تالقىلاۋ بارىسىندا IT-قوعامداستىق پارتيالاستاردىڭ ەل اۋماعىنداعى ءار اۋداندا ءوز IT-حابىن قۇرۋ يدەياسىنا قولداۋ ءبىلدىردى. سونداي-اق كەزدەسۋگە قاتىسۋشىلار پرەزيدەنت ءوز جولداۋىندا جانە ۇلتتىق قۇرىلتايدىڭ V وتىرىسىندا بارلىق سالادا يننوۆاتسيالىق تسيفرلىق شەشىمدەر مەن جاساندى ينتەللەكتىنى ەنگىزۋ بويىنشا اۋقىمدى مىندەتتەر قويعانىن اتاپ ءوتتى.
ءوز كەزەگىندە ءماجىلىس سپيكەرى, «Amanat» پارتياسىنىڭ توراعاسى ەرلان قوشانوۆ پارتيا پرەزيدەنت ساياساتىن جۇزەگە اسىرۋ ىسىنە بەلسەندى اتسالىسىپ كەلە جاتقانىن اتاپ ءوتتى. بۇگىندە ەلىمىز تسيفرلاندىرۋ باعىتىندا جوعارى كورسەتكىشتەرگە قول جەتكىزدى. ياعني بۇۇ يندەكسىنە سايكەس, قازاقستان ەلەكتروندىق ۇكىمەتتى دامىتۋ دەڭگەيى بويىنشا 24-ورىندا تۇر.
«تسيفرلاندىرۋ مەن جاساندى ينتەللەكت – تەك سالالىق ماسەلە عانا ەمەس, تۇتاس ەلدىڭ دامۋىنا ىقپال ەتەتىن اۋقىمدى, سەرپىندى باعىت. مەملەكەت باسشىسىنىڭ ءوزى بۇل سالاداعى ىرگەلى ىستەرگە تىكەلەي باستاماشى بولىپ, ەرەكشە باقىلاۋىندا ۇستاپ وتىر. جاڭا تسيفرلىق تەحنولوگيالار مەن جاساندى ينتەللەكت حالقىمىزعا, ەلىمىزدىڭ بولاشاعىنا جۇمىس ىستەۋى كەرەك. ءار ازامات, ءار وتباسى, كۇللى قوعام ونىڭ پايداسىن سەزىنۋى قاجەت. «Amanat» پارتياسى پرەزيدەنتىمىزدىڭ قوعامدىق-ساياسي تىرەگى رەتىندە وسى جۇمىستىڭ الدىڭعى شەبىندە جۇرۋگە ءتيىس», دەدى ول.
ءماجىلىس سپيكەرى «Amanat» پارتياسى جاڭا تسيفرلىق مادەنيەتتى قالىپتاستىرۋعا باعىتتالعان بىرقاتار باستامانى جۇيەلى جۇزەگە اسىرىپ جاتقانىن اتاپ ءوتتى. اتاپ ايتقاندا, «تسيفرلىق قوعام» جوباسى ەلىمىزدىڭ بارلىق ءوڭىرىن قامتىپ, تسيفرلىق ساۋاتتىلىقتى ارتتىرۋعا, سونداي-اق ازاماتتاردى تسيفرلىق تەحنولوگيالاردى كۇندەلىكتى ومىردە قاۋىپسىز ءارى سانالى تۇردە قولدانۋعا ۇيرەتۋ باعىتىندا قولعا الىنىپ وتىر. جوبا اياسىندا تۇرعىنداردىڭ الەۋمەتتىك تۇرعىدا وسال توبىنا – زەينەتكەرلەرگە, كوپبالالى انالارعا, جۇمىسسىز ازاماتتارعا, ەرەكشە قاجەتتىلىگى بار ادامدارعا ەرەكشە نازار اۋدارىلادى.
وتىنىشتەردى وڭدەۋدىڭ بىرىڭعاي تسيفرلىق جۇيەسىن ەنگىزۋ جانە كەڭەس بەرۋ ماقساتىندا چات-بوتتاردى پايدالانۋ ارقىلى «قارىزسىز قوعام» جوباسى تىڭ سەرپىن الدى. تەك بىلتىردىڭ وزىندە بۇل جوبا اياسىندا 800 مىڭنان استام ادام وقۋدان ءوتىپ, زاڭگەرلىك قولداۋ كورسەتىلدى.
سونىمەن قاتار «Amanat» پارتياسى فراكتسياسىنىڭ دەپۋتاتتارى تسيفرلىق كودەكس پەن «جاساندى ينتەللەكت تۋرالى» زاڭ جوباسىن ازىرلەۋگە باستاماشى بولدى. بۇل قۇجاتتار ەلىمىزدە جاساندى ينتەللەكتىنى, پلاتفورمالىق ەكونوميكانى جانە اۋقىمدى دەرەكتەرمەن جۇمىس ىستەۋدى دامىتۋ ءۇشىن زاماناۋي قۇقىقتىق نەگىز قالىپتاستىرۋعا مۇمكىندىك بەردى.
