تارازدا ىبىرايىم سۇلەيمەنوۆكە ەسكەرتكىش ورناتىلدى

تاراز. 12 مامىر. ۇلى وتان سوعىسىنىڭ داڭقتى جاۋىنگەرلەرىنىڭ ءبىرى, اتاقتى مەرگەن ىبىرايىم سۇلەيمەنوۆكە ەسكەرتكىش ورناتىلدى. بۇل تۋرالى egemen.kz ءتىلشىسى حابارلادى. ۇلى وتان سوعىسىنىڭ تاريحىنا كوز جۇگىرتەر بولساق, 1941 جىلى قىزىل ارميا قاتارىنا شاقىرىلىپ, مەرگەندىكتى يگەرگەن ى.سۇلەيمەنوۆ كالينين مايدانىندا بولعان العاشقى شايقاستاردىڭ وزىندە ۆينتوۆكاسىمەن 79 ءفاشيستى جەر جاستاندىرعان. ۆەليكيە لۋكي قالاسى ءۇشىن بولعان شايقاستا 60 جاۋدىڭ كوزىن جويدى. ال 1943 جىلدىڭ كۇزىندە نەۆەل قالاسى ءۇشىن بولعان كەسكىلەسكەن شايقاستا ول 102 ءفاشيستى ءولتىرىپ, اسقان ەرلىك كورسەتىپ قازا تاپقان. سول قاندى شايقاستا سۇرمەرگەن باتىر قازاقتىڭ اياۋلى قىزى, پۋلەمەتشى مانشۇك مامەتوۆا ەكەۋى ءبىر كۇندە, ءبىر مايدان شەبىندە وتان ءۇشىن جانىن پيدا ەتتى. ەكەۋىنىڭ دە سۇيەگى نەۆەل قالاسىندا جەرلەندى. ايتا كەتكەن ءجون, بىلتىر وسى نەۆەل قالاسىنداعى ىبىرايىم سۇلەيمەنوۆ اتىنداعى كوشەدە باتىرعا ارنالعان مەموريالدى تاقتا اشىلعان بولاتىن. ەندى, مىنە, قالامىزداعى باتىر اتىنداعى كوشەدە سۇرمەرگەن جاۋىنگەرگە ارنالعان ەڭسەلى ەسكەرتكىش بوي كوتەردى. بيىكتىگى 2 مەتر, تۇعىرى 2 مەتر ەسكەرتكىش پوستامەنتى تەمىر بەتوننان قۇيىلىپ, گرانيتپەن قاپتالعان. ءمۇسىن اۆتورى – قازاقستان سۋرەتشىلەر وداعىنىڭ مۇشەسى مومىش سەيىتكەرىم. «حالقىمىزدىڭ ماقتان تۇتار اردا ۇلى, قۇرالايدى كوزگە اتقان سۇرمەرگەن ىبىرايىم سۇلەيمەنوۆ ءوزىنىڭ جاس ءومىرىن قاسيەتتى جەڭىس جولىندا قۇربان ەتتى. ەسىمى ۇلى وتان سوعىسى تاريحىندا التىن ارىپپەن جازىلىپ قالدى. حالقىمىز «ەل ءۇمىتىن ەر اقتار, ەر اتاعىن ەل ساقتار» دەپ ايتقانىنداي, ەلىنىڭ ءۇمىتىن اقتاپ, حالقىنىڭ بەيبىت بولاشاعى ءۇشىن جانىن قيعان باتىردى ەل دە ۇمىتپاق ەمەس», – دەدى ەسكەرتكىشتىڭ اشىلۋ راسىمىندە جامبىل وبلىسىنىڭ اكىمى كارىم كوكىرەكباەۆ. سونداي-اق بۇل جيىندا باتىردى باسىلىم بەتتەرى ارقىلى ناسيحاتتاپ, ەسكەرتكىشتىڭ اشىلۋىنا سەپتىگىن تيگىزگەن بەلگىلى جۋرناليست, وبلىستىڭ قۇرمەتتى ازاماتى ساعات ارىن ۇلى مەرگەننىڭ ءومىرى مەن ورلىككە تولى ەرلىگىنەن سىر شەرتتى. ورالحان ءداۋىت. دەرەك, سۋرەت: egemen.kz.