني-گۋمانيتارلىق سالالارداعى ەكىجاقتى ىنتىماقتاستىقتى نىعايتۋ ماسەلەلەرى تالقىلاندى. سونىمەن قاتار, حالىقارالىق كۇن تارتىبىندەگى وزەكتى جايتتار ءسوز بولدى. قازاقستان پرەزيدەنتى پاكستاننىڭ جۇيەلى دامۋىنداعى ن.ءشاريفتىڭ اتقارعان ءرولىن اتاپ كورسەتتى. «ءسىز كۇردەلى جاعدايدا ەلدە ەكونوميكالىق جانە ساياسي رەفورمالاردى تابىستى ىسكە اسىرىپ, پاكستاننىڭ بەدەلى مەن ءرولىن كوتەرەتىن بەلسەندى حالىقارالىق ساياسات جۇرگىزىپ وتىرسىز. قازاقستان مەن پاكستان ورنالاسقان ءوڭىردىڭ ەلدەرى ءوزارا ساۋدا جانە مادەني قارىم-قاتىناستار تۇرعىسىنان ءاردايىم تىعىز بايلانىستى بولدى. ىلگەرىدە ءسىز ءبىزدىڭ بۇرىنعى استانامىز الماتىعا كەلگەن بولاتىنسىز. سودان بەرگى از ۋاقىت ىشىندە ءبىز جاڭا ەلوردا سالدىق, ونى بۇكىل قازاقستاندىقتار ماقتان تۇتادى. بۇل قالا – ءبىزدىڭ تاۋەلسىزدىگىمىز بەن ەلىمىز ەگەمەندىك جىلدارىندا جەتكەن جەتىستىكتەردىڭ سيمۆولى», – دەدى مەملەكەت باسشىسى. ن.شاريف نۇرسۇلتان نازارباەۆقا شاقىرتۋى ءۇشىن العىس ايتىپ, ەكى حالىقتىڭ بايلانىستارىنىڭ سان عاسىرلىق تاريحى بار ەكەنىن اتاپ ءوتتى. «مەن ءسىزدىڭ كوشباسشىلىق قاسيەتىڭىزگە ءتانتىمىن جانە ءسىزدى ەرەكشە قابىلەت يەسى دەپ ەسەپتەيمىن. بۇگىندە استانادان ءبىزدىڭ كورەتىندەرىمىزدىڭ ءبارى – ءسىزدىڭ ەڭبەگىڭىز», – دەدى پاكستان پرەمەر-ءمينيسترى. سونىمەن قاتار, ن.شاريف نۇرسۇلتان نازارباەۆتى, سونداي-اق بۇكىل قازاقستان حالقىن قازاق حاندىعىنىڭ 550 جىلدىعىمەن جانە ەل كونستيتۋتسياسىنىڭ 20 جىلدىعىمەن قۇتتىقتادى. ايدار ورىسباەۆ. دەرەك, سۋرەت: akorda.kz.