جۇمىسپەن قامتۋ سالاسىنداعى جەتىستىكتەر

«جۇمىسپەن قامتۋ-2020 جول كارتاسى» باعدارلاماسىن ىسكە اسىرۋعا 2015 جىلى 37,3 ملرد. تەڭگە قاراستىرىلىپتى. بۇل تۋرا­لى ورتالىق كوممۋنيكاتسيالار قىزمەتىندە «جۇمىسپەن قامتۋ-2020 جول كارتاسى» باعدارلاماسىن ىسكە اسىرۋ بارىسى تۋرالى» تاقىرىبىندا وتكەن بريفينگتە دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى داۋلەت ارعىندىقوۆ مالىمدەدى. ۆيتسە-مينيستر بايانداماسىنىڭ باسىندا حالىقتى جۇمىسپەن قامتۋ سالاسىندا قازاقستاندا ناقتى جەتىستىكتەر بار ەكەنىن اتاپ كورسەتتى. جۇمىسسىزدىق دەڭگەيى 2008 جىلى 6,6 % بولسا, 2014 جىلدىڭ قورىتىندىسىندا 5%-عا تومەندەگەن. وسى كەزەڭ ىشىندە ەكونوميكالىق بەلسەندى تۇرعىندار سانى 500 مىڭ ادامعا ارتىپ, 9 ملن. ادامعا, جۇمىسپەن قامتىلعان تۇرعىندار سانى 7,8 ملن.-نان 8,5 ملن. ادامعا جەتىپتى. «ءبىزدىڭ ۇلتتىق ەڭبەك نارىعىمىزدا دا بەلگىلى ءبىر پروبلەمالار مەن قيىندىقتار بار. وڭ كورسەتكىشتەرگە قاراماستان, ءتيىمسىز جۇمىستىڭ ۇلەس سالماعى جوعارى بولىپ قالۋدا. حالىقارالىق ەڭبەك ۇيىمىنىڭ ۇسىنىستارىنا نەگىزدەلگەن ەڭبەك نارىعىنداعى كورسەتكىشتەردى ستاتيستيكالىق باعالاۋ ادىستەمەسىنە سايكەس, قازاقستاندا 2,4 ملن. ادام ءوزىن-ءوزى جۇمىسپەن قامتىعاندار ساناتىنا جاتادى. بۇل مالىمەتتەر بويىنشا, ءوزىن-ءوزى جۇمىسپەن قامتىعان تۇرعىندار اراسىندا مەملەكەتتىك قولداۋعا مۇقتاج 700 مىڭداي ادام بار», – دەدى ۆيتسە-مينيستر. «جۇمىسپەن قامتۋ-2020 جول كارتاسى» باعدارلاماسى اياسىندا جۇمىسپەن قامتۋ: ينفرا­قۇ­رىلىمدى جانە تۇرعىن ءۇي-كوم­مۋنالدىق شارۋاشىلىقتى دامىتۋ ارقىلى جۇمىسپەن قامتۋ, كاسىپكەرلىك باستاماشىلىقتى ىنتالاندىرۋ, جۇمىس بەرۋشىلەردىڭ ناقتى سۇرانىسىن ەسكەرە وتىرىپ, وقىتۋ جانە جۇمىسپەن قامتۋ مەن كوشۋگە كومەكتەسۋ سياقتى ءۇش باعىت بويىنشا ىسكە اسىرىلا­دى. ءبىرىنشى باعىت بويىنشا باع­دارلاما ىسكە اسىرىلا باستاعالى اۋىلدىق جەرلەردەگى 4 مىڭنان استام ينفراقۇرىلىمدىق جوبالار­دا 55 مىڭ جۇمىس ورنى اشىلدى. ەكىنشى باعىت بويىنشا ازاماتتارعا پايىزدىق مولشەرلەمەسى 6%-دان اسپايتىن, مولشەرى 3 ملن. تەڭگەلىك نەسيەلەر 5 جىل مەرزىمگە بەرىلەدى. 