كولومويسكيدىڭ جاقتاستارى «حالىق ۆەچەسىن» جيناپ جاتىر

استانا. 24 ناۋرىز. دنەپروپەتروۆسكىدە وبلىس گۋبەرناتورىنىڭ جاقتاستارى بولىپ تابىلاتىن دەپۋتاتتار مەن ساياساتكەرلەر جيىن جيناپ جاتىر. بۇل تۋرالى ريا «نوۆوستي» حابارلادى. ۋكراينا پرەزيدەنتى پەتر پوروشەنكومەن تەكەتىرەستە وليگارح گۋبەرناتور يگور كولومويسكيدى قولداۋشىلار دنەپروپەتروۆسكىدە «نارودنوە ۆەچە» شاقىرۋدى قولعا الدى. مۇنى جوعارى رادادا وتكەن ءباسپاسوز ءماسليحاتىندا اندرەي دەنيسەنكو جەتكىزدى. مانبەنىڭ مالىمەتى بويىنشا, جيىن سارسەنبى, 25 ناۋرىز كۇنى كەشكى 19:00 ساعاتتا باستالاتىن بولىپ بەلگىلەنگەن. ەسكە سالا كەتەيىك, مۇنىڭ الدىندا ۋكراينا پارلامەنتىنە دنەپروپەتروۆسك وبلىسىنان سايلانعان اندرەي دەنيسەنكو, ۆيتالي كۋپري جانە الەكساندر دۋبينين وزدەرىنىڭ «پەترو پوروشەنكو بلوگى» فراكتسياسىنان شىعاتىندارىن مالىمدەگەن بولاتىن. قازىر دنەپروپەتروۆسك وبلىسىنىڭ گۋبەرناتورى يگور كولومويسكي مەن ۋكراينا بيلىگىنىڭ اراسى بارىنشا ۋشىعىپ تۇر. ول 19 ناۋرىز كۇنى جوعارى رادادا اكتسيونەرلىك قوعام تۋرالى زاڭعا ۋكراينانىڭ اسا باي ادامدارىنىڭ بىرىنەن سانالاتىن كولومويسكيدى «ۋكرنافتاعا» باقىلاۋ جاساۋ قۇقىعىنان ايىراتىن وزگەرىستەر ەنگىزىلگەننەن كەيىن ورىن الدى. وسىدان كەيىن كولومويسكيدىڭ ادامدارى ۇيىمنىڭ ءوفيسىن باسىپ الىپ, ونىڭ سىرتىن دەرەۋ تەمىر شارباقپەن قورشاپ تاستادى. وليگارح عيماراتتى قورعاۋعا قارۋلى كۇشتەرىن شىعاردى. كەيىرىنەك ۋكراينا ۇلتتىق گۆاردياسىنىڭ ەكى باتالونى دنەپروپەتروۆسكىگە بەت العانى بەلگىلى بولدى. مۇرات ايتقوجا.