ال قاشاندا ساحنادان سەزىم عانا ەمەس, سۇلۋلىق پەن تەرەڭدىك ىزدەيتىن بولمىسىنان سىرشىل, ەستەت رەجيسسەر, قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى نۇرقانات جاقىپبايدىڭ سۋرەتكەرلىك قولتاڭباسىندا جازۋشى تاحاۋي احتانوۆ شىعارماسى جاڭاشا تىنىس تاپقانداي. رەجيسسەر كلاسسيكالىق ءماتىندى قۇر يلليۋستراتسيالاماي, ونى بۇگىنگى كۇننىڭ تىنىس-تىرشىلىگىمەن ۇندەستىرە وتىرىپ, زاماناۋي تەاترلىق بەينەلەۋ قۇرالدارى ارقىلى باسقا قىرىنان اشادى. قويىلىمدا اسقاق ارمان مەن قاراپايىم ءومىردىڭ قايشىلىعى, العاشقى ماحابباتتىڭ اڭعال دا تۇنىق تابيعاتى, سەنىم مەن ساتقىندىق, ونەر ادامىنىڭ نازىك جان دۇنيەسى مەن تۇرمىستىق پراگماتيزمنىڭ قاقتىعىسى قاتار ءوربيدى. بۇل – ءبىر عانا كەزەڭگە ءتان ەمەس, ءار ءداۋىر ادامىنا تانىس, شەشىمى جوق ماڭگىلىك ديلەمما. سەبەبى سەزىم بار جەردە اتالعان كۇيدىڭ بارلىعىن جۇرەكتى پەندەنىڭ باسىنان ايتەۋىر ءبىر كەشەرى ءسوزسىز.
قويىلىمنىڭ يدەيالىق وزەگىنە قازاق پوەزياسىنىڭ كورنەكتى وكىلدەرى تولەگەن ايبەرگەنوۆ پەن فاريزا وڭعارسىنوۆانىڭ سىرشىل جىرلارىنىڭ الىنۋى شىعارما اسەرىن ەسەلەي تۇسكەن. وتتى ولەڭدەر سپەكتاكل بويىنا لەيتموتيۆ بولىپ تارتىلىپ, كەيىپكەرلەردىڭ ىشكى جان الەمىن تەرەڭدەتە تۇسكەن. پوەزيالىق ورنەك رەجيسسەرلىك شەشىممەن شەبەر ۇشتاسىپ, ساحنادا سەزىمنىڭ قىمباتتىعى, ادالدىقتىڭ اسقاق ولشەمى, ار الدىنداعى تازالىقتىڭ ماڭىزى الدىڭعى قاتارعا شىعادى. وسى ارقىلى رەجيسسەر «ماحاببات مۇڭىن» سىرتقى وقيعاعا ەمەس, ادامنىڭ ىشكى كۇيزەلىسى مەن تاڭداۋىنىڭ دراماسىنا قۇرىلعان پسيحولوگيالىق قويىلىم دەڭگەيىنە كوتەرگەن.
سپەكتاكلدىڭ كوركەمدىك تۇتاستىعىن ايقىندايتىن باستى ەلەمەنت – ستسەنوگرافيا. اق ءتۇس – تازالىق پەن شىنايىلىقتىڭ, سۇلۋلىق پەن شەكسىزدىكتىڭ بەلگىسى. ال قويىلىمنىڭ ارتقى فونىنداعى جۇرەك ءپىشىندى قاعاز جاپىراقتارى ىلىنگەن الىپ اعاش پەن جەڭىل عانا قالىقتاپ تۇرار اپپاق ۇلپىلدەك ماتا – جاستىق شاقتىڭ ءرامىزى, اينىعىش سەزىم, اقتالماعان سەنىم مەن ورىندالماعان ارماننىڭ كورىنىسىندەي اسەر قالدىرادى. بۇلار جاي عانا دەكوراتسيا ەمەس, قويىلىم بويىنا ۇزدىكسىز ماعىنا دارىتىپ تۇراتىن پوەتيكالىق وبراز رەتىندە قابىلدانادى. ءاربىر ءۇزىلىس پەن ساحنالىق ساراپتاۋدا ول كورەرمەنگە جاستىقتىڭ وتكىنشى ەكەنىن, ال ماحابباتتىڭ جۇرەكتە قالاتىن مۇڭىن ەسكە سالىپ تۇرعانداي.