تالقىلاۋ بارىسىندا قاتىسۋشىلار «Amanat» پارتياسى تسيفرلىق تەحنولوگيالار مەن جاساندى ينتەللەكتىنى ەنگىزۋ ىسىندە مەملەكەت, قوعام, ساراپشىلار مەن بيزنەستىڭ كۇش-جىگەرىن بىرىكتىرۋگە ءتيىس ەكەنىن اتاپ ءوتتى. وسى ماقساتتا پارتيا جانىنان تسيفرلىق كوميسسار پوزيتسياسىن قۇرۋ تۋرالى ۇسىنىس ايتىلدى. بۇل لاۋازىمعا ءماجىلىس دەپۋتاتى ەكاتەرينا سمىشلياەۆا ۇسىنىلدى.
مۇنداي قوعامدىق لاۋازىم تسيفرلىق ورتادا ازاماتتاردىڭ قۇقىعىن قورعاۋ تەتىگىنە اينالىپ, جاڭا تسيفرلىق جاعدايدا ءاردايىم ادام جاعىندا بولادى. تسيفرلىق كوميسسار ەلىمىزدىڭ بارلىق وڭىرىندە IT سالاسىنداعى دارىندى جاستاردى قولداۋ جۇمىسىن ۇيلەستىرىپ, شالعاي اۋىلداردى ينتەرنەتپەن قامتۋ بارىسىنا باقىلاۋدى كۇشەيتەدى.
ءوز كەزەگىندە, پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ مەملەكەتتىك جانە قارجى سەكتورلارىنداعى تسيفرلىق ترانسفورماتسيانىڭ جوعارى قارقىنىن اتاپ ءوتتى. ول تۇرعىنداردىڭ تسيفرلىق ساۋاتىن ارتتىرۋ ماقساتىندا جاساندى ينتەللەكت مينيسترلىگى مەن «Astana Hub» ەل اۋماعىندا وقىتۋ كۋرسىن وتكىزۋ ىسىندە پارتياعا قولداۋ كورسەتۋگە ءازىر ەكەنىن مالىمدەدى.
وتىرىس بارىسىندا بىرقاتار مازمۇندى ۇسىنىس ايتىلدى. ماسەلەن, حالىقارالىق IT-ساراپشى اندرەي بيكلەميشەۆ تسيفرلاندىرۋ, ەڭ الدىمەن, دەرەكتەر ساپاسى مەن كادرلىق الەۋەتكە تىكەلەي تاۋەلدى ەكەنىن اتاپ ءوتىپ, وڭىرلەردە ءالى دە دەرەكتەردى قولمەن ەنگىزۋ تاجىريبەسى مەن مامان تاپشىلىعى ساقتالىپ وتىرعانىنا نازار اۋداردى.
قازاقستان IT-قاۋىمداستىعىنىڭ توراعاسى ايىمگۇل ءابىلوۆا ينۆەستيتسيالىق احۋالدى جاقسارتۋ ءۇشىن مەملەكەت-جەكەمەنشىك ارىپتەستىك تەتىكتەرىن كەڭەيتۋ جانە سالاداعى ەكونوميكالىق داۋلاردى قىلمىستىق سيپاتتان ارىلتۋ قاجەت ەكەنىن ايتتى.
قوستاناي وبلىسى اقپاراتتاندىرۋ باسقارماسىنىڭ باسشىسى ازامات كاشيەۆتىڭ پىكىرىنشە, قالالارداعى ءىرى وزگەرىستەر الدىن الا تسيفرلىق ورتادا مودەلدەنىپ, ءوڭىردىڭ بىرىڭعاي تسيفرلىق ارحيتەكتۋراسىنا ەنگىزىلۋى قاجەت. سولاي بولا تۇرا, «اقىلدى قالالار» مەن «اقىلدى وڭىرلەر» تۇجىرىمدامالارى ءار اۋماقتىڭ ەرەكشەلىگىن ەسكەرىپ, بەيىمدەۋگە بولاتىن ۇلگىلىك تسيفرلىق شەشىمدەر كىتاپحاناسىنا سۇيەنۋگە ءتيىس.
كەزدەسۋ قورىتىندىسى بويىنشا ەلىمىزدەگى تسيفرلاندىرۋ مەن جاساندى ينتەللەكتىنى دامىتۋعا قوسقان ۇلەسى ءۇشىن پارتيا مۇشەلەرىنە, سەرىكتەستەر مەن ساراپشىلارعا العىسحاتتار تابىستالدى.
ءىس-شاراعا ءماجىلىس دەپۋتاتتارى, سالالىق ۆەدومستۆولاردىڭ وكىلدەرى, ساراپشىلار جانە تسيفرلىق جوبالاردىڭ جەتەكشىلەرى قاتىستى. ونلاين فورماتتا وڭىرلەر مەن پارتيا فيليالدارىنىڭ وكىلدەرى تالقىلاۋعا قوسىلدى.
