ىستامبۇل اۋەجايىندا رەسەي اكتەرى ۇشتى-كۇيلى جوعالىپ كەتتى

استانا. 24 ناۋرىز. تۇركيادا ماسكەۋدىڭ «ساتيريكون» تەاترىنىڭ قىزمەتكەرى مارك يشمۋحامەتوۆ جۇمباق كۇيدە جوعالىپ كەتتى. تۋعان-تۋىستارى ودان 20 كۇننەن بەرى حات-حابار الا الماي وتىر. ىزدەۋ شارالارىنا ىستامبۇلداعى رەسەي كونسۋلدىعى دا ارالاستى. الايدا, ءالى ناقتى دەرەك جوق. بۇل تۋرالى vesti.ru حابارلادى. تۋىستارىنىڭ ايتۋىنشا, يشمۋحامەتوۆ تۇركياعا 3 ناۋرىزدا تەاتردىڭ شىعارماشىلىق قۇرامىمەن بىرگە كەتكەن. ترۋپپا ىستامبۇل ارقىلى برازيلياعا ۇشۋى كەرەك بولعان. سەبەبى, تەاتردىڭ لاتىن امەريكاسىندا گاسترولدىك ساپارى جوسپارلانعان. الدىن الا بەلگىلى بولعان مالىمەتتەرگە سۇيەنسەك, يشمۋحامەتوۆ تولقۇجاتىن جوعالتىپ الۋىنا بايلانىستى اۋەجايدىڭ ترانزيتتىك ايماعىندا قالىپ قويعان. 9 ناۋرىزدا تەاتر ۇجىمى برازيليادان ورالعان كەزدە ماركپەن بايلانىسقا شىعا الماعان. اۋەجايدان دا تاپپاعان. ارادا ءبىر اپتا وتكەن كەزدە الەۋمەتتىك جەلىلەر ارقىلى ىزدەۋ جاريالاعان. ولار ماركپەن سوڭعى ساتكە دەيىن حابارلاسىپ تۇرعان. «4 ناۋرىز كۇنى ۇيالى تەلەفونىنا قوڭىراۋ شالعانىمىزدا تۇتقانى بوگدە ادام كوتەردى. اعىلشىنشاسى سونشالىقتى جاقسى ەمەس ەكەن. ونىڭ ايتقانىنان ۇيالى تەلەفوندى تاۋىپ العانىن ۇقتىق», – دەيدى ارىپتەستەرىنىڭ ءبىرى. جوعالعان تەاتر قىزمەتكەرىنىڭ دوستارى تۇركيا پوليتسياسىنا جانە رەسەيدىڭ ىستامبۇلداعى كونسۋلدىعىنا حابارلاستى. «ول جاقتىڭ پوليتسياسى ماركتىڭ اۋەجايدان تابىلماعانىن جانە تۇركيادان باسقا ەلگە شىقپاعانىن ايتتى. سەبەبى, ول شەكارانى كەسىپ وتپەگەن. بۇل جايت ءبىزدى قاتتى الاڭداتىپ وتىر. سەبەبى, ترانزيتتىك ايماقتان ادامنىڭ جوعالۋى مۇمكىن ەمەس», – دەيدى يشمۋحامەتوۆتىڭ قۇربىسى. ماركتىڭ تۇركيا شەكاراسىنان ەشقايدا شىقپاعانىن ىستامبۇلداعى رەسەي كونسۋلدىعىنىڭ ءباسپاسوز-اتتاشەسى اندرەي ەگوروۆ تا راستاپ وتىر. «ەگەر ادام اۋەجايعا كەلىپ تۇرىپ, ترانزيتتىك ايماقتا تولقۇجاتىن جوعالتىپ السا, ول سول جەردەن ەشقايدا كەتە المايدى. دەگەنمەن, سول ايماقتى بۇگىنگە دەيىن سان مارتە قاراپ, تەكسەرگەنىمىزبەن ونى تابا الماي وتىرمىز», – دەيدى اندرەي ەگوروۆ. ىزدەۋ جۇمىستارىنا انكاراداعى رەسەي ەلشىلىگى دە ارالاسۋدا. دەگەنمەن, بۇل ءىس ازىرگە جۇمباق كۇيىندە قالىپ وتىر. ەلامان قوڭىر. دەرەك: vesti.ru. سۋرەت: euromag.ru.