2011 جىلدان بەرى 28 مىڭ ازاماتقا نەسيە بەرىلىپ, ولار ءوز كەزەگىندە 26 مىڭعا تارتا قوسىمشا جۇمىس ورىندارىن اشتى. ءۇشىنشى باعىت بويىنشا باعدارلاما ىسكە اسىرىلا باستاعالى 121 مىڭ ادام كاسىبي وقۋمەن, وقۋىن اياقتاعان 105 مىڭ ادامنىڭ 87%-ى جۇمىسپەن قامتىلدى. مەملە­كەت سۋبسيديالاعان جۇمىس ورىن­دارىنا 132,5 مىڭ ادام باعىت­تالىپ, ولاردىڭ 67%-ى تۇ­راق­تى جۇمىسپەن قامتاماسىز ەتىلىپتى. «بيىل باعدارلامانى ءارى قاراي ىسكە اسىرۋعا 37,3 ملرد. تەڭگە قاراستىرىلدى. ونىڭ ىشىندە 13,8 ملرد. تەڭگە باعدارلامانىڭ ءبىرىنشى باعىتىن قارجىلاندىرۋعا ءبولىندى. سونىڭ اياسىندا 520 نىسانعا جوندەۋ جۇمىستارى جۇرگىزىلىپ, 30 نىساننىڭ قۇرىلىسى جالعاسادى. جۇمىسپەن قامتۋ ورتالىقتارى ارقىلى ولارعا 4 مىڭداي ادام ورنالاستىرىلدى. 3,3 مىڭ ءوزىن-ءوزى جۇمىسپەن قامتىعاندار مەن جۇمىسسىز ازاماتقا شاعىن نەسيە بەرۋگە 10 ملرد.-تان استام تەڭگە قاراستىرىلعان. ءۇشىنشى باعىت اياسىندا, اعىمداعى جىلى 1 مىڭنان استام ادام كاسىبي وقۋعا جىبەرىلىپ, جاستار مەن تۇرعىنداردىڭ ماقساتتى توپتارىنا جاتاتىن ازاماتتار ءۇشىن 13 مىڭنان كەم ەمەس جۇمىس ورنى قۇرىلدى», – دەدى داۋلەت ارعىندىقوۆ. سونداي-اق, «جۇمىسپەن قام­تۋ-2020 جول كارتاسى» باعدارلا­ما­سىنا قاتىسۋ ماسەلەلەرى بويىنشا اقپاراتتىق-ءتۇسىندىرۋ جۇمىستارىن جۇرگىزۋ ءۇشىن وڭىرلەردە الەۋمەتتىك قورعاۋ, جۇمىسپەن قامتۋ جانە وڭىرلىك بولىمشەلەرىنىڭ قىزمەتكەرلەرىنەن قۇرالعان 178 ارنايى موبيلدىك توپتار جاساقتالعانىن دا ايتتى. بريفينگ قورىتىندىسىندا ۆيتسە-مينيستر مەملەكەت باسشىسىنىڭ تاپسىرماسىمەن جۇمىس ورىندارىن ساقتاۋ جانە بوساعان جۇمىس­كەرلەردى جۇمىس­پەن قامتۋ ماسە­لەلەرى بويىنشا اكىمدىكتەر مەن كاسىپورىن جەتەك­شىلەرى اراسىنداعى ىنتىماقتاستىق جونىندە مەموران­دۋمدارعا قول قويۋ جۇمىسى جۇرگى­زىل­گەنىن ءما­لىمدەدى. بۇگىنگى تاڭدا وسىنداي 50 مىڭنان استام مەموراندۋمعا قول قويىلىپتى. تاراپتار ءوز ءمىن­دەت­تەمەلەرىن ورىنداعان جاعدايدا اتالعان شارالار 1,9 ملن. ادامنىڭ جۇمىس ورنىن ساقتاۋعا مۇمكىندىك بەرەدى ەكەن. بەرىك سادىر, «ەگەمەن قازاقستان».