ءبىر كۇن بۇرىن شيرەك فينالدىق ويىندا الەمنىڭ ەكىنشى راكەتكاسى يگا شۆەنتەكتى 7:5, 6:1 ەسەبىمەن ۇتقان ەلەنا بۇل ماچتى دا سەنىمدى باستاعان ەدى. ءبىرىنشى سەتتى ەشقانداي قيىندىقسىز ەركىن ەڭسەردى. ەكىنشى سەتتە 5:3 ەسەبىمەن الدا تۇرىپ, قارسىلاستىڭ سوققىسىندا ءۇش ماتچبولدى پايدالانا المادى. ءسويتىپ, سەت تاي-برەيككە ۇلاستى. مۇندا دا تارازى باسى ەكى جاققا كەزەك اۋدى. پەگۋلا ءتىپتى ەكى سەتبولعا قول جەتكىزدى. دەگەنمەن ەلەنا سالقىنقاندىلىق تانىتىپ, ويىندى ەكى سەتتە اياقتادى, تاي-برەيكتىڭ ەسەبى – 9:7.
ە.رىباكينا فينالدا ەجەلگى قارسىلاسى, الەمنىڭ ءبىرىنشى راكەتكاسى, بەلارۋستىك ارينا سوبولەنكومەن كەزدەسەدى. ويىن سەنبى كۇنى وتەدى. بۇل ەكى تەننيسشى وسىدان ءۇش جىل بۇرىن, 2023 جىلى دا اۋستراليا اشىق بىرىنشىلىگىنىڭ فينالىندا ويناعان. وندا ەلەنا ءۇش سەتتە جەڭىلىپ قالعان ەدى. ەسەسىنە وتكەن جىلدىڭ قورىتىندى ءتۋرنيرىنىڭ فينالىندا ارينانى ەكى سەتتە ۇتتى. بۇل جولى دا ەلەنانىڭ ايى وڭىنان تۋسىن دەپ تىلەلىك.
سونداي-اق ەلىمىزدىڭ جۇپتاسىپ ونەر كورسەتۋ شەبەرى اننا دانيلينا دا «Australian Open» فينالىنا شىقتى. اننا سەرب تەننيسشىسى الەكساندرا كرۋنيچپەن بىرگە بۇگىن ەليزە مەرتەنس (بەلگيا)/شۋان چجاي (قىتاي) جۇبىنا قارسى ويىندا باس جۇلدەنى ساراپقا سالادى.
