فرانتسياداعى وڭىرلىك سايلاۋدا ساركوزي پارتياسى جەڭدى

استانا. 24 ناۋرىز. فرانتسيادا كەشە قورىتىندىسى شىققان وڭىرلىك سايلاۋدا ەلدىڭ بۇرىنعى پرەزيدەنتى نيكوليا ساركوزيدىڭ (سۋرەتتە) پارتياسى جەڭىسكە جەتتى. وسىلايشا ول جەرگىلىكتى سايلاۋدىڭ ءبىرىنشى اينالىمىندا الدىنا جان سالمادى. بۇل تۋرالى ۆۆس حابارلادى. بۇدان ءبىر كۇن بۇرى, جەكسەنبى كۇنى ۇلتتىق مايداننىڭ جەتەكشىسى مارين لە پەن حانىم سايلاۋدان وزدەرىنىڭ جەڭىپ شىعاتىندارىن مالىمدەگەن ەدى. بىراق سايلاۋ قورىتىندىسى مۇنى جوققا شىعاردى. دەگەنمەن, بۇل سايلاۋ فرانتسيادا ءۇشىنشى ساياسي ىقپالدى كۇشتىڭ دە پايدا بولعانىن انىق اڭعارتىپ بەردى. وسىنىڭ ناتيجەسىندە قازىرگى بيلىك باسىنداعى پارتيا ءۇشىنشى ساتىعا سىرعىپ كەتتى. سايلاۋ الدىندا لە پەن پارتياسى يمميگراتسيا مەن ەۆرەيلەرگە قارسى ساياسات جۇرگىزەتىنىن مالىمدەگەن ەدى. بۇعان قوسا, ول رەسەيمەن جاقسى دوستىق قارىم-قاتىناستا بولاتىندارىن دا جاسىرماي ايتىپ كەلەدى. الايدا, مىنا سايلاۋدىڭ ناتيجەسى ونىڭ ەندى 2017 جىلعى پرەزيدەنت سايلاۋىنداعى مۇمكىندىگىن دە السىرەتە تۇسەدى. سايلاۋدىڭ الدىن الا جاريالانعان رەسمي دەرەكتەرى مەن ەكزيت-پولل ناتيجەلەرى سايكەس كەلدى. وندا ساركوزي پارتياسى مەن ونىڭ وداقتاستارىنىڭ سايلاۋشىلاردىڭ 30 پايىز, ال ۇلتتىق مايداننىڭ 26 پايىز داۋىس العانى ايتىلعان بولاتىن. سايلاۋ الدىنداعى زەرتتەۋلەر بويىنشا, وڭشىلدار مەن اسىرەوڭشىلداردىڭ الداعى ساياسي باسەكەدە تالاسقا تۇسەتىنى دە انىقتالعان ەدى. فرانتسيانىڭ قازىرگى پرەزيدەنتى فرانسۋا وللاندتىڭ جاقتاستارى - سوتسياليستەر 21 پايىز داۋىسپەن ءۇشىنشى ورىن الدى. ساركوزي ۇلتتىق مايدانمەن قانداي دا ءبىر اليانس قۇرمايتىنىن مالىمدەپ تە ۇلگەردى. مۇرات ايتقوجا.