ۇزدىك جۋرناليستەر پرەزيدەنت سىيلىقتارى جانە گرانتتارىمەن ماراپاتتالدى

استانا. 26 ماۋسىم. مەملەكەتتىك حاتشى گۇلشارا ابدىقالىقوۆا ەلدىڭ ۇزدىك جۋرناليستەرىنە قازاقستان رەسپۋبليكاسى پرەزيدەنتىنىڭ بۇقارالىق اقپارات قۇرالدارى سالاسىنداعى سىيلىقتارى مەن گرانتتارىن تاپسىردى جانە العىستارىن جاريالادى. بۇل تۋرالى akorda.kz حابارلادى. مەملەكەتتىك حاتشى ءراسىم بارىسىندا سىيلىق لاۋرەاتتارى مەن گرانت يەگەرلەرىن, مەملەكەت باسشىسىنىڭ العىسىن العان شىعارماشىلىق ۇجىمداردى, سونداي-اق, قازاقستاننىڭ بارشا جۋرناليستەر قاۋىمىن كاسىبي مەرەكەلەرى – بايلانىس جانە اقپارات قىزمەتكەرلەرى كۇنىمەن قۇتتىقتادى. «قازاقستاننىڭ بۇقارالىق اقپارات قۇرالدارى ازاماتتىق قوعامنىڭ ماڭىزدى بولشەگى رەتىندە بيلىك ورگاندارى مەن ەل ازاماتتارى اراسىنداعى دانەكەر قىزمەتىن اتقارىپ قانا قويمايدى, سونىمەن قاتار, رەسپۋبليكانىڭ بارلىق تابىستارى مەن جەتىستىكتەرىنە لايىقتى ۇلەس قوسادى, ورتاق شاڭىراعىمىزداعى تاتۋلىق پەن كەلىسىمدى نىعايتادى», – دەدى گ.ابدىقالىقوۆا. مەملەكەتتىك حاتشى قازاقستان حالقىن ۇيىستىرۋ, پاتريوتيزمگە تاربيەلەۋ, ەلىمىزدى ەڭ دامىعان 30 مەملەكەت قاتارىنا قوسۋ جونىندەگى ستراتەگيالىق مىندەتتەردى جۇزەگە اسىرۋ ىسىندە وتاندىق باق قىزمەتىنىڭ زور مانگە يە ەكەنىن اتاپ كورسەتتى. «قازاقستاننىڭ بۇقارالىق اقپارات قۇرالدارىنىڭ ساپاسى مەن كاسىبي تۇرعىدان جەتىلۋىن ىنتالاندىرۋ ءۇشىن مەملەكەت باسشىسىنىڭ ارناۋلى ماراپاتتارى تاعايىندالعان بولاتىن. وسى ماراپاتتاردى تاپسىرۋ ارقىلى ءبىز ەلدىڭ مەدياكەڭىستىگىنىڭ ەڭ لايىقتى, تالانتىن بارىنشا جارقىراتىپ كورسەتكەن وكىلدەرىن اتاپ وتەمىز, – دەدى مەملەكەتتىك حاتشى. مەملەكەت باسشىسىنىڭ وكىمىمەن قازاقستان رەسپۋبليكاسى پرەزيدەنتىنىڭ سىيلىقتارى جانبولات ءاليحان ۇلى اۋپباەۆقا – «ەگەمەن قازاقستان» رەسپۋبليكالىق گازەتىنىڭ باس رەداكتورىنا ۇلى وتان سوعىسىنداعى جەڭىستىڭ 70 جىلدىعىنا ارنالعان ماتەريالدار توپتاماسى جانە ۇلتتىق بۇقارالىق اقپارات قۇرالدارىن دامىتۋعا قوسقان زور شىعارماشىلىق ۇلەسى ءۇشىن; الەكسەي ۆلاديميروۆيچ پانعا (مارقۇم) – «ەكسپرەسس-ك» گازەتى رەداكتسياسى» جشس باس ديرەكتورىنا ەلدىڭ اقپاراتتىق كەڭىستىگى دەڭگەيىن ورىستەتۋگە باعىتتالعان قىزمەتى, وتاندىق جۋرناليستيكانى دامىتۋعا قوسقان ۇلەسى ءۇشىن