جامبىل وبلىسى اكىمىنىڭ ورىنباسارى تاعايىندالدى

تاراز. 25 ماۋسىم. جامبىل وبلىسى اكىمىنىڭ وكىمىمەن ابدالى نۇراليەۆ وبلىس اكىمىنىڭ ورىنباسارى بولىپ تاعايىندالدى. بۇل تۋرالى وبلىستىق اكىمدىكتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. ابدالى نۇراليەۆ 1959 جىلى تۋعان. 1981 جىلى جامبىل جەڭىل جانە تاماق ونەركاسىبى تەحنولوگيالىق ينستيتۋتىن ينجەنەر-مەحانيك ماماندىعى بويىنشا بىتىرگەن, تەحنيكا عىلىمدارىنىڭ كانديداتى. ەڭبەك جولىن 1981 جىلى تورعاي وبلىسىنىڭ جاقسىن ەلەۆاتورىندا شەبەر بولىپ باستاعان. 1983-1987 جىلدارى چەلگاشينسكي ەلەۆاتورىنىڭ باس ينجەنەرى, 1987-1988 جىلدارى دەرجاۆينسكي ەلەۆاتورىنىڭ ديرەكتورى, 1988-1989 جىلدارى چەلگاشينسكي ەلەۆاتورىنىڭ ديرەكتورى, 1989-1996 جىلدارى بۋرنىي استىق قابىلداۋ كاسىپورنىنىڭ ديرەكتورى, 1996-2001 جىلدارى «التىن ءدان» اق-نىڭ پرەزيدەنتى, 2001-2003 جۋالى اۋدانى اكىمىنىڭ ورىنباسارى, 2003-2007 جىلدارى بايزاق اۋدانىنىڭ اكىمى, 2007-2012 جىلدارى ت.رىسقۇلوۆ اۋدانىنىڭ اكىمى قىزمەتتەرىن اتقارعان. 2012 جىلدىڭ قىركۇيەگى مەن 2015 جىلدىڭ ماۋسىمى ارالىعىندا جامبىل وبلىسى اكىمدىگىنىڭ اۋىل شارۋاشىلىعى باسقارماسىنىڭ باسشىسى قىزمەتىن اتقارىپ كەلدى. ورالحان ءداۋىت. دەرەك, سۋرەت: egemen.kz.