كوكشەتاۋدا اكەسى ءوز بالاسىنا وتاشى بولىپتى

  كوكشەتاۋ. 19 تامىز. كوكشەتاۋدا جەتى جاسار بالا اكەسىنىڭ وزىمبىلەرلىگى سالدارىنان ومىرمەن قوشتاسا جازدادى. بۇل تۋرالى egemen.kz ءتىلشىسى حابارلادى. اقمولا وبلىستىق بالالار اۋرۋحاناسىنىڭ باس دارىگەرى قايىر ابدراحمانوۆتىڭ ايتۋىنشا, جەتكىنشەك اۋرۋحاناعا «جەدەل جاردەم» كولىگىمەن ءال ۇستىندە جەتكىزىلگەن ەكەن. قالا تۇرعىنىنىڭ 2008 جىلى تۋعان بالاسى اۋرۋحاناعا تاڭعى 05.00-دە اكەلىنگەن. شۇعىل تۇردە قايتا وتا جاساعان دارىگەرلەر وعان «تسيركۋمتسيزودان كەيىنگى قابىنۋ» (سۇندەتكە وتىرعىزۋ) دياگنوزىن قويىپتى. كەيىن انىقتالعانىنداي, بالاسىن «مۇسىلمان» ەتۋ نيەتىندەگى اكە وتاشىنى الىستان ىزدەمەي, ءوزى ىسكە كىرىسىپ كەتكەن. مۇنىڭ سوڭى قان كەتىپ, بالانىڭ قىزۋى كوتەرىلىپ, السىرەۋىنە اكەلىپ سوققان. اقىرى «قوجا اكە» جەدەل جاردەم شاقىرۋعا ءماجبۇر بولىپتى. قازىر بالا ۋچاسكەلىك دارىگەردەن كومەك الىپ ءجۇر. «مۇنداي جاعداي, ءتىپتى, كوپتى كورگەن دارىگەرلەردىڭ تاجىريبەسىندە كەزدەسپەگەن. وقيعاعا سەلقوس قاراۋعا بولمايدى. مۇنىڭ وكىنىشتى سالدارى بولۋى مۇمكىن ەدى. سوندىقتان پوليتسياعا, دەنساۋلىق ساقتاۋ باسقارماسىنا حابارلادىق. بالا اكەسىنىڭ قىلىعى كوپشىلىك تالقىسىنا ءتۇسۋى كەرەك», دەيدى قايىر حاميت ۇلى. باقبەرگەن امالبەك. دەرەك, سۋرەت: egemen.kz