سپەكتاكلدىڭ تاعى ءبىر تابىسى – رەجيسسەرلىك شەشىمدەردىڭ كومپوزيتور رەنات گايسيننىڭ اسەرلى مۋزىكاسىمەن شەبەر ۇيلەسۋىندە دەر ەدىك. اۋەن مەن ساحنالىق بەينەلەر بىرلىگى كورەرمەننىڭ ەموتسيالىق قابىلداۋىن كۇشەيتىپ, سپەكتاكلدىڭ جالپى فيلوسوفيالىق تەرەڭدىگىن ايقىندايدى. كورەرمەن كوڭىلىنە سونداي ايرىقشا اسەر قالدىراتىن كورىنىستىڭ ءبىرى – انا بەينەسىنىڭ ساحنادان كورەرمەن زالى ارقىلى كەتۋى. بۇل ءسات ءتورتىنشى قابىرعانى بۇزىپ, كورەرمەندى جاي عانا باقىلاۋشى ەمەس, وقيعانىڭ رۋحاني كۋاگەرىنە اينالدىرادى. ونەر مەن ءومىر اراسىنداعى نازىك بايلانىستى, ۋاقىتتىڭ, تاعدىردىڭ ءھام ادام سەزىمىنىڭ ۇيلەسىمىن تەرەڭ سەزىندىرەدى. ناتيجەسىندە, ساحناداعى ۆيزۋالدى سيمۆولدار مەن اۋەزدى مۋزىكا ءبىر-ءبىرىن ءساتتى تولىقتىرىپ, قويىلىمعا پوەتيكالىق سىر مەن ىشكى تولعانىس بەرەدى.
قويىلىمدا رەجيسسەرلىك تۇرعىدان ەرەكشە نازار اۋدارتاتىن بەينە – انا وبرازى. تەاتردىڭ تالانتتى اكتريساسى بالجان زياقۇلوۆا كەيىپتەگەن انا ءرولى اۆانستسەنادا ءۇنسىز وتىرىپ, بۇكىل وقيعانى سىرتتاي باقىلايدى. ول – ارەكەتكە تىكەلەي ارالاسپايتىن, بىراق سپەكتاكلدىڭ رۋحاني وزەگىنە اينالعان تۇلعا. انا – حالىق جادى, ۋاقىتتىڭ ءوزى, تاعدىردىڭ ءۇنسىز ۇكىمى ىسپەتتى. ونىڭ ساحناداعى ءاربىر قيمىلى, كوزقاراسى جاس كەيىپكەرلەردىڭ تاڭداۋى مەن قاتەلىگىنە فيلوسوفيالىق سالماق بەرەدى. وزىنە جۇكتەلگەن جاۋاپكەرشىلىك پەن رەجيسسەر تاراپىنان ارتىلعان مىندەتتى بالجان زياقۇلوۆا پسيحولوگيالىق تۇرعىدا ءساتتى ساراپتاعان. ءسوزى از, بىراق سالماعى اۋىر ءرولدى اكتريسا بەينەلى بايىپ ءھام ىشكى تەرەڭدىكپەن تولعانادى. سونىسىمەن دە كەيىپكەرىنىڭ كوركەمدىك كىلتىن ءدوپ تاپقان. كوپتەن بەرى وڭتايىنا كەلەر ءساتتى رولگە جولىقپاي جۇرگەن بالجان ءۇشىن انا بەينەسى تابىستى ىزدەنىستىڭ ءبىرى دەپ باعالاساق, قاتەلەسپەيمىز.
«ماحاببات مۇڭى» سپەكتاكلىنىڭ تاعى ءبىر ولجاسى – ساحنادا جاڭا ەسىمنىڭ جارق ەتىپ كورىنۋى. ءلاززات بەينەسىن سومداعان جاس اكتريسا ارايلىم تۇرلان بۇل قويىلىم ارقىلى كورەرمەن نازارىن وزىنە بىردەن اۋدارىپ, پرەمەرانىڭ كوزايىمىنا اينالدى. ونىڭ ويىنى نازىك ليريزم مەن ىشكى قۋاتتى شەبەر ۇشتاستىرا وتىرىپ, كەيىپكەردىڭ جان دۇنيەسىندەگى تولقۋلاردى ءدال ءارى سەنىمدى جەتكىزدى. اكتريسا ساحنادا ءلاززاتتىڭ اڭعالدىعىن, ومىرگە دەگەن شەكسىز سەنىمىن, تابيعاتپەن ەتەنە جاقىن بولمىسىن اسەرلى اشا ءبىلدى. ول كورەرمەنگە جاس قىزدىڭ اسقاق ارماندارىن, پوەزياعا, ماحابباتقا دەگەن تازا ىقىلاسىن نانىمدى جەتكىزىپ, وبرازدىڭ باستاپقى قالپىن شىنايى سومدادى. سونىمەن قاتار جاس ساحناگەر شەبەرلىگى كەيىپكەردىڭ درامالىق دامۋى بارىسىندا دا ايقىن بايقالادى. ماسەلەن, ماحابباتتاعى ساتقىندىق پەن رۋحاني كۇيزەلىس ءلاززاتتىڭ ىشكى الەمىن كۇيرەتپەي, قايتا شىڭداي تۇسەتىن ساتتەردە ارايلىم تۇرلان پسيحولوگيالىق تەرەڭدىككە بوي ۇرادى. اكتريسانىڭ ساحناداعى پلاستيكاسى, ءسوز ساپتاۋى, ەموتسيالىق دالدىگى ونىڭ كاسىبي الەۋەتىنىڭ جوعارى ەكەنىن اڭعارتتى.
سونداي-اق نياز بەينەسىندە كورىنگەن اكتەر ءابۋتالىپ امىرەنىڭ شىعارماشىلىق ىزدەنىسى دە كوڭىلگە قونىمدى. ول كەيىپكەردىڭ سىرتقى تارتىمدىلىعى مەن ىشكى تۇراقسىزدىعىن قاتار الىپ شىعىپ, وبرازدىڭ پسيحولوگيالىق كۇردەلىلىگىن نانىمدى اشا ءبىلدى. العاشىندا پوەزياعا جاقىن, سەزىمتال, رومانتيك مىنەزدى بولىپ كورىنەتىن نيازدىڭ بىرتىندەپ جاۋاپكەرشىلىكتەن قاشاتىن, ەكىۇشتى بولمىسىن اكتەر ءبىر ساتتىك شەشىمدەرمەن ەمەس, ءرولدىڭ ىشكى دامۋى ارقىلى كورسەتەدى. ءابۋتالىپ امىرە نيازدىڭ ماحابباتتاعى سوزگە شەشەندىگىن, اسەرلى سەزىمگە بەيىمدىگىن نانىمدى جەتكىزە وتىرىپ, ونىڭ سول سوزدەردىڭ ار جاعىنداعى السىزدىگىن, رۋحاني تايازدىعىن دا جاسىرمايدى. كەيىپكەردىڭ ىشكى قايشىلىعى اكتەر ويىنىندا اسىرەسە شارىقتاۋ ساتتەرىندە ايقىن اڭعارىلادى. اكتەردىڭ بۇل رولدەگى ىزدەنىسى سپەكتاكلدىڭ پسيحولوگيالىق تەرەڭدىگىن ارتتىرىپ, ماحاببات پەن جاۋاپكەرشىلىك تاقىرىبىن اشۋدا سالماقتى ۇلەس قوستى دەپ سانايمىز.
الايدا قويىلىمداعى اكتەرلىك جۇمىستىڭ بارلىعىن بىردەي ءمىنسىز دەپ ايتا المايمىز. كەرىسىنشە, بۇعان دەيىنگى ساحنالىق ىزدەنىستەرىندە جارقىراپ كورىنىپ جۇرگەن تالانتتى اكتريسالار — ساليحا رولىندەگى نازەركە سەرىكبولوۆا مەن باعيلا بەينەسىندەگى شەحنازا قىزىحانوۆانىڭ بۇل جولعى ويىنىندا بەلگىلى ءبىر دارەجەدە كەرەعار اسەر بايقالدى. كەي تۇستاردا ولاردىڭ ورىنداۋىنداعى اسىرە سەزىم مەن ارتىق پافوس وبرازدىڭ تابيعي بولمىسىن كومەسكىلەندىرىپ, كەيىپكەردىڭ ىشكى لوگيكاسىن اشۋعا كەدەرگى كەلتىرگەندەي اسەر قالدىردى. باعيلا مەن ساليحا – دراماتۋرگيا تۇرعىسىنان نازىك پسيحولوگيالىق دالدىكتى تالاپ ەتەتىن كۇردەلى بەينەلەر. دەگەنمەن اتالعان اكتريسالاردىڭ ويىنىندا كەي ساتتەردە ەموتسيانى سىرتتاي كورسەتۋگە ۇمتىلۋ باسىم ءتۇسىپ, ءرول تابيعاتىن تەرەڭ ىشكى ىزدەنىس ارقىلى اشۋدان گورى جاساندىلىققا ۇرىندىرىپ العان تۇستار سەزىلدى. بۇل, اسىرەسە كەيىپكەرلەردىڭ درامالىق كۇيزەلىسىن جەتكىزۋ بارىسىندا انىق اڭعارىلدى. ارينە, مۇنداي پىكىر اكتەرلىك الەۋەتتى جوققا شىعارۋ ەمەس. كەرىسىنشە, الداعى رولدەرىنە باعدار بولادى دەپ سەنەمىز. ويتكەنى نازەركە سەرىكبولوۆا مەن شەحنازا قىزىحانوۆا – ساحنادا وزىندىك قولتاڭباسى قالىپتاسقان, ىشكى مۇمكىندىگى زور اكتريسالار. سوندىقتان دا بۇل رولدەردە بايقالعان ارتىق ەكسپرەسسيا مەن پافوس كەلەشەكتە تەرەڭ پسيحولوگيالىق تالداۋمەن, ىشكى جيناقىلىقپەن تولىقتىرىلسا, اتالعان بەينەلەردىڭ كوركەمدىك قۋاتى الدەقايدا بيىكتەي تۇسەرى انىق.
ءيا, «ماحاببات مۇڭى» – بۇگىنگى كورەرمەن ءۇشىن وزەكتى تۋىندى. قازىرگى قوعامدا سەزىمنىڭ جەڭىل قابىلدانۋى, جاۋاپكەرشىلىكتەن قاشۋ, ار مەن پايدا اراسىنداعى تاڭداۋدىڭ كۇردەلەنۋى ءجيى بايقالادى. وسى تۇرعىدان العاندا, رەجيسسەر قويىلىمدى ماحابباتتى وتكىنشى قۇمارلىق ەمەس, ادامدى رۋحاني بيىكتىككە باستايتىن اسىل قۇندىلىق رەتىندە ۇسىنادى. ادالدىقتىڭ باعاسىن, ار الدىنداعى تازالىقتىڭ ماڭىزىن كورەرمەن ساناسىنا قايتا سىڭىرۋگە ۇمتىلادى. شىعارمادا كوتەرىلگەن ماسەلەلەردىڭ امبەباپتىعى ونى تەك بەلگىلى ءبىر كەزەڭنىڭ نەمەسە ءبىر ۇرپاقتىڭ دراماسى شەڭبەرىنەن شىعارىپ, جالپىادامزاتتىق دەڭگەيگە كوتەرەدى. ماحاببات, سەنىم, ساتقىندىق, تاڭداۋ, جاۋاپكەرشىلىك سەكىلدى ۇعىمدار ءار كورەرمەنگە تانىس ءارى جاقىن. سوندىقتان دا «ماحاببات مۇڭى» اركىمنىڭ جۇرەگىنەن ورىن تاۋىپ, وزىنشە وي تۇيۋگە مۇمكىندىك بەرەدى. سپەكتاكل كورەرمەندى دايىن جاۋاپپەن قامتاماسىز ەتپەيدى, كەرىسىنشە سەزىم مەن اردىڭ تارازىسىندا ءوز ورنىن ىزدەۋگە جەتەلەيدى.
