فوتو: istockphoto.com
قارجى نارىعىن رەتتەۋ جانە دامىتۋ اگەنتتىگى جۇرگىزگەن زەرتتەۋ ناتيجەسى بويىنشا, بۇگىندە ءاربىر ءۇشىنشى ازامات تولەمدى قولما-قول جاساۋدى ءجون كورەدى. مامانداردىڭ بولجامىنشا, كەلەر جىلى جاڭا سالىق كودەكسى كۇشىنە ەنگەن سوڭ, بۇل ءۇردىس ءتىپتى ۇدەۋى مۇمكىن. سەبەبى «جاپپاي باقىلاۋ» ءپرينتسيپى بويىنشا بارلىق قولما-قول وپەراتسيالار مەملەكەتتىك ورگاندارعا تولىق اشىق بولادى.
«قازىر كومپانيالار قولما-قول اقشا ءۇشىن ارنايى جەڭىلدىكتەر ۇسىنىپ جاتىر, الداعى ۋاقىتتا بۇل نارىقتا كەڭ ەتەك جايادى. مىسالى, قۇنى 5 ملن تەڭگە تۇراتىن تاۋاردى قولما-قول ساتىپ الساڭىز, سىزگە 10% جەڭىلدىك ۇسىنۋى مۇمكىن. 500 مىڭ تەڭگە ۇنەمدەۋ كەز كەلگەن ادام ءۇشىن ۇلكەن ءۋاج. مۇنداي اقشا ءۇشىن بانكوماتقا دەيىن بارۋ ەش قيىندىق تۋدىرمايدى», دەدى «Ulagat Consulting Group» كومپانياسىنىڭ ديرەكتورى مارات قايىرلەنوۆ.
سونىمەن قاتار ساۋالناما ەل تۇرعىندارىنىڭ قارجىلىق احۋالى ءالى دە كۇردەلى ەكەنىن كورسەتتى. رەسپوندەنتتەردىڭ 35%-ى تۇراقتى تۇردە اقشا تاپشىلىعىن سەزىنسە, تاعى سونداي بولىگى شىعىنداردىڭ جوعارىلىعىنان جيناق جاساۋعا مۇمكىندىگى جوق ەكەنىن ايتقان. تەك ۇشتەن ءبىر بولىگى عانا اي سايىن بەلگىلى ءبىر سومانى شەتكە ىسىرىپ قويا الادى.