بەرىلدى. گرانتتار زارينا گەورگيەۆنا ەسەكەەۆاعا (زارينا مۇحامەدالىگە) – «ارشا» مەدياستۋدياسىنىڭ پروديۋسەرىنە رەسپۋبليكانىڭ الەۋمەتتىك-ەكونوميكالىق دامۋى جانە مونوقالالارىن مەملەكەتتىك قولداۋ تۋرالى «24 KZ» تەلەارناسىنداعى «بولشيە گورودا» – «دارحان قالا» اتتى اۆتورلىق جوباسى ءۇشىن; رينات دۋمان ۇلى كەرتاەۆقا – «حابار» اگەنتتىگى» اق «حابار» تەلەارناسى باعدارلامالار ءوندىرىسى ديرەكتسياسىنىڭ باس پروديۋسەرىنە قازاقستاندىق تەلەۆيزيانى دامىتۋعا قوسقان شىعارماشىلىق ۇلەسى ءۇشىن تاپسىرىلدى. پرەزيدەنتتىڭ العىستارى «دوستىق-درۋجبا» رەسپۋبليكالىق قوعامدىق-ساياسي جۋرنالىنىڭ شىعارماشىلىق ۇجىمىنا قازاقستاندىق ءپاتريوتيزمدى قالىپتاستىرۋعا, قوعامداعى ەتنوسارالىق كەلىسىمدى نىعايتۋعا قوسقان ەلەۋلى ۇلەسى ءۇشىن; «جەتىسۋ» وڭىرلىك قوعامدىق-ساياسي گازەتىنىڭ شىعارماشىلىق ۇجىمىنا وڭىردە مەملەكەتتىك باعدارلامالاردىڭ ورىندالۋ بارىسىن تەرەڭ ءارى جان-جاقتى جاريالاپ-كورسەتكەنى ءۇشىن; «قازاقستان» ۇلتتىق تەلەارناسىنىڭ شىعارماشىلىق ۇجىمىنا مەملەكەتتىك ساياساتتىڭ جۇزەگە اسىرىلۋ بارىسىن بەلسەندى جاريالاپ كورسەتكەنى جانە وتاندىق اقپارات كەڭىستىگىن دامىتۋعا قوسقان زور ۇلەسى ءۇشىن; ««كوكجيەك» جانە «وت ي دو» راديوباعدارلامالارىنىڭ شىعارماشىلىق ۇجىمىنا ەۋرازيالىق ەكونوميكالىق وداق جۇمىسى اياسىندا ماڭىزدى مەملەكەتتىك باعدارلامالاردىڭ جۇزەگە اسىرىلۋ بارىسىن جاريالاپ-كورسەتكەنى («نوۆوستي-كازاحستان» اقپارات اگەنتتىگى مەن «استانا» راديوسىنىڭ بىرلەسكەن جوباسى) ءۇشىن; «قازاقستان رەسپۋبليكاسى پرەزيدەنتىنىڭ تەلەراديوكەشەنى» كوممەرتسيالىق ەمەس اكتسيونەرلىك قوعامىنىڭ شىعارماشىلىق ۇجىمىنا قازاقستان تۋرالى وزەكتى تەلەۆيزيالىق جوبالار جاساۋ ارقىلى وتاندىق قۇجاتتانۋ سالاسىن دامىتۋعا قوسقان ەلەۋلى ۇلەسى ءۇشىن; «ءتىل» اقپاراتتىق-ساراپتامالىق جۋرنالىنىڭ شىعارماشىلىق ۇجىمىنا الەۋمەتتىك-ەكونوميكالىق رەفورمالاردىڭ جۇزەگە اسىرىلۋ بارىسىن, مەملەكەتتىك ءتىلدى جانە ۇلتتىق مادەنيەتتى دامىتۋ ماسەلەلەرىن بەلسەندى جاريالاپ-كورسەتكەنى ءۇشىن; «Vesti.kz» اقپاراتتىق-سپورت پورتالىنىڭ ۇجىمىنا سالاماتتى ءومىر سالتىن كەڭىنەن ناسيحاتتاعانى, قازاقستاننىڭ سپورت جۋرناليستيكاسىن دامىتۋعا قوسقان ۇلەسى ءۇشىن جاريالاندى. ەلامان قوڭىر. دەرەك: akorda.kz. سۋرەت: egemen.kz.