ايتا كەتەيىك, بۇگىنگى كۇنگە دەيىن كىتاپحانانى 6 000 ادام كەلىپ كوردى. 150-دەن استام ەكسكۋرسيا وتكىزىلدى. ەلباسى كىتاپحاناسىنا اتباسىن تىرەگەن جوعارى مارتەبەلى قوناقتاردىڭ ىشىندە قىرعىزستان پرەزيدەنتى المازبەك اتامباەۆ, موناكو كنيازى البەر II, وزبەكستان پرەزيدەنتى يسلام كاريموۆ, رەسەي فەدەراتسياسىنىڭ پرەزيدەنتى ۆلاديمير پۋتين, بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو بار. كىتاپحانا قورىندا بۇل كۇندە 19 100-دەن اسا كىتاپ, 1 000 دانادان استام مەرزىمدىك باسپا ونىمدەرى مەن ەلەكتروندىق باسىلىمدار بار. كىتاپحانا قورى جۋىردا ن.ءا.نازارباەۆتىڭ «ماڭگىلىك ەل. گودى, راۆنىە ۆەكام. ەپوحا, راۆنايا ستولەتيام» دەگەن جاڭا باسىلىممەن تولىقتى.
بۇل – قازاقستاننىڭ تاۋەلسىزدىك جىلدارىندا وتكەن جاسامپاز جولىن جان-جاقتى كورسەتكەن العاشقى كىتاپ. سونداي-اق, بۇل رۋحاني وردادا سيرەك, كوللەكتسيالىق جانە كونە باسىلىمدار بار, سونىڭ ىشىندە: مەملەكەت باسشىسىنا ميلانداعى امبروزيان كىتاپحاناسى سىيعا تارتقان, لەوناردو دا ءۆينچيدىڭ ەسكيزدەرىنەن تۇراتىن البوم; 30 ساقتاۋ بىرلىگىنەن تۇراتىن قاسيەتتى قۇران باسىلىمدارىنىڭ كوللەكتسياسى; قازاق عارىشكەرى ت.مۇساباەۆ عارىشقا اپارىپ اكەلگەن قۇران; ەرتەرەكتە ورىس يمپەراتورى الەكساندر ءىى كىتاپحاناسىندا ساقتالىپ كەلگەن شلوسسەردىڭ بۇكىلالەمدىك تاريحى; ءبىر جارىم بەتى ءابىلحايىر حانعا ارنالعان, 1838 جىلى جارىق كورگەن ەنتسيكلوپەديالىق لەكسيكون.
پرەزيدەنتتىڭ جەكە كىتاپحاناسىن ن.ءا.نازارباەۆقا ءار جىلدارى جەتكىزىلگەن باسىلىمدار, قولتاڭبامەن سىيعا تارتىلعان كىتاپتار, سونداي-اق, ەلباسى ءوزى 60-جىلداردان باستاپ جيناعان جەكە ء(ۇي) كىتاپحاناسى قۇرايدى. قوردا نۇرسۇلتان نازارباەۆ قولدانعان, جۇمىس بارىسىندا ەرەكشەلەگەن, بەتىنە بەلگى قالدىرعان كىتاپتار ايرىقشا ورىن الادى. كىتاپحانادان امەريكالىق East View Information Services, Inc كومپانيالارىنىڭ, مەرزىمدىك باسىلىمدارىنىڭ ەلەكتروندىق مالىمەتتەر بازاسى, سونداي-اق, رەسەيلىك Polpred.com مالىمەتتەر بازاسى قولجەتىمدى. مۇندا ەلەكتروندىق كىتاپتار دا بار. تولىق ماتىندىك, انىقتاما-بيبليوگرافيالىق, رەفەراتتىق جۋرنالدار كوللەكتسيالارىنا قول جەتكىزۋگە بارلىق جاعداي جاسالعان. كىتاپحانا قورىندا بۇگىندە 400-گە جۋىق ەكسپونات بار. بۇلار – سىيلىقتار, ەلباسىنىڭ جەكە زاتتارى, ونەر بۇيىمدارى, تاريحي راريتەتتەر, ءتۇرلى ەلدەردىڭ مەملەكەت باسشىلارى مەن رەسمي وكىلدەرىنىڭ, حالىقارالىق كومپانيالار مەن ۇيىمداردىڭ, بەلگىلى مەملەكەت, ساياسات جانە قوعام قايراتكەرلەرىنىڭ, بەلگىلى سپورتشىلار مەن ونەر قايراتكەرلەرىنىڭ سىيلىقتارى. كىتاپحانادا ەكسپوزيتسيا اۋماقتارىن بەزەندىرۋ, مەملەكەتىمىزدىڭ اتاۋلى كۇندەرىنە جانە تاريحي ءمانى بار وقيعالارىنا بايلانىستى تاقىرىپتىق كورمەلەر دايىنداۋ جۇمىستارى تۇراقتى جۇرگىزىلەدى.
ەلباسى كىتاپحاناسىنىڭ ەكسپوزيتسيا-كورمە قىزمەتى ن.ءا.نازارباەۆتىڭ جاسامپاز ويلارى مەن باستامالارىن تاقىرىپتىق تۇرعىدان كورسەتۋگە باعىتتالعان. كەلۋشىلەر ەكسپوزيتسيادان مەملەكەت باسشىسىنىڭ تۇجىرىمدامالىق ويلارىنىڭ جان-جاقتى قىرلارىمەن, تاۋەلسىز قازاقستاننىڭ تابىستارىمەن جانە جەتىستىكتەرىمەن تەرەڭ تانىسا الادى. تاقىرىپتىق ەكسپوزيتسيانىڭ ەكسپوناتتارى تۇڭعىش پرەزيدەنتتىڭ قىزمەتىن ايشىقتايدى جانە مەملەكەت باسشىسىنىڭ كوپ قىرلى ءارى بىرەگەي تۇلعاسىن جان-جاقتى اشىپ كورسەتەدى.
راۋشان تاۋىرحانقىزى,
جۋرناليست.
