ءۇندىستاندا بالالاردى قۇتقارامىن دەپ وتانداسىمىز قازا تاپتى

استانا. 24 ناۋرىز. «ەكسپرەسس-ك» گازەتىنىڭ باس ديرەكتورى الەكسەي پان ءۇندىستاننىڭ گوا دەمالىس ايماعىندا قازا تاپتى. بۇل تۋرالى nur.kz حابارلادى. «ەكسپرەسس-ك» باسىلىمى باس ديرەكتورىنىڭ ورىنباسارى ءادىلحان ءنۇسىپوۆ قايعىلى وقيعا ۇندىستانداعى گوا كۋرورتتىق ايماعىندا ورىن العانىن جەتكىزدى. مارقۇمنىڭ جۇبايى حابارلاعانداي, الەكسەي تولقىننىڭ استىندا قالعان جەرگىلىكتى بالالاردى قۇتقارماق بولىپتى. ول بالالاردى جاعاعا الىپ شىعىپ ۇلگەرگەن. بىراق وقيعادان كەيىن قاتتى تولقىعان الەكسەيدىڭ جۇرەگى كەنەتتەن توقتاپ قالعان. مارقۇمنىڭ مۇردەسى ءۇندىستاننان الماتىعا 25 ناۋرىزدا جەتكىزىلەدى دەپ كۇتىلۋدە. سىرتقى ىستەر مينيسترلىگىنىڭ ءباسپاسوز قىزمەتى حابارلاعانداي, قازىر ۇندىستانداعى قازاقستان ەلشىلىگى قايتىس بولعان وتانداسىمىزدى اكەلۋ ءۇشىن قاجەتتى قۇجاتتاردى راسىمدەۋمەن اينالىسۋدا. مارقۇممەن قوشتاسۋ ءراسىمى الماتىدا, شامامەن 26-27 ناۋرىزدا وتەدى. الەكسەي پان قازمۋ-ءدىڭ جۋرناليستيكا فاكۋلتەتىن تامامداعان. «وگني الاتاۋ» گازەتىنىڭ ءتىلشىسى قىزمەتىن اتقارعان, «كاراۆان» گازەتىندەگى جارنامالىق قىزمەتتى, «ەۋرازيالىق ونەركاسىپ قاۋىمداستىعىندا» قوعاممەن بايلانىس دەپارتامەنتىن باسقارعان. 2008 جىلى «ەكسپرەسس-ك» رەسپۋبليكالىق قوعامدىق-ساياسي گازەتىنىڭ باس ديرەكتورى قىزمەتىنە تاعايىندالعان. الەكسەي پان — قازاقستاننىڭ قۇرمەتتى ءجۋرناليسى. جولدىباي بازار. دەرەك, سۋرەت: nur.kz.