دزيۋدو. سەرىك جاراسباەۆ: «باستى مىندەت – وليمپيادا جولداماسى»

استانا. 24 تامىز. بۇگىن استانادا دزيۋدودان الەم چەمپيوناتى باستالدى. سوعان وراي ورتالىق كوممۋنيكاتسيالار قىزمەتىندە جارىستىڭ ۇيىمداستىرىلۋ بارىسى جانە الەمدىك دودانىڭ حالىقارالىق ارەنادا قازاقستانعا تيگىزەر وڭ اسەرى تۋرالى جيىن ءوتتى. وعان مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى جونىندەگى كوميتەت توراعاسىنىڭ ورىنباسارى سەرىك جاراسباەۆ قاتىستى. بۇل تۋرالى egemen.kz حابارلادى. ونىڭ ايتۋىنشا, وتاندىق پالۋاندارعا قويىلار باستى تالاپ – الەمدىك رەيتينگتە ۇزدىك 22 سپورتشىنىڭ قاتارىنا قوسىلۋ. سەبەبى, مۇنداي ناتيجەگە قول جەتكىزگەن اتلەت كەلەسى جىلى ريو-دە-جانەيرو وليمپياداسىنا تىكەلەي جولداما الادى. سونداي-اق, توراعا ورىنباسارى استاناداعى دودا ويىندارعا قاتىسۋعا مۇمكىندىك بەرەتىن سوڭعى جارىس ەمەس ەكەنىن ايتتى. «وليمپياداعا جولداما حالىقارالىق دزيۋدو فەدەراتسياسىنىڭ رەيتينگىنە سايكەس بەرىلەدى. الەم چەمپيوناتىنان بولەك, ۇپاي الۋعا بولاتىن باسقا دا حالىقارالىق تۋرنيرلەر بار. دەگەنمەن, ءوز جەرىمىزدە وتكىزىلگەن دودادا سپورتشىلارىمىز ايانىپ قالمايدى. سەبەبى, ءدال وسى ءتۋرنيردىڭ ناتيجەسى بويىنشا ۇلتتىق قۇرامانىڭ نەگىزى جاساقتالادى», – دەدى سەرىك جاراسباەۆ. ايتا كەتەيىك, استاناداعى سايىستا 137 مەملەكەتتەن كەلگەن 823 اتلەت باق سىنايدى. ولاردىڭ 495-ءى ەرلەر بولسا, 328-ءى ايەلدەر. «الاۋ» مۇز ايدىنىندا وتكىزىلەتىن چەمپيونات 30 تامىزدا اياقتالادى. جارىستىڭ ترانسلياتسياسى 150 مەملەكەتكە تارايدى. ەلىمىزدە پالۋانداردىڭ بەلدەسۋلەرى KazSport تەلەارناسىنان تىكەلەي ەفيردە كورسەتىلەدى. ەلامان قوڭىر. دەرەك: egemen.kz. سۋرەت: worldjudo2015.kz.