ازەربايجاندا ۋنيۆەرسيتەت رەكتورىنىڭ قىزىن ەكى جىگىت ۇرىپ كەتتى

استانا. 23 ناۋرىز. تاياۋدا عالامتوردا ازەربايجانداعى حازار گاملەت يساحانلى ۋنيۆەرسيتەتى رەكتورىنىڭ قىزى ۋلكەر يساەۆانى ەكى جىگىتتىڭ ۇرىپ-سوعىپ جاتقان ۆيدەوسى جاريالاندى. بۇگىندە بۇل ماسەلە اتالعان ەلدەگى الەۋمەتتىك جەلىلەردە قىزۋ تالقىلانۋدا. بۇل تۋرالى BBC حابارلادى. وقيعا باكۋدىڭ ورتالىق كوشەلەرىنىڭ قيىلىسىندا تۇنگى مەزگىلدە بولعان. كوپشىلىك قىزدى وسىنشالىقتى ۇرىپ-سوققانى ءۇشىن جىگىتتەردى كىنالاسا, كەيبىرەۋلەر جابىرلەنۋشىنىڭ ءوزىن ايىپتاپ وتىر. قىزدى كىنالاعاندار تۇندە بويجەتكەن ۇيدە وتىرۋى كەرەك دەپ سانايدى. اتالعان ۆيدەو 9 ناۋرىز كۇنى باكۋدەگى ازادلىگ جانە ۋزەير گادجيبەكوۆ كوشەلەرىنىڭ قيىلىسىندا ورنالاسقان بەينەكامەراعا جازىلىپ قالعان. جازبا ارقىلى ەكى جىگىتتىڭ دە اتى-ءجونى انىقتالدى. ازەربايجاندىق باق-تىڭ ايتۋىنشا, ولار اعايىندى زاۋر جانە ەلين مامەدوۆتار. بۇل جونىندە: «يساەۆا الەۋمەتتىك جەلىدەگى پاراقشاسىنا اعايىندى مامەدوۆتاردىڭ بىرىمەن تۇسكەن سۋرەتتەرىن جاريالانعان. ياعني, ولار بۇرىننان جاقىن ارالاسادى. ۋلكەردىڭ دوستارى كيكىلجىڭنىڭ قىزعانىشتان تۋى مۇمكىن ەكەنىن ايتادى», دەپ جازادى ازەربايجاندىق پورتالداردىڭ ءبىرى. بەينەجازبادان ەكى جىگىتتىڭ يساەۆانى «بەنتلي» ماركالى اۆتوكولىكتەن شىعارىپ جاتقانىن انىق كورۋگە بولادى. سونداي-اق, قىز تاكسيگە وتىرماقشى بولعاندا اعايىندى ەكەۋى تاعى دا كولىكتەن شىعارىپ, سوققىنىڭ استىنا الادى. ءتىپتى اياقپەن تەپكىلەگەنى دە تاسپاعا جازىلىپ قالعان. وسى وقيعاعا قاتىستى باكۋ پوليتسياسى قىلمىستىق ءىس قوزعاپ, جەرگىلىكتى سوتتان زاۋر مامەدوۆتى تۇتقىنداۋ ءۇشىن وردەر بەرۋىن سۇرادى. دەگەنمەن, اۋداندىق سوت بۇل ءوتىنىشتى قاناعاتتاندىرماي, مامەدوۆ بوستاندىقتا قالدى. سوت ءوز شەشىمىن يساەۆا حانىمنىڭ تاراپىنان ەشقانداي ارىزدىڭ بولماۋىمەن ءتۇسىندىردى. ولاردىڭ مالىمدەمەسىندە: «ۋلكەن يساەۆا اعايىندى مامەدوۆتارعا قارسى شاعىمدانعان جوق جانە ءوزىن ۇرىپ-سوعۋ فاكتىسىن مويىندامادى», دەلىنگەن. الايدا, سوتتىڭ بۇل شەشىمىمەن كەلىسپەگەن باس پروكۋراتۋرا اپەللياتسياعا بەرىپ, ءىستى قايتا قاراۋدى سۇرادى. پروكۋراتۋرانىڭ بۇل ارەكەتىنەن كەيىن اعايىندىلاردىڭ بىرەۋى قاماۋعا الىندى. ەلامان قوڭىر. دەرەك, سۋرەت: bbc.co.uk.