قىزىلوردا. 12 مامىر. قىزىلوردا وبلىسى شيەلى اۋدانى ش.قودامانوۆ اۋىلىندا جەڭىس كۇنىنە وراي 150 ورىندىق اۋىلدىق كلۋب اشىلدى. بۇل تۋرالى egemen.kz ءتىلشىسى حابارلادى.
شاراعا ارداگەرلەر مەن اۋىل تۇرعىندارى قاتىستى. وبلىس اكىمى قىرىمبەك كوشەرباەۆ بارشا اۋىل تۇرعىندارىن جەڭىستىڭ 70 جىلدىعىمەن قۇتتىقتاپ, جاڭادان ىسكە قوسىلعان مادەني وشاقتىڭ جۇمىسىمەن تانىستى.
«ەلباسىنىڭ قامقورلىعىنىڭ ارقاسىندا ءبىزدىڭ ەلىمىزدە مادەنيەت سالاسىن دامىتۋعا قاجەتتى جاعدايلاردىڭ بارلىعى جاسالعان. اسىرەسە, اۋىلدىڭ مادەنيەتىن كوتەرۋ, كوركەيتۋ – باستى مىندەتتەردىڭ ءبىرى. بۇل باعىتتاعى جۇمىستار سىر وڭىرىندە جۇيەلى جۇزەگە اسۋدا», – دەدى ايماق باسشىسى.
شارا بارىسىندا وبلىس اكىمى ۇلى وتان سوعىسىنىڭ ارداگەرلەرى ب.دۇيسەنوۆ پەن ۆ.كريۆەنكوعا «جەڭىستىڭ 70 جىلدىعى» مەدالىن تابىس ەتتى.
ەكى قاباتتان تۇراتىن عيمارات زاماناۋي تالاپقا ساي سالىنعان. كلۋبتا مىڭنان استام قورى بار كىتاپحانا جانە سۋرەت, مۋزىكالىق ءبىلىم بەرەتىن ۇيىرمەلەر جۇمىس جاسايتىن بولادى.
ايتا كەتيىك, بيىل وبلىس بويىنشا 8 مادەني نىساننىڭ قۇرىلىسىنا مەملەكەتتىك قازىنادان 3 ميلليارد تەڭگە قارجى ءبولىنىپ وتىر. ونىڭ ىشىندە 7 اۋىلدىق كلۋب جانە مۇراجاي مەن كىتاپحانا قۇرىلىسى دا بار. جىل سوڭىنا دەيىن وبلىس بويىنشا وسىنداي 6 نىسان پايدالانۋعا بەرىلەدى دەپ جوسپارلانۋدا.
ەرجان بايتىلەس.
دەرەك: egemen.kz.
سۋرەت: باعدات ەسجانوۆ.
