2026 جىلعى 15 ناۋرىزدا وتكەن جالپىۇلتتىق رەفەرەندۋمدا داۋىس بەرگەن قازاقستاندىقتاردىڭ باسىم بولىگى ۇسىنىلعان كونستيتۋتسيالىق وزگەرىستەردى قولداعان. ناقتىراق ايتقاندا, داۋىس بەرۋگە قاتىسقان ازاماتتاردىڭ 87,1 پايىزى جاڭا كونستيتۋتسيا جوباسىنا ء«يا» دەپ جاۋاپ بەرگەن. جالپى العاندا, رەفەرەندۋمعا 9,1 ميلليوننان استام ادام قاتىسقان, ولاردىڭ 7,9 ميلليونى وزگەرىستەردى قولداسا, 898 مىڭنان استام ازامات قارسى داۋىس بەرگەن. سونىمەن قاتار 127 868 بيۋللەتەن جارامسىز دەپ تانىلعان.
وسك توراعاسى اتاپ وتكەندەي, رەفەرەندۋم ناتيجەلەرى زاڭدى دەپ تانىلىپ, جاڭا كونستيتۋتسيا قابىلداندى. ءتيىستى شەشىم جاقىن ارادا رەسمي باسىلىمداردا جاريالانادى.
داۋىس بەرۋ كۇنى ەل بويىنشا ءتۇرلى ماسەلەلەرگە قاتىستى 35 ءوتىنىش تىركەلگەن. ولاردىڭ باسىم بولىگى استانا قالاسىندا (11 ءوتىنىش) تىركەلسە, الماتى قالاسىندا – 6, ماڭعىستاۋ وبلىسىندا – 4 ءوتىنىش تۇسكەن. سونداي-اق شىمكەنت قالاسى, اباي جانە قىزىلوردا وبلىستارىندا ءۇش-ۇشتەن ءوتىنىش قارالعان. ال الماتى, اقمولا, شىعىس قازاقستان, جامبىل جانە پاۆلودار وبلىستارىندا ءبىر-ءبىر وتىنىشتەن تىركەلگەن.
وتىنىشتەردىڭ مازمۇنى نەگىزىنەن رەفەرەندۋمنىڭ ءتارتىبى, داۋىس بەرۋ پروتسەسى, سايلاۋ ۋچاسكەلەرىن اۋىستىرۋ, داۋىس بەرۋ ورىندارىنىڭ ورنالاسۋى مەن زاڭ بۇزۋشىلىقتارعا قاتىستى بولعان. تەرريتوريالىق كوميسسيالار 33 وتىنىشكە قولدانىستاعى زاڭناماعا سايكەس تۇسىنىكتەمە بەرىپ, جاۋاپ قايتارعان.
سونىمەن قاتار داۋىس بەرۋ كۇنى سوت ورگاندارىنا ەكى تالاپ-ارىز جولدانعان. ونىڭ ءبىرى اقتوبە وبلىسىندا برايل قارپىمەن جازىلعان ترافارەتتىڭ وقىلماۋىنا قاتىستى بولسا, ەكىنشىسى استاناداعى ۋچاسكەدە باقىلاۋشىنى شىعارۋ شەشىمىنە بايلانىستى بولعان. الايدا سوت قاراۋى بارىسىندا ەكى ءىس بويىنشا دا تالاپتار نەگىزسىز دەپ تانىلىپ, قاناعاتتاندىرۋدان باس تارتىلعان.
جالپى العاندا, تىركەلگەن وتىنىشتەر مەن جەكەلەگەن ەسكەرتۋلەر رەفەرەندۋمنىڭ ءوتۋ بارىسىنا جانە ونىڭ قورىتىندى ناتيجەلەرىنە ايتارلىقتاي اسەر ەتپەگەن. بارلىق ماسەلەلەر زاڭ تالاپتارىنا سايكەس قارالىپ, ءتيىستى شەشىمدەر قابىلدانعان.
رەفەرەندۋمدا 17514 ادام ەسەپتەن شىعارۋ كۋالىكتەرىن العان. وسى ادامداردىڭ 16 594-ءى (94,7%) داۋىس بەرۋگە كەلگەن.
