ميلان. 27 ماۋسىم. بۇگىن جەرگىلىكتى ۋاقىت بويىنشا ساعات 10-دا (استانا ۋاقىتىمەن – 02:00) «EXPO Milano-2015» كورمەسىنىڭ ءباسپاسوز ورتالىعىندا قازاقستاننىڭ ۇلتتىق كۇنى رەسمي تۇردە اشىلدى. بۇل تۋرالى egemen.kz ءتىلشىسى حابارلادى.
سالتاناتقا قازاقستان پرەزيدەنتى نۇرسۇلتان نازارباەۆ پەن يتاليا اۋىل شارۋاشىلىعى ءمينيسترى ماۋريتسيو مارتينا قاتىسىپ, ءسوز سويلەدى. شارا ەكى ەلدىڭ گيمندەرى وينالىپ, مەملەكەتتىك تۋلارىنىڭ كوتەرىلۋىمەن اياقتالدى.
كەلەسى كەزەكتە مەملەكەت باسشىسى باستاعان دەلەگاتسيا كورمەدەگى قازاقستان پاۆيلونىن ارالاپ كوردى. بۇدان كەيىن يتاليا پاۆيلونىن اكت زالىندا وتكەن ەكى ەلدىڭ رەسمي جانە ىسكەر تۇلعالارىنىڭ بيزنەس-فورۋمىنا قاتىسۋىمەن بيزنەس-فورۋم ءوتتى. جيىنعا سونداي-اق قازاقستان پرەزيدەنتى نۇرسۇلتان نازارباەۆ پەن يتاليا پرەمەر-ءمينيسترى ماتەو رەنتسي قاتىستى. جيىن قورىتىندىسىندا مەملەكەت ارالىق 20-عا جۋىق بىرلەسكەن قۇجاتقا قول قويىلدى. ولاردىڭ جالپى سوماسى 500 ملن. اسا دوللاردى قۇرايدى.
ەكسپو اياسىندا كورمەگە قاتىسۋشى ەلدەردىڭ ۇلتتىق كۇندەرىن وتكىزۋ داستۇرگە اينالعان. Expo Milano 2015 كورمەسىنە قاتىسۋشى 147 ەلدىڭ 110-ىندا ءوز ەلدەرىنە ارنالعان پاۆيلوندار بار. قازىرگە دەيىن بۇلاردىڭ اراسىنداعى تۇرىكمەنستان, ماروككو, ارگەنتينا, تۋنيس, قىرعىزستان, كونگو جانە ۇلىبريتانيانىڭ ۇلتتىق كۇندەرىن وتكىزىپ ۇلگەرگەن.
ۇلتتىق كۇن – ءوز ەلىڭدى تانىستىرۋعا, ونىڭ تاريحى مەن داستۇرلەرى تۋرالى بايانداپ بەرۋگە مۇمكىندىك بەرەتىن ەكسپو كورمەلەرىنىڭ اجىراماس ءبىر بولىگى. قازاقستان دۇنيەجۇزىلىك كورمەگە 2005 جىلدان بەرى قاتىسىپ كەلەدى. الايدا, ءدال وسى جىلى ەلىمىزدىڭ پاۆيلونى ايرىقشا ورىنعا يە بولىپ وتىر. قازاقستان پاۆيلونىنىڭ EXPO Milano 2015 كورمەسىندەگى العاشقى ەكى اي ىشىندەگى جۇمىسى تۋريستەر مەن كورمە قوناقتارىنىڭ ەلىمىزگە دەگەن قىزىعۋشىلىقتارى اسا جوعارى ەكەندىگىن بايقاتتى.
نەمىستىڭ FactsandFiction كومپانياسى سالعان قازاقستان پاۆيلونى «قازاقستان – مۇمكىندىكتەر ەلى» دەگەن تاقىرىپ بويىنشا تانىستىرىلدى. يتاليانىڭ باق-تارى مالىمەتتەرىنە قاراعاندا, قازاقستان پاۆيلونى ادامدار ەڭ كوپ كەلەتىن پاۆيلونداردىڭ بەستىگىنە كىرىپ وتىر. مۇنى ءبىر مەزگىلدە 80 ادامدى قابىلداپ الا الاتىن پاۆيلونعا كەلۋشىلەر سانىنىڭ كۇنىنە 4500 ادامعا جەتەتىنىنەن دە بايقاۋعا بولادى. سونىمەن قاتار, يتالياندىق Reppublica گازەتىنىڭ پلاتفورماسىندا ۇيىمداستىرىلعان داۋىس بەرۋدىڭ ناتيجەسىندە الىنعان مالىمەتتەر بويىنشا قازاقستان پاۆيلونى بۇگىنگى كۇنگە دەيىن كولۋمبيادان كەيىن ەكىنشى ورىندى يەلەنىپ كەلدى.
قازاقستان پاۆيلونى ءوز الدىنا ەكى ماقساتتى قويىپ وتىر. ونىڭ ءبىرىنشىسى وزگەلەرگە ەلىمىزدى لايىقتى دەڭگەيدە تانىتىپ, دۇنيەجۇزىلىك جارمەڭكەدەگى باستى كورىكتى ورىنعا اينالۋ بولسا, ەكىنشىسى استانادا وتەتىن ەكسپو-2017 كورمەسىندە قوناقتاردى وسى كورمەدەن ەش كەم تۇسپەيتىن ۇلكەن شوۋ كۇتىپ تۇرعانىن دالەلدەۋگە سايادى.
«ەكسپو-نىڭ ميلاننان كەيىنگى كورمەسى استانادا وتەتىندىكتەن, قازاقستان پاۆيلونى ەكى مىندەتتى ويداعىداي اتقارىپ شىعۋى ءتيىس, ول ەكسپو-2015 كورمەسىندەگى باستى كورنەكى ورىن رەتىندە تانىلىپ, ەلىمىزدىڭ وسىنداي اۋقىمداعى ءىس-شارانى 2017 جىلى ءوز اۋماعىندا وتكىزۋگە دايىن ەكەندىگىن كورسەتۋى كەرەك», - دەپ اتاپ ءوتتى «Expo Milano 2015» دۇنيەجۇزىلىك كورمەسىندەگى قازاقستان رەسپۋبليكاسى ۇلتتىق سەكتسياسىنىڭ باس كوميسسارى انۋاربەك مۋسين.
كورمە جۇمىس جاساپ جاتقان ۋاقىت ىشىندە قازاقستان پاۆيلونىن بىرقاتار مەملەكەتتەردىڭ ساياسي, مادەني زيالى قاۋىم وكىلدەرى – موناكو حانزاداسى, قىتاي پرەمەر-ءمينيسترى, گەرمانيا, ۆەنگريا ەكونوميكا مينيسترلەرى, لوندون ءمارى كورۋگە كەلگەن.
3000-نان اسا شارشى مەتر اۋماقتى الىپ جاتقان ەكى قاباتتى عيمارات «جەر شارۋاشىلىعى», «مال شارۋاشىلىعى», «قازاقستان تۋرالى قىزىقتى دەرەكتەر», «قازاقستانداعى اكۆامادەنيەت», «قازاقستان ەكولوگياسى» جانە «اۋىلشارۋاشىلىقتىڭ كەلەشەگى» دەگەن ءتۇرلى تاقىرىپتارعا ارنالعان بىرنەشە ەكسپوزيتسيالىق ايماقتارعا بولىنگەن. پاۆيلونعا كەلۋشىلەر تابيعات جانە اۋىلشارۋاشىلىق قورلارىن قورعاۋ ماسەلەسىمەن, قازاقستان مادەنيەتىمەن جانە ەلىمىزدىڭ ۇمتىلىپ وتىرعان تۇراقتۋ دامۋ تۋرالى يدەيالارىمەن تانىسا الادى.
سوڭىنان قازاقستان ونەر شەبەرلەرى مەرەكەلىك كونتسەرت قويدى